Ahtisari shprehet pozitivisht për diskutimet në Kosovë dhe në Serbi

Ahtisari shprehet pozitivisht për diskutimet në Kosovë dhe në Serbi

26 nëntor 2005 /TN

Zëri i Amerikës (25.11.2005) - Ish presidenti finlandez Marti Ahtisari tha se ka marrë shumë informacione, të cilat do të krijojnë një bazë të fortë për bisedimet e ardhshme mbi të ardhmen e Kosovës.

Duke folur pas takimeve në Beograd me presidentin serb Boris Tadic dhe zyrtarë të tjerë, zoti Ahtisari refuzoi të bënte spekullime rreth kohës për zhvillimin e bisedimeve. Por tha se shpreson që t’i afrojë dy palët më pranë njera tjetrës për negociata të drejtpërdrejta në fillim të vitit të ardhshëm.

Zoti Tadic ka sugjeruar ndarjen e Kosovës sipas vijave etnike dhe rajoneve të banuara nga serbët dhe shqiptarët. Ai dhe udhëheqës të tjerë serbë kanë riafirmuar gjithashtu kundërshtimin e fortë ndaj kërkesave të palës shqiptare për pavarësinë e Kosovës dhe kanë ngulur këmbë që Kosova duhet të mbetet pjesë e Serbisë.

Në kuadër të misionit të tij zoti Ahtisari do të udhëtojë në Mal të Zi, Shqipëri dhe Maqedoni.

Kosovë: kthehen trupat e 41 shqiptarëve të vrarë gjatë luftës

26 nëntor 2005 /TN

Zëri i Amerikës (25.11.2005) - Autoritetet serbe kthyen në Kosovë trupat e 41 shqiptarëve të vrarë gjatë konfliktit të fundit të viteve 90-të dhe të varrosur në varreza masive në Serbi.

Trupat iu dorëzuan të premte autoriteteve të Kombeve të Bashkuara në zonën kufitare të Merdares. Trupat besohet t’u përkasin shqiptarëve të vrarë gjatë konfliktit në Kosovë, që pastaj jenë çuar me kamion në një qendër stërvitore të policisë jashtë Beogradit dhe në zona të tjera për t’u varrosur në varreza masive.

Që nga zbulimi i varreve, autoritetet serbe kanë nxjerrë 836 trupa dhe më shumë se 600 prej tyre ua kanë kthyer familjeve.

Specialistë të mjekësisë ligjore thanë se planifikojnë të bëjnë analizat e ADN-së për të përcaktuar identitetin e viktimave dhe t’ua kthejnë ato familjeve. Ata u kanë bërë thirrje të afërmve të personave të humbur të japin mostra gjaku për të ndihmuar në procesin e identifikimit.