Greqia duhet ta ndërrojë rrënjësisht kursin e vet politik ndaj shqiptarëve

OPINIONE

25 nëntor 2005 /TN

Ky kurs i mbështetjes politike që ia bën Serbisë, e komprometon Greqinë. Dhe këtë degradim, është koha e fundit, që t’ia lejojë vetes.. Vetëm duke qenë në fqinjësi të mirë me Shqipërinë, dhe duke e përkrahur pavarësinë e Kosovës do të mund të jetë një shtet krenar për lashtësinë e tij kulturore. Grekët nuk duhet ta harrojnë as kontributin që kanë dhënë shqiptarët për pavarësimin e saj nga Turqia. Për pavarësinë e Greqisë, shumë shqiptarë i kanë lënë eshtrat nën komandën e suliotit, Marko Boçari, që i doli zot në një kohë shumë të vështirë për të. Vetëm popujt e kulturuar i ndihmojnë lëvizjeve kombëtare të popujve të tjerë për pavarësi. Shqiptarët këtë provim e kanë dhënë për ta me Marko Boçarin e shqiptarët që u rreshtuan pas tij që t’ia heqin qafe Turqinë…

Nazmi LUKAJ

1.
Që kur u pavarësua nga Turqia, Greqia asnjëherë nuk iu shmang armiqësisë ndaj shqiptarëve, edhe pse, për shkak se jemi dy popuj të lashtë në Ballkan, do të duhej të ishte fqinji ynë më i mirë. Kjo jo vetëm që i dëboi gati të gjithë çamët nga trojet e tyre, jo vetëm që s’heq dorë nga apetitet për ta rrëmbyer Shqipërinë e Jugut etj., por edhe u rreshtua vazhdimisht me ato shtete që e përkrahën dhe e përkrahin politikën shovene të Serbisë për ta ngulfatur pavarësinë e Kosovës.

Pra, vazhdimisht e ka përkrahur dhe e përkrah Serbinë, një shtet që kurrë nuk hoqi dorë nga politika e saj shovene jo vetëm ndaj shqiptarëve, por edhe popujve të tjerë. Përkrahja që ia bëri dhe vazhdon t’ia bëjë kësaj,bazën e ka te antishqiptarizmi i vetë Greqisë. Një fakt tjetër që e përkrah këtë, është edhe që popujt e tyre kanë përkatësi fetare ortodokse. Greqia, me përkrahjen që ia ka bërë dhe po ia bën Serbisë, po e thellon antishqiptarizmin e saj.


2.
Këtë kurs politik që po e ndjek Serbia ndaj shqiptarëve, Greqia, më në fund, duhet ta ndërrojë rrënjësisht. Kjo, si një shtet që ka një popull me lashtësi si të shqiptarëve, kurrrë nuk do të mund të ndjehet krenare me kulturën e saj të lashtë përderisa ndjek një politikë antishqiptare. Se, për t’u dëshmuar si një shtet i kulturuar, duhet të mbajë raporte miqësore me Shqipërinë dhe duhet t’i përkrahë kërkesat e shqiptarëve të Kosovës për pavarësi. As njëjtësia e fesë që ka me popullin serb, nuk duhet të jetë pengesë për të që të jetë në anën tonë.

Nëse nuk e ka bërë këtë në të kaluarën, duhet ta kuptojë përfundimisht se tash është koha që të gjitha shtetet me lashtësi kulturore t’i përkrahin popujt e kulturuar, e jo për hir të lidhjeve të njëjta fetare, t’i përkrahin shtetet që nuk mund të lirohen nga politika shovene ndaj fqinjëve. Si dy popuj më të lashtë në Ballkan, grekët me shqiptarët duhet t’i lidhë kultura e tyre e lashtë, që duhet të jetë parim i politikës së të gjitha shteteve të civilizuara.

Se ç’kulturë ka një popull, e dëshmon edhe mbështetja që ia bën një populli të kulturuar. Duke e përkrahur Serbinë, Greqia e ka zvetënuar lashtësinë e saj kulturore. Sa kohë të jetë në anën e Serbisë, zvetënimi i lashtësisë së kulturës së saj do të marrë një përmasë edhe më të madhe. Si do të mund të arsyetohet Greqia se ka një popull të kulturuar, kur e përkrah politikën shovene për ta frenuar pavarësinë e Kosovës? Si mund ta arsyetojë kulturën e vet, kur përkrah një shtet që vazhdimisht ka bërë lufta për t’i shtypur popujt e tjerë?

3.
Ky kurs i mbështetjes politike që ia bën Serbisë, e komprometon Greqinë. Dhe këtë degradim, është koha e fundit, që t’ia lejojë vetes.. Vetëm duke qenë në fqinjësi të mirë me Shqipërinë, dhe duke e përkrahur pavarësinë e Kosovës do të mund të jetë një shtet krenar për lashtësinë e tij kulturore. Grekët nuk duhet ta harrojnë as kontributin që kanë dhënë shqiptarët për pavarësimin e saj nga Turqia.

Për pavarësinë e Greqisë, shumë shqiptarë i kanë lënë eshtrat nën komandën e suliotit, Marko Boçari, që i doli zot në një kohë shumë të vështirë për të. Vetëm popujt e kulturuar i ndihmojnë lëvizjeve kombëtare të popujve të tjerë për pavarësi. Shqiptarët këtë provim e kanë dhënë për ta me Marko Boçarin e shqiptarët që u rreshtuan pas tij që t’ia heqin qafe Turqinë.

E, te Greqia mbetet që t’i përmirësojë gabimet e veta ndaj shqiptarëve. Hapi i parë i saj në këtë drejtim, është që ta përkrah pavarësinë e Kosovës. Edhe një gjë duhet ta ketë të qartë Greqia. Vetëm duke e përkrahur pavarësinë e Kosovës, dhe duke mbajtur raporte të mira me Shqipërinë, do ta ketë përspektivën më të ndritur. Se shqiptarët dinë ta çmojnë lashtësinë kulturore të një populli. Dhe dinë ta çmojnë të mirën që ua bën një popull në kohëra të vështira…