Reagim: Kush po lanson shpifje kundër miqve amerikanë?

OPINIONE

Reagim: Kush po lanson shpifje kundër miqve amerikanë?

30 nëntor 2005 /TN

Reagim lidhur me artikullin “Janë të mjerë ata që mendojnë se njeriu është Zot”, botuar në gazetën “Koha Ditore” ditën e enjtë, më 24 nëntor 2005

Naim DEDUSHAJ

Në këtë artikull Gjeke Gjonlekaj , nder të tjera shkruan për disa personalitete të rëndësishme Në ShBA të cilët ishin aktiv me vite të tëra për çështjen e Kosovës dhe Shqiptare Në përgjithësi.

Në këtë artikull Gjeke Gjonlekaj,ne fjalorin më të ulët dhe shpifës, përmend emrin e senatorit dhe mikut të madh të shqiptareve Robert Dole, Kongresmenin Tom Lantos, sekretarin e shtëtit James Baker, amb. Richard Hollbruk , Kongresmenin James Traficant, etj.

Për hire të së vërtetës dhe me qellim të informimit të drejtë të opinionit kosovar,

Duke qenë se unë kam jetuar rreth 10 vite në ShBA, dhe kam qenë aktivë tërë kohën, si udhëheqës i Zyrës së LDK-së, në Amerikë, dhe se si njohës e mik personal i senatorëve Bob Dole, Tom Lantos, Hollbruk më duhet të them se të gjitha ato që i shkruan në artikullin e tij Gjekë Gjonlekaj nuk janë të vërteta dhe bëhen më një prapavijë të caktuar dhe mjaft të dëmshme për çështjen e Kosovës.

Vetë Gjonlekaj shkruan se Bob Dole e përkrahu demonstratën e shqiptarëve në Washington DC, më vitin 1976. Më pas ai shton se ky politikan i madh pësoi rënie kur filloi bashkëpunimin me disa individë shqiptarë të Amerikes. Ky është një absurd i llojit të veçantë. Senatori Dole, njëherë lëvdohet se ka përkrahur shqiptarët prej vitit 1976 e pastaj kritikohet pse ka filluar bashkëpunimin me disa shqiptarë të Amerikës!.

Bob Dole që nga fillimi kur filloi të merret me shqiptaret dhe çështjen e Kosovës ishte në miqësi me shqiptarët dhe se nga shqiptarët e Amerikës mësoi më shumë për çështjen e shqiptare dhe për çështjen e Kosovës. Një prej miqve më të ngushtë të Bob Dolit u bë biznesmeni shqiptaro amerikanët Jim (Xhem) Xhema, i cili edhe e njohu senatorin Dole me çështjen shqiptare dhe çështjen e Kosovës.

Gjatë kohës se fushatës presidenciale për president të ShBA 1996, shqiptarët e Amerikës i përkrahen dy kandidatët Bob Dole dhe Presidentin Clinton, një pjesë e Republikanëve shqiptaro-Amerikan, përkrahen Dolin dhe pjesa tjetër e demokratëve e përkrahen Clintonin, keshtu që shqiptarët me marrëveshje ishin përcaktuar dhe përkrahnin të dy kandidatët për president të ShBA-vë, sepse që të dy kanë kontribuar shumë për çështjen e Kosovës.

Vlen të theksohet fakti se Bob Dole në një takim që kishim në përkrahjen e tij për fushatë zgjedhore, ai kërkoi nga komuniteti shqiptaro-amerikan që ta përkrahim edhe Bill Clintonin. “Me qenë se unë jam mik i juaji dhe ja dua të mirën shqiptarëve kërkoj nga ju që ta përkraheni edhe Bill Clintonin, kështu qe do të keni përkrahje nga të dy anët “ tha në atë takim senatori Dole.

