Kosova e gatshme t'i kthejë të zhvendosurit, Beogradi po i mban peng

Kosova e gatshme t'i kthejë të zhvendosurit, Beogradi po i mban peng

Prishtinë, 20 dhjetor 2005 /TN /QIK - Qeveria e Kosovës po i krijon të gjitha kushtet e nevojshme për kthimin vullnetar të të gjithë të zhvendosurve, por qeveria e Beogradit po i mban peng rreth 60 mijë prej tyre sa gjenden në Serbi, vlerësoi sot ministri i Pushtetit Lokal Lutfi Haziri, kryesues i Grupit për kthim.
Ministri Haziri, tha se tashmë ka kushte për kthimin vullnetar të të gjithë qytetarëve të Kosovës, ndonëse ka ende për t'u bërë, por ai është kundër çdo kthimi kolektiv dhe për politizimin e saj, ashtu siç po insiston Beogradi.
Problem tjetër që Beogradi është duke e krijuar në këtë proces, që tashmë në Kosovë e udhëheqin institucionet nga maji i këtij viti, është refuzimi që të bisedojë me Prishtinën si partner i barabartë, dhe insiston që udhëheqjen e procesit ta rimerrë UNMIK-u.
Institucionet e Kosovës deri më tash kanë arritur të rikthejnë rreth 14 mijë të zhvendosur, shumica prej të cilëve serbë.
Këshilltari politik i ministrit, Dardan Gashi, që tash është bashkëkryesues me Hazirin në këtë proces, tha se nga kontaktet që ka pasur ai dhe sipas hulumtimeve të ESI-it, në Serbi duhet të gjenden rreth 60 mijë të zhvendosur, ndonëse Beogradi spekulon me shifra duke e rritur tejet ndjeshëm këtë numër të besueshëm.
Haziri u bëri thirrje të gjithë të zhvendosurve për kthim vullnetarë duke treguar edhe njëherë gatishmërinë e institucioneve të Prishtinës. Gashi shtoi se parimi i kthimit vullnetar dhe i kthimit në vendin e origjinës janë parime të vendosura prej tre vjetësh në Kosovë dhe këto parime kanë përjashtuar çfarëdo mundësie të ndërhyrjes me presion të Beogradit.
Por, sipas ministrit Haziri, Beogradi po mundohet ta rikthejë si çështje në këtë proces, që kthimi të jetë kolektiv, i organizuar, i mbikëqyrur nga UNMIK-u, dhe që të kthyerit të kthehen në vendin që duan ata apo Beogradi.
Ai tha se çështja e kthimit nuk është problem i qytetarëve të Kosovës. "Fundja kosovarët nuk do të vdesin se a do të realizohet ky proces qind për qind apo jo", tha Haziri.
Ministri Pushteti Lokal ripërsëriti qëndrimin e institucioneve se garantojnë të kthyerit, por që vendimi i tyre duhet të jetë i lirë.
"Ne si institucione të Kosovës jemi të obliguar që të krijojmë ambient të qëndrueshëm për kthim, dhe ta garantojmë këtë të drejtë me ligje, por do të jetë thjeshtë vendim individual i tyre si dhe në bazë të mundësive që ua krijon Beogradi", tha Haziri, duke shgtuar se ndryshe nga Beogradi, Podgorica dhe Shkupi janë të gatshëm për bashkëpunim në kthimin vullnetar.