Mediokritetet...

OPINIONE

Mediokritetet...

26 nëntor 2005 /TN

Mediokritetet i bëjnë dëm partive politike, shkollave, kulturës, publicistikës..., se i klanizojnë. Por, më së shumti i bëjnë dëm vetes se shpërfaqin tërë paditurinë e tyre, që mundohen ta kamuflojnë, duke pranuar detyra që s’mund t’u dalin zot. E, kështu, bëhen gazi i botës. Por, kurrë nuk e kuptojnë këtë. Se mediokrit janë gjysmanalfabetë. Këta, nuk është thënë rastësisht, janë njerëzit më të këqij. Të këtillë i bën padituria e tyre, që ua bën shpirtin sa të miut. Për fat të keq, të tillë kemi sa të duash në shoqërinë tonë… Janë grumbulluar kudo, dhe kudo janë mospërfillës. Fallsiteti është tipari kryesor i tyre. Falls flasin. Falls buzëqeshin. Falls të përshëndesin. Falls ecin në rrugë. Bota mendojnë se sillet rreth tyre. E shefave u përkulen deri në gjunjë, kur nuk i sheh kush.

Nazmi LUKAJ

Mediokritetet më së shumti i bëjnë dëm vetes. Duke qenë individë me aftësi të kufizuara intelektuale, pranojnë të ushtrojnë veprimtari që s’mund t’u dalin mbanë. Po iu ofrua rasti ta marrin një post të lartë në politikë, ngjiten në të pa një pa dy.

Po iu ofrua rasti të bëhen gazetarë, turr bëjnë për t’u marrë me këtë profesion, edhe pse dy fjalë nuk dinë t’i lidhin kryq. Po iu ofrua rasti të bëhen mësimdhënës, pa një pa dy e kapin ditarin, edhe pse më së paku janë për të. Po iu ofrua rasti të bëhen këshilltarë politikë, turr e vrap e pranojnë një detyrë të tillë, edhe pse një libër me temë politike kurrë në jetën e vet s’e kanë lexuar.

( Mjafton për ta që e mbajnë dokumentin e këshilltarit. Edhe ashtu, kush nuk kërkon këshilla prej tyre). Të gjitha përgjegjësitë pranojnë t’i marrin mediokritetet, pa e matur veten aspak se a do të mund të jenë në nivelin që kërkojnë ato. E rëndësishme për ta nuk është se janë të zotët a jo për një detyrë të caktuar, por të duken si njerëz të rëndësishëm.

Dhe kështu, duke marrë përgjegjësi që nuk përputhen me mediokritetin e tyre, mëtojnë ta plotësojnë në opinion mungesën e aftësive intelektuale që kanë. Çdo detyrë e pranojnë vetëm që ta krijojnë bindjen e rrejshme për vete se janë dikushi. Si mediokritete që janë, paraqiten si shumë megalomanë kudo që punojnë. Dhe shesin mend se gjoja dinë çdo gjë.

Prandaj, janë të mërzitshëm kudo që punojnë. Se imponohen për t’i bindur të tjerët që janë shumë të zotët. Të mërzitshëm i bën mediokriteti i tyre. Për t’u mbajtur sa më gjatë në skenën politike, kulturore, publicistike etj. formojnë klane. Jashtë tyre e shohin vetën humbës kudo që punojnë. Gjithmonë u frikohen intelektualëve të mirëfilltë, të cilët i luftojnë me aparatin e intrigave, që të mos vijnë deri te ndonjë post i rëndësishëm shtetëror a partiak, kulturor, shkencor...

Mediokritetet, për këtë qëllim, kudo që lëvizin, përhapin fjalë se filan politikani nuk është me filan partinë, por në të ka hyrë për interesa personale, dhe se nuk e ndjen atë si të vetën. Po e kundërshtove klanin e mediokërve politikë se nuk janë të vërteta fjalët që thotë për filanin e fistekun, ta lodhë trurin me ligjërata që të të bindë se ashtu është, dhe s’ka tjetër të vërtetë për të. Politikanin e pakorruptuar dhe të ndershëm si njeri, mediokrit me çdokusht duan që ta paraqesin si të korruptuar.

Dhe ti, po e kundërshtove klanin e mediokërve, do të bëhesh edhe vetë objekt i aparaturës së intrigave të tij. Se klanet e mediokërve duan që të jesh konformist, përndryshe të shpallin luftë të rreptë. Klanet e mediokërve ekstazohen, kur ia arrijnë qëllimit t’i margjinalizojë intelektualët e mirëfilltë.

Ekstazohen se janë mediokër. Në luftën që bëjnë ndaj intelektualëve të mirëfilltë, fytyra e tyre e vërtetë zbulohet shumë shpejt. Dhe, shumë shpejt kuptohen nga opinioni se nuk janë gjë tjetër veçse mediokër, që përmes ruajtjes së posteve të tyre, ose ngjitjes në to, duan t’i plotësojnë dobësitë e veta intelektuale. Mediokritetet i bëjnë dëm partive politike, shkollave, kulturës, publicistikës..., se i klanizojnë.

Por, më së shumti i bëjnë dëm vetes se shpërfaqin tërë paditurinë e tyre, që mundohen ta kamuflojnë, duke pranuar detyra që s’mund t’u dalin zot. E, kështu, bëhen gazi i botës. Por, kurrë nuk e kuptojnë këtë. Se mediokrit janë gjysmanalfabetë. Këta, nuk është thënë rastësisht, janë njerëzit më të këqij. Të këtillë i bën padituria e tyre, që ua bën shpirtin sa të miut. Për fat të keq, të tillë kemi sa të duash në shoqërinë tonë.

Janë grumbulluar kudo, dhe kudo janë mospërfillës. Fallsiteti është tipari kryesor i tyre. Falls flasin. Falls buzëqeshin. Falls të përshëndesin. Falls ecin në rrugë. Bota mendojnë se sillet rreth tyre. E shefave u përkulen deri në gjunjë, kur nuk i sheh kush.

Sa keq që kemi kaq shumë mediokër. Sa keq dhe sa e dhimbshme është që nuk e kuptojnë se sa të vegjël janë. Shumë të vegjël. Sa keq që janë fluskë sapuni në shoqëri, e mendojnë se kravatat që i mbajnë, i kanë bërë autoritete. Zoti ua ruajtë shëndetin mediokërve! Se mendtë i kanë për salltanet…