Në shkrimin në fjalë Gjonllekaj thotë se Bob Dole ka qenë kundër luftës për liri në Kosovë. Kjo nuk është vërtetë. Gjatë kohës së luftës Bob Dole erdhi nga ShBA-të për të takuar delegacionin shqiptar, për të mirën e Kosovës, edhe pse në atë kohë ishte i sëmure. Ai erdhi dhe u tha anëtarëve të delegacionit shqiptar që ta nënshkruajnë Marrëveshjen e Rambujesë sepse ai atëherë mendonte se është në të mire të shqiptareve që të nënshkruhet Marrëveshja , dhe se tani është e qartë se ai atëherë kishte të drejtë.

Kur Gjonlekaj thotë se Bob Dole shau nje prijës të UÇK-së me fjalë më banale, sepse ai kërkonte ta nënshkruhej urgjentisht marrëveshjen e Rambujesë. Dua ti them Gjonlekajt se në natyrën e Z. Bob Dole nuk është të shajë, as të ofendojë dhe se ky është një ofendim i rëndë ndaj personalitetit me të ndritur të ShBA, heroit të gjallë të Amerikës dhe mikut të madh të shqiptareve, senatorit Bob Dole .Nëse pyetni në tërë Amerikën nuk mund të gjeni njeri që flet keq për Bob Dolin , e lere më shqiptarët qe aq shumë bëri dhe po bën për ata.

Me kujtohet fort mirë fushata presidenciale në ShBA, dhe debatet e shumta gjatë fushatës kur Bob Dole dhe presidenti Clinton ishin kundërkandidatë. Kjo fushatë mbahet mend si fushata me e pastër dhe me e respektuara qe ka pasur historia e Amerikës, vetë Clinton vazhdimisht theksonte se nuk kam fjale të keqija për këtë njeri , dhe se nuk kam forcë që t’i them diçka të keqe sepse nuk kam çka të themë. Mu për këtë shkak Bob Dole, mbeti shok shumë i mirë dhe njeriu shumë i besuar i president Clinton, dhe këshilltar i tij i vazhdueshëm për çështjen e Ballkanit dhe të Kosovës.

Shtrohet pyetja se pse Gjonlekaj mundohet me këto fjalë të shëmtuara ta njollosë figurën e madhe të mikut të madh të shqiptareve, heroit të Amerikës , liderit dhe udhëheqësit të shumë viteve të Partisë Republikane në ShBA, dhe tani ambasadorit të nderit të Kosovës në SHBA. Pse i lansoni këto shpifje në këtë kohë z.Gjonlekaj kur këto ditë filloi edhe zyrtarisht procesi i negociatave për statusin final të Kosovës? Kujt po i pengojnë miqtë e Kosovës? Kush po frikohet nga Pavarësia e Kosovës?

Z.Gjonlekaj thotë se nuk mund të jetë mrekulli vizita e senatorit Dole në Kosovë më vitin 1990, ngase mrekulli qenka vetëm shkuarja e amerikanëve në hënë më vitin 1969. Dua ta përkujtoj dhe ta përsërisë edhe njëherë se vizita e senatorit Bob Dolit në vitet 90-ta ishte vërtetë një mrekulli, ishte një dritë shprese, ishte ditë historike për popullin e Kosovës, të okupuar dhe të rrethuar nga ushtria serbojugosllave. Gjonlekaj nuk ka qenë në Kosovë në ato vite këtu dhe se për të kjo ngjarje është vetëm si një ëndërr.

