Kryetari Tolaj u takua me kryeministrin Berisha

29 nëntor 2005 /TN

Një delegacion i Forumit të Rinisë të Lidhjes Demokratike të Kosovës i kryesuar nga Kryetari z.Sejdë Tolaj po qëndron në Tiranë, ku është ftuar për nder të 28 nëntorit ditës së flamurit dhe 93 vjetorit të ditës së shpalljes së Pavarësisë së Shqiperisë në Pallatin e Brigadave në Tiranë.

Ky delegacion në një takim të ndarë u takua përpos personaliteteve të tjera edhe me Kryeministrin e Shqipërisë z.Sali Berisha.

Në këtë takim Kryetari Tolaj e njoftoi për së afërmi Kryeministrin lidhur me aktualitetin politik në Kosovë ku edhe e falënderoi për angazhimin konkret që po bën Tirana Zyrtare në favor të mbështetjes së Pavarësisë së Kosovës.

Z.Berisha përmes Kryetarit Tolaj i ka dërguar përshëndetje të sinqerta Presidentit Rugova dhe gjithë qytetarëve të Kosovës dhe ka rikonfirmuar edhe një herë gatishmërinë e tij si Kryeministër i vendit për të mbështetur opsionin për pavarësinë e plotë të Kosovës.

Gjithashtu Delegacioni i FR-LDK-së u takua edhe me një delegacion të lartë të Forumit të Rinisë të PD-së të kryesuar nga Z.Flamur Noka nënkryetar.

Në këtë takim u diskutua lidhur me domosdoshmërinë e bashkëpunimit të këtyre organizatave rinore të cilat konsiderohen si organizatat më të fuqishme poetike në Kosovë dhe Shqipëri.

Pritet që delegacioni i FR-LDK-së gjatë këtyre ditëve të ketë edhe shume takime të tjera te rëndësishme me personalitete të njohura të jetës politike dhe institucionale në Shqipëri.