Fjalimi i Ministrit të Arsimit A. Veliu për - 600 vjetorin e lindjes së Skënderbeut me ç'rast filloi punimet simpoziumi ndërkombëtar me temën "Gjergj Kastrioti Skënderbeu dhe epoka e tij"

21 nëntor 2005 /TN

Ministri, z. Agim Veliu
Datë: 21.11.2005

I çmuari z. President i Kosovës,
I nderuar Kryetar i Akademisë së Shkencave e Arteve të Kosovës, z. Rexhep Ismajli,
I nderuar kryesues z. Jusuf Bajraktari,
I nderuar Kryetar i Kuvendit të Kosovës
I nderuar z. Kryeministër,
Mysafirë të nderuar,
Pjesëmarrës të këtij simpoziumi,
Zonja e Zotërinjë,


Është nder dhe privilegj i veçantë që në emër të Ministrisë së Arsimit, Shkencës e Teknologjisë dhe në emrin tim, t’i përshëndes punimet e këtij simpoziumi kushtuar 600 vjetorit të lindjes së kryeheroit tonë kombëtar, Gjergj Kastrioti.

Është thënë e shkruar shumë për Skënderbeun, për atë “strallin që bën dritë në mbamendjen tonë historike, me idealin e të cilit u identifikua kombi shqiptar”, por edhe 6 shekuj pas epokës së tij, shqiptarët e kanë për nder të identifikohen me trimin legjendar që duke mbrojtur Shqipërinë u vu në mbrojtje të qytetërimit europian.


Që nga Barleti e deri më sot janë botuar qindra botime për personalitetin njerëzor, ushtarak, diplomatik, patriotik të Gjergj Kastriotit, 600 vjet pas lindjes së tij, ka ende çka të flitet për qenien e tij luftarake atdhetare. Sidomos sot, kur pjesë e gjeografisë së atdheut të ndarë duhet të bëjë hapat që Skënderbeu i pat bërë në Lezhë me Lidhjen e Princave Shqiptarë.

Për shqiptarët gjithandej trojeve etnike, figura patriotike dhe personaliteti prej udhëheqësi i kryetrimit tonë kombëtar, mbeten frymëzim i fuqishëm për të vazhduar me ndriçimin e epokës së tij.
Asaj epoke për të cilën studiues vendorë e ndërkombëtarë pajtohen që ka emrin e Gjergj Kastriotit dhe vulën meritore prej mbrojtësit të qytetërimit perëndimor!


Pjesëmarrës të nderuar,

Simpoziumi ndërkombëtar kushtuar 600 vjetorit të lindjes së Skënderbeut, ka simbolikën e shumëfishtë që Prishtinës e Kosovës i jep madhështinë e Hyut vetë, për shqiptarët reflekton domosdoshëmërisht filozofinë e unifikimit të qenies shpirtërore e mendore.

Kam besimin e thellë se gjatë aktiviteteve në vijim, ju do të hidhni dritë të re për epokën e madhe të tribunit që nderoi Shqipërinë e shqipëtarët dhe civilizimin europian.

Shqiptarët dhe Kosova kanë dëshmuar e po provojnë se ishin dhe janë pjesë e natyrshme e kulturës dhe e qytetërimit europian.

Është në radhë që Evropa dhe bota ta çmojë rolin e udhëheqësit të lëvizjes çlirimtare i cili 6 shekuj më parë mbrojti fuqishëm vlerat njerëzore dhe lirinë tonë, të cilën edhe Kosova e sotme e dëshiron për ta ndërtuar ardhmërinë dhe pavarësinë e saj.

Le të jetë ky simpozium ndërkombëtar, një hap shkencor para për të ndriçuar epokën e Gjergj Kastriotit, por edhe një synim për të treguar shpirtin liridashës të shqiptarëve dhe Kosovës veçantë!

Puna e vazhdueshme shkencore e Akademisë së shkencave dhe Arteve, Institutit të Historisë dhe elitës intelektuale të Kosovës, ky simpozium ndërkombëtar, janë ai zëri jehues që shenjtërisht shpreh angazhimin e intelektualëve për lirinë e Kosovës edhe sot.

Duke ju uruar punë të mbarë, me lejoni t’’ju falënderoj për kontributin Tuaj.

Falënderim dhe urim për jetë të gjatë edhe Presidentit Rugova nën patronatin e të cilit ndodhë ky evinement madhështor!

Ju faleminderit!




