Akademik Esat Stavileci i dërgoi sot një material të vëllimshëm Grupit Negociues të Kosovës

Akademik Esat Stavileci i dërgoi sot një material të vëllimshëm Grupit Negociues të Kosovës

Prishtinë, 20 nëntor 2005 /TN - Akademik Esat Stavileci i dërgoi sot një material të vëllimshëm me shkrim Grupit Negociues të Kosovës në të cilin përmblidhen faktet dhe argumentet që mbështesin pavarësinë e plotë të Kosovës.

Akademik Esat Stavileci këtë material ia dërgon Delegacionit të Kosovës simbolikisht, para se z.Marti Ahtisari, të fillojë misionin e tij në Kosovë.

Komponentë nisëse dhe bazë e materialit është trajtimi i çështjes së Kosovës si çështje e vetëvendosjes.

Sipas akademik Esat Stavilecit, mbi bazën e kësaj të drejte të pamohueshme të shqiptarëve, të deklaruar edhe në normat ndërkombëtare, Kosovës duhet t’i njihet statusi i shtetit sovran dhe të pavarur.

Në material përfshihet një shqyrtim i bollshëm për historinë politike të çështjes së Kosovës, si një anë e çështjes së pazgjidhur shqiptare.

Në letrën shoqëruese të materialit që përmbledh paraqitjet e viteve të fundit dhe të kohëve të fundit të akademik Esat Stavilecit, ky i fundit uron Delegacionin e Kosovës që të këmbëngulë në qëndrimin se pavarësia është e panegociueshme.