Gazetarët dhe publicistët e rinj duhet të pajisen me informacione historike

OPINIONE

Gazetarët dhe publicistët e rinj duhet të pajisen me informacione historike

23 nëntor 2005 /TN

Studimet për gazetari që po i kryejnë jashtë, i kanë pajisur me stil gazetaresk. Po kaq e rëndësishme sa studimet që kanë kryer, është për ta edhe njohja e historisë për t’u kompletuar si gazetarë…

Nazmi LUKAJ

1.
Nëpër mediat tona, pas luftës, janë angazhuar një numër i madh i gazetarëve të rinj, disa prej të cilëve edhe po shquhen si shumë të talentuar. Mirëpo, sa herë që ndeshen me fakte historike, këta po çalojnë, sepse sheshit po vërehet se shumë pak janë të pajisur me informacion nga kjo fushë. Po ashtu, u mungojnë edhe informacionet për politikën e paraluftës. E këto dy elemente janë shumë të rëndësishme për t’u bërë një gazetar a publicist i mirëfilltë.

P.sh., një gazetar i ri dhe shumë i talentuar, para nja dy muajsh, në një emision të tijin e kishte ftuar një politikan serb nga Kosova. Në shumë raste, ky gazetar e shpartalloi atë. Por, duke mos qenë njohës i mirë i historisë kombëtare, e as i asaj ballkanike, e bëri një gaf të rëndë.“

Populli shqiptar dhe populli serb nuk kanë jetuar gjithmonë në këto troje, sepse edhe serbët, edhe shqiptarët kanë lëvizur. Pse insistoni se Kosova duhet të jetë pjesë e Serbisë?”, e pyeti atë. Po të ishte njohës i mirë i historisë kombëtare dhe ballkanike, nuk do t’ia formulonte pyetjen kështu.

Se dihet kur kanë ardhur serbët në Ballkan, dhe prej nga kanë ardhur. Dhe, historikisht, dihet se shqiptarët gjithmonë kanë jetuar në këto troje. Pra, janë serbët ata që kanë lëvizur, por jo shqiptarët. Ky ishte një gaf që assesi nuk do të duhej t’i ndodhte.

2.
I njëjti gazetar, sërish në një intervistë me një politikan të Serbisë, bëri edhe një tjetër lëshim profesional. “Edhe serbët kanë qenë shpeshherë viktima të shqiptarëve”, përgjigjet përafërisht politikani nga Serbia, duke dashur t’i ikën insistimit të gazetarit se a duhet të kërkojë falje qeveria serbe për dhunën dhe gjenocidin që ka ushtruar në shqiptarë.

Në këtë rast, gazetari është dashur menjëherë t’ia bëjë pyetjen: Në ç’etapë paska ndodhur ky viktimizim i serbëve nga shqiptarët? Ai (politikani në fjalë) do të zihej në zgripc, sepse s’do të mund ta gjente argumentin për ta justifikuar përgjigjen. Raste të gjenocidit që kanë bërë shqiptarët në serbë, nuk do të mund të gjente në asnjë periudhë kohore.

Po të kishte qenë i pajisur edhe me faktet historike, atëherë intervistat e bëra nga ky gazetar shumë i talentuar, do të dilnin shumë më të suksesshme, kurse politikanët serbë të intervistuar do të mposhteshin plotësisht. Prandaj, gazetarët e rinj e publicistët duhet ta kenë shumë të qartë se nuk do ta arrijnë kurrë zenitin që synojnë, nëse nuk pajisen mirë me informacione nga fusha e historisë kombëtare, ballkanike e botërore. Këtë duhet ta kenë parasysh të gjithë gazetarët dhe publicistët e rinj.

Këtë duhet ta ketë parasysh edhe gazetari që është më i shquari dhe më i talentuari prej tyre. Studimet për gazetari që po i kryejnë jashtë, i kanë pajisur me stil gazetaresk. Po kaq e rëndësishme sa studimet që kanë kryer atje, është për ta edhe njohja e historisë për t’u kompletuar si gazetarë.