Nga Manastiri i Deçanit tek Kisha e Shën Stefanit në Rozafë

OPINIONE

Nga Manastiri i Deçanit tek Kisha e Shën Stefanit në Rozafë

14 nëntor 2005 /TN

Nga Kabil BUSHATI, editor i gazetës “Shkodra”

I gjithë lidershipi mbarë shqiptar, gjatë negocimit për pavarësinë e Kosovës, sot po konvergon në nji pikë:atë të mbrojtjes së të drejtave të pakicës sërbe, ku nji vend të randësishëm zë dhe e drejta për ushtrimin e lirë të besimit religjioz dhe mbrojtjen e objekteve të kultit. Në fakt liria e besimit asht gur themeli në nji shtet demokratik dhe gjer këtu nuk ka asgja të keqe.

Por po vihet re nji farë potencimi të këtij problemi nga i tanë lidershipi shqiptar. Pra po maksimalizohen problemet e pakicës sërbe dhe po minimalizohen ato të shumicës shqiptare. Kemi nji servilosje të këtij lidershipi deri në pështirosje.

E thanun ma shkoqun, të gjitha këto probleme të pakicës sërbe në Kosovë dhe pakicave të tjera rregullohen me nji Kushtetutë, ashtu siç veprohet rëndom në të gjitha shtetet demokratike të botës. Biles kryetari i shtetit të Kosovës nesër mund të firmosë Kartën e Helsinkit dhe atyë të Parisit për të Drejtat e Njeriut, ashtu siç e kanë firmosë të tjerët.

Pra nuk ka nevojë për nji sikletosje të tillë, kur nji siklet kaq të madh nuk e ka as vetë Koshtunica. Por duke pa këtë gadishmëri të pa cak të lidershipit shqiptar në këtë drejtim, pala sërbe sot po mundohet të nxjerrë përfitimë sa ma maksimale. Nuk mbetet mbprapa as Kisha Ortodokse helene. Skenari është ndertuar nëpër Sillose të dyshimta mesjetare.

Sipas këtij skenari sot diskutohet që edhe Manastiri i Deçanit(sikur të ishte Manastiri i Parmës)të mbetet objekt ekstraterritorial sërb brënda Kosovës, sikur të ishte ambasadë. Mbetet vetëm të pyetet pala sërbe se sa hektarë oborr dëshiron, a thue se atë tokjë shqiptare Koshtunicës ja ka pasë lanë baba. Le të shkojmë ma tej, ortodoksia sërbe, duke pa servilosjen e lidershipit shqiptar, po jargavitet dhe po ndermerr sulme të tjera në kurriz të popullit shqiptar.

Para pak kohësh, në malin e Rumisë, në Krajë, arriti që me helikopterrët e ushtrisë të vendosë pjesët metalike të nji kishe ortodokse. Paçka se Kraja nuk ka pasë asnjiherë në historinë e saj kishë ortodokse. Kraja ka pasë Kisha Katolike, trojet e të cilave janë të ruajtuna edhe sot e kësaj dite nga muslimanët e Krajës si prona të Kishës Katolike të Shkodrës.

Kraja ka vetëm dy fshatra me katolikë, që janë Shestani e Ljarja. Se ç'kërkon kisha ortodokse në malin e Rumisë këtë vetëm mëndjet e errta të hierarkëve ortodoksë mund ta dijnë. . . ndoshta edhe mendjet e shtetarëve shqiptarë që nuk protestojnë botnisht. . .

Ma e bukura ndodhi në Shkodër para pak javësh, gjithnji simbas këtij skenari. Nji fondacion që edhe sot nuk i thuhet emni, në bashkepunim me Institutin e Monumenteve të Shqipnisë, përmes Ambasadës Amerikane kalon nji shumë prej 30 mijë eurosh për rindërtimin e nji Kishe të Shën Stefanit në majë të Kalasë së Rozafatit në Shkodër, bash mbi temelet e Xhamisë 500 vjeçare të Sulltan Mehmedit të Dytë, Fatihut.

Pra besimtarët muslimanë , në shumicë, provokohen randë nga kjo ambasadë. Dhe ku?Në qytetin ma proamerikan të Europës. Në Shkodër kudo nëpër shtepia e zyra mbahet flamuri amerikan dhe portretet e Klintonit, Bushit Senjor e Bushit Junior.

Në Shkodër ka lokale me emrin e ish Presidentit Klinton. Shkodranët ma razi do të ishin sikur në maje të Kalasë të Rozafatit të ngrihej sa Statuja e Lirisë, nji Përmendore për Klintonin, që u tregue mik me shqiptarët në ditët ma të vështira të historisë. Po ç'don Kisha Ortodokse në Shkodër. Prej shekujsh në këtë qytet qarkullon nji fjalë e urtë, se në Shkodër gjithmonë ka pasë 99 ortodokse por 101 nuk janë ba kurrë.

Masandej mu në mes të Shkodrës, për besimtarët ortodoksë u ndertue nji Kishë Katedrale, paçka se Katedrale Ortodokse në Shkodër nuk ka pasë asnjiherë. Si zakonisht, për këtë ngjarje qeveria shqiptare dhe Presidenti i Republikës, kanë mbyllur gojën. Ka reaguar vetëm Myftiu i Shkodrës Bashkim Bajraktari, i cili ka akcentuar se nuk do të mbajë asnji përgjegjësi nëse shkodranët do të reagojnë ashpër.

Siç shihet ky skenar murgesk, nji Zot e di se ku e ka fundin. Fillon në Deçan e mbaron në Rozafë. Por sipas të gjitha gjasave, nji skenar i tillë synon që t'u tërheqë vemendjen shqiptarëve nga Kosova Lindore, Preshevë-Bujanovci, dhe tenton ti detyrojë shqiptarët që të merren me historina Manastiresh e Kishash. . . Vallë në këtë fillim shekulli, jemi në epilogun e Manastirit të Parmës?