Kadare sjell botimin e tij më të ri “Pa forme është qielli”

Kadare sjell botimin e tij më të ri “Pa formë është qielli”

19 nëntoe 2005 /TN

Anila Çuli, Jeton Kelmendi

Ismail Kadare pas shumë kohësh tërheqjeje, është shfaqur me një promovim të veçantë me librin e tij më të ri me poezi. Nisur me një deklarim të tillë, e me theksin se, “të gjithë ne në kësi takimesh duhet ta kujtojmë dhe duhet të biem në mendime për këtë gjë”, Kadare ka folur pas shumë e shumë kohësh për poezinë e tij e veçanërisht për një poezi të hershme që i ka falur edhe titullin këtij libri.

“Pa formë është qielli”, një përmbledhje me 100 poezi dhe poema shkruar në 50 vjet krijimtari letrare, përmbledh në vetvete dy krijime të pabotuara më parë, këtë poezi të hershme që i takon vitit 1957, dhe një poemë të shkruar në mars-prill 2005 me titull “Tirana në dimër”.

Ky titull nuk është rastësishëm. Madje lidhet me një nostalgji të rinisë së hershme të shkrimtarit Ismail kadare. I cilësuar si një titull absurd, “Pa formë është qielli”, sipas tij “mund të quhet më tepër si një titull pak i pazakonshëm një çikë ekstravagant, ndoshta dhe pak cinik.

Ky është një varg që e kam shkruar kur unë kam qenë student në Universitetin e Tiranës në vitin 1957 gati gjysmëshekulli më parë, në kohën kur me intuitë kërkoja në poezinë shqipe sikurse kërkonin dhe shumë të rinj, një qiell tjetër”.

Duke nxjerrë në pah një kuptim simbolik të këtij titulli, Kadare komentoi: “Zakonisht qielli i kryeqytetit socialist si çdo kryeqytet socialist në botë, quhej i gëzueshëm, me shpresë, me diell dhe unë shkrova këtë varg: “Pa formë është qielli si tru idioti”. Sigurisht, ishte e papranueshme dhe kjo vjershë nuk ka hyrë në asnjë botim timin gjatë 50 vjetëve”.

E tashmë pas gjysmë shekulli, pas shumë kohësh heshtje sirtarëve, “për nostalgji të rinisë e vura këtë titull i cili ka një kuptim simbolik, sepse shprehte një aspiratë, një dëshirë, që ishte tepër e vështirë për t’u kryer në atë kohë”.

Shkrimtari Kadare kishte ardhur enkas për këtë botim nga Franca, vetëm një ditë përpara publikimit të këtij libri. Në këtë promovim merrnin pjesë mjaft miq dhe kolegë të shkrimtarit. Bujar Hudhri, botues i Shtëpisë Botuese “Onufri”, ka prezantuar librin më të ri. Në fjalën e tij ai shtoi se për të është një kënaqësi që shkrimtari i madh Kadare ka bashkëpunuar përgjatë këtyre viteve.

Vetë Kadare, falënderoi shtëpinë botuese si dhe mbështetësin kryesor të këtij botimi, “Tirana Bank”. Ai tregoi se arsyeja e ardhjes së tij ishte pikërisht ky botim dhe dëshira për t’i vënë një titull, të cilin e kishte dobësi që në rini të tij. Pas një qëndrimi relativisht të shkurtër, Kadare pritet të niset për Krishtlindje, drejt qytetit ku ai jeton, Parisit