Fjalimi i Ministrit të Arsimit A. Veliu për - 9 vjetorin e vdekjes së Këshilltarit për arsim të Presidentit Rugova dr. Xhavit Ahmetit

Ministri, z. Agim Veliu
Datë: 21.11.2005

Familje e dashur Ahmeti,
I nderuar kryetar i Kuvendit të Kosovës, z. Daci
Miq, kolegë dhe familjarë të profesorit,
Zonja e Zotërinj,


Përvjetorët si ky i sotmi, përveç mallit për më të dashurit tanë që nuk i kemi fizikisht në mesin tonë, gjithëmonë sjellin dhembjen krenare dhe kujtimin që bëjnë jetë me ne përjetësisht!

Xhavit Ahmeti, profesori i nderuar i Universitetit të Prishtinës, Këshilltari për arsim i Presidentit Ibrahim Rugova dhe Deputeti i Parlamentit të Republikës së Kosovës, mbetet intelektuali që kërkoi lirinë për të cilën u vu në shërbim deri në çastet e fundit të jetës së tij.

Ne që kemi pasur nderin ta njohim dhe të punojmë e bashkëveprojmë për lirinë dhe pavarësinë e Kosovës, te profesor Xhaviti kemi parë njeriun e dashur, intelektualin dhe atdhetarin me vlera çfarë mund ti kenë vetëm njerëzit e dimensioneve të tij.

Arsimi dhe Pavarësia e Kosovës ishin dy çështjet madhore për të cilat dha aq shumë profesori i nderuar i Kimisë analitike dhe më vonë i Kimisë së përgjithshme.
Me mbi 30 punime shkencore, 27 kumtesa, 9 projekte shkencore e dhjetra libra, zëri i profesor Xhavitit u dëgjua jo vetëm në Kosovë, por edhe në SHBA, Angli, Gjermani, Shqipëri, etj.
Puna dhe angazhimi i tij i palodhshëm bëri që ai të krijohej në zëdhënësin e shkencës së re të Kimisë dhe arsimit të pavarur përgjithësisht, që bashkë me segmentet tjera të jetës funksionalizuan shtetin e Kosovës.


Xhavit Ahmeti e ka ndie që nga fillimi se LDK-ja është një Lidhje kombëtare shtetformuese e cila u krijua dhe u rrit në flijime. Për proceset politike e kombëtare të asaj kohe duhej dije e guxim, vlera e virtyte, të gjitha këto veti individuale që i pati profesori, intelektuali dhe atdhetari Xhavit Ahmeti dhe bashkëveprimtarët e miqtë e tij dhe tanët.

Rruga për lirinë dhe pavarësinë e Kosovës ishte e vështirë dhe gjatë veprimeve shumë njerëz u bënë miq, sish shkuan duke lënë dhembjen e madhe. Para disa vitesh ne punonim e bashkëbisedonim me Enver Malokun, Fehmi Aganin, me profesor Xhavitin, me Xhemail Mustafën. Mbetën të lidhura zemrat dhe idetë, ato që sot reflektojnë lirinë për të cilën këta njerëz, miq e atdhetarë punuan e vepruan deri në fund të jetës.

Pjesëmarrës të nderuar,

Sikur atë ditë të ndarjes me profesorin Xhavit, dhembja e pikëllimi janë ndjenjat që na përcjellin në realitetin e jetës që nuk do të duhej të ishte.
Me njerëzit si Ai dhe ATA ndodh e kundërta, bëhen jetë ato realitete që s’duhet! Ndarja e tij nga ne mbeti edhe pas plot 9 vjetësh, një tjetërsim i jetës!

Megjithë dhembjen e natyrshme edhe pas plot kaq vitesh, bëmat dhe vizioni i gjallë i Xhavit Ahmetit për lirinë dhe shtetin e Kosovës na bëjnë më të fortë, më të përgatitur për sfidat nëpër të cilat po kalon populli dhe institucionet e Kosovës.

Nëntë vjet pas ndarjes me profesorin e UP-së dhe Këshilltarin për arsim të Presidentit Rugova, pjesë të idealit të tij janë realizuar.
Kosova e lirë pret njohjen e pavarësisë, institucionet zgjedhura me votën e lirë vazhdojnë përpjekjet për ndërtimin e jetës demokratike dhe të mirëqenies për të gjithë.
Arsimi kosovar po vazhdon me reformat në të gjitha nivelet dhe me vendosmëri ecë drejt integrimeve në hapësirën arsimore evro-perëndimore, në format dhe teknikat e bashkëkohësisë për t’u integruar me identitet në proceset e modernitetit në fushën e arsimit.

Pavarësisht mungesës vetëm fizike, e themi edhe sot se Xhavit Ahmeti është pjesë e pandashme e lirisë dhe e përparimit të Kosovës.

Prandaj njerëzit si AI nuk vdesin, vetëm ndërrojnë dimensionet e jetës, për të ndriçuar jetë e mot ndër brezni ardhmërinë tonë e të fëmijëve tanë!