Gjithashtu Gjonlekajt i pengon edhe titulli ambasadorit të nderit të Kosovës për senatorin Dole të cilin e emëroi presidenti i Kosovës, dr.Ibrahim Rugova. Gjatë këtyre muajve të fundit derisa isha duke përgatitur një punim timin, lidhur me rolin e madh qe luajti Kongresi Amerikan për Kosovën, shfletova shumë dokumente, rezoluta, përkrahje financiar, qe lidhen me emrin e Senatorit Bob Dole. Mjafton vetëm t’i përmend disa prej tyre:

- Rezoluta e Senatit e paraqitur me 3 janar, 9 mars, 1989 nga Bob Dole (S.CON.RES.20),
- Rezoluta me 13 qershor 1989 (S.CON.RES.43 ),
- Rrezoluta e Senatit me 26 prill , 1990,
- Rezoluta e paraqitur me 21 qershor 1990,
- Rezoluta e paraqitur më 9 prill 1991,
- Rezoluta e paraqitur me 2 tëtor 1991,
- Rezoluta e paraqitur me 11 korrik 1991,
- Rezoluta e paraqitur me 11 tëtor 1991,
- Rezoluta e paraqitur me 7 shkurt 1992,
- Rezoluta e paraqitur me 29 prill 1992,
- Rezoluta e paraqitur me 28 mars 1996,

dhe shumë e shumë të tjera, të gjitha këto rezoluta të sponsorizuara nga senatori Bob Dole.

Gjithashtu më 7 shkurt të viti 1992 në Senatin Amerikan senatorët Alfons D’Amato, Robert Dole dhe ClayborNë Pell paraqesin një rezolutë për Kosovën me titull "Rezolutë për popullatën shqiptare në ish Republikën Jugosllave" ku kërkohet "inkuadrimi i menjëhershëm i përfaqësuesit të Kosovës në Konferencën Paqësore të Bashkësisë Evropiane.

Senatori Bob Dole në takimin e realizuar në shtator të vitit 1992 lajmëron komunitetin shqiptar se po punon me administratën amerikane. Dole siguroi në këtë takim për mbështetjen dhe simpatinë në rritje që po fiton çështja e Kosovës në Senat dhe në Kongres. Ai i inkurajon shqiptarët që të punojnë më shumë për sensibilizimin e opinionit amerikan për Kosovën përmes masmediave.

Ngjarje me rëndësi të madhe është vendimi i Senatit Amerikan me 1 tetor 1992 që t’i akordojë Kosovës një ndihmë humanitare me vlerë 5 deri në 8 milionë dollarë, në ndihmë të popullsisë së uritur, që i nënshtrohen represionit dhe gjendjes së jashtëzakonshme që pat vendosur Serbia. Senatori Dole dhe Claibornr Pell ishin ata që paraqitën amendamentin, për të ndarë për Kosovën një fond të tillë nga ndihma që ShBA u ndan çdo vjet shumë vendeve në botë.

Komuniteti shqiptar në Amerikë me vite të tëra ka investuar për të krijuar miq në Senatin, Kongresin dhe Shtëpinë e Bardhë në Uashington. Ndër këta miq të mëdhenj është edhe senatori Bob Dole. Shumë vende të botës do të kishin dëshirë dhe ia kanë lakmi Kosovës që e ka një mik të mirë senatorin Bob Dole. Duke I parë këto cilësi ta larta të senatorit Bob Dole, presidenti i Kosovës dr.Ibrahim Rugova bëri shumë mirë që e caktoi ambasador nderi të Kosovës në ShBA.

Në fund dua t’I them Gjekë Gjonlekajt dhe të tjerëve që mendojnë si ai se Bob Dole, Bill Clinton, Tom Lantos, Eliot Engel, larry Presler, Hillary Clinton, Alfons D’Amato, Suzan Molinar, Pel, Gillman, Kenedy, Peter King, Bill Sellif, Nita Louey, David Boinor, Serrano, Hamilton, Liberman, Sue Kelly, Joseph R. Biden , e shume të tjerë ishin, janë dhe do të mbeten përgjithmonë miqtë më të mëdhenj të shqiptarëve e të Kosovës.

------------------------------------------------------------------------------------------------------------------------------------------- P.S. Autori është këshilltar në Ministrinë e Kulturës, Rinisë, Sporteve dhe Çështjeve Jorezidente