Kundër shfrytëzimit të fëmijëve

Kundër shfrytëzimit të fëmijëve

14 nëntor 2005 /TN

E diel, 13 nëntor 2005 / BBC - I dërguari i posaçëm i Kombeve të Bashkuara për shitjen, prostitucionin, trafikimin dhe pornografinë e fëmijëve, Juan Miguel Petit, thotë se edhe pse autoritetet në Shqipëri kanë marrë masa ndaj shfrytëzimit të fëmijëve, ende duhet të ndërmerren politika sociale parandaluese.

Sipas tij, duhet një përfshirje e gjërë e shoqërisë dhe masa drastike për uljen e varfërisë, forcimin e kufijve dhe luftën ndaj korrupsionit, si fenomene negative që mbështesin trafikimin dhe shfrytëzimin e fëmijëve.

Korrespondenti i BBC-së në Tiranë, Ardi Pulaj, bisedoi me zotin Petit dhe fillimisht e pyeti se si paraqitet gjendja aktuale në Shqipëri?

Juan Miguel Petit: Shqipëria ka hedhur hapa përpara dhe fillimi duket i mirë. Qeveria është angazhuar dhe ka krijuar instanca të posacme në strukturat e policisë, forcimin e kufijve, duke krijuar njësi anti-trafikimi.

Por, problemi mbetet ekzistent. Mund të shkoni në një lagje të varfër të cdo qyteti në Shqipëri dhe duke folur me familjet dhe fëmijët, sheh se është një gjë e zakonshme që fëmijët të çohen jashtë shtetit. Mbase është mënyra e tyre për të mbijetuar. Por, ata nuk janë koshientë për rreziqet që paraqiten.

Fëmijët përballen me trafikantë apo rrjete prostitucioni. Mendoj se për të eleminuar këtë problem është të zhduket varfëria, sepse ky është një nga shkaqet kryesore.

BBC: Cilët fëmijë janë më shumë të ekspozuar ndaj trafikimit apo shfrytëzimit të tyre?

Juan Miguel Petit: Është një një koincidencë e përgjithshmë që popullsia rome apo egjiptiane në Shqipëri janë më shumë të ekspozuar, por është e vërtetë se në cdo lagje të varfër, ka fëmijë që shkojnë në vende të tjera. Mjafton të shkosh në një shkollë e të pyesësh fëmijët: a keni shokë që kanë shkuar jashtë?

Dhe ata do të thonë - po. Ne kemi pasur raste që fëmijët kanë shkuar nëpërmjet maleve për të hyrë në Greqi, duke kontaktuar trafikantë. Nga ana tjetër, vajzat e vogla janë të ekspozuara, pasi ato mund të bien pre e rrjeteve të prositucionit apo pedofilisë.

Ato nuk kanë një të ardhme nga komuniteti i tyre, nëse shkollat nuk funksionojnë, nëse duhet të kujdesen për familjen, nëse do t’u duhet të martohen që në moshë të vogël, atëherë një trafikant mund t’i ofrojë një të ashtuquajtur ëndërr. Një ëndërr që do të kthehet në tmerr.

Të mbyllura në një apartament të ndonjë vendi fqinj, të shfrytëzuara dhe të keqtrajtuara. Ne duhet të veprojmë përpara trafikantëve. Shteti duhet të jetë më efiçent sesa trafikantët apo mafia, duke ofruar mundësi, punë dhe t'i ndihmojë të vegjlit të shpalosin vlerat e tyre.

BBC: A konsiderohet Shqipëria një vend origjine apo tranziti për trafikimin e fëmijëve për në vendet perëndimore?

Juan Miguel Petit: Trafikimi dhe lëvizja e fëmijëvë është një realitet. Një natë ne shkuam në pikën e kufirit të Shqipërisë me Greqinë dhe aty po riatdhesoheshin në atë moment rreth 50 emigrantë, mes të cilëve edhe një fëmijë. Ka pasur raste që janë rikthyer edhe pesë apo gjashtë. Të dhënat e organizatave ndërkombëtare flasin se zyrtarisht në vitet e fundit, janë rregjistruar cdo vit rreth 400-500 raste të kthimit të fëmijëve.

Por, ekspertët e të drejtave të fëmijëve do të thonin se në të vërtetë rastet janë tre apo katër herë më shumë nga të dhënat zyrtare. Ne mund të mendojmë se çdo gjashtë orë një fëmijë shqiptar, i pa shoqëruar, shkon në Itali apo Greqi, duke kaluar kufirin. Në disa raste trafikantët rregullojnë kushtet që këta fëmijë të lypin për familjen e tyre.

BBC: Cili është rreziku që i pret këta fëmijë kur shkojnë në vendet e tjera?

Juan Miguel Petit: Pikësëpari fëmijët nuk ndjejnë se ata duhet të shkojnë në shkollë, të përgatiten për punë, të shijojnë kohën e fëmijërisë dhe më pas të bëhen të rritur. Varfëria dhe dëshpërimi ku ata jetojnë, i bën ata të mendojnë se duhet të punojnë dhe të përfitojnë të ardhura për familjet e tyre.

Dhe ata rriten shumë shpejt. Një vajzë nëntë vjecare përshembull mund të lypë në rrugë, por me kalimin e viteve kur ajo të jetë 13 apo 14 vjeç, rreziqet për t’u përfshirë në prostitucion janë të mëdha dhe për të do të jetë e vështirë për t’u larguar nga kjo. Mund të them se rreziqet janë të mëdha.

BBC: Cfarë duhet bërë më shumë për të ndaluar këtë fenomen?

Juan Miguel Petit: Mendoj dy gjëra kryesore duhen bërë. E para, duhet implementuar një demokraci e shëndetshme për të luftuar korrupsionin, modernizimin e policisë dhe forcimin e sistemit gjyqësor. Dhe gjithashtu duhen ndërmarrë strategji të shumta sociale nga ana e qeverisë për zonat e lëna në harresë si dhe të përfshihen organizatat jo qeveritare dhe shoqëria.

BBC: Pas Shqipërisë ju do të nisni një vizitë në Greqi, vend në të cilin është raportuar se shumë fëmijë shqiptarë janë trafikuar për t’u shfrytëzuar, duke lypur në rrugë, apo të përfshirë në aktivitete të tjera ilegale. A po hetoni ju për këto raste?

Juan Miguel Petit: Lëvizjet e popullsisë dhe migrimi i fëmijëvë për të gjetur rrugë mbijetese, ndodhin në një hapësirë gjeografike që i kalon kufijtë, ndodh në Itali, Greqi, Maqedoni. Në këtë mision ne jemi përqëndruar tek Shqipëria dhe Greqia. Mesazhi që ne duam të përcjellim është se këto çështje nuk i interesojnë vetëm një vendi. Për fëmijët duhet të mendojnë qeveritë e të gjitha vendeve.

Pra, çështja që nga Shqipëria janë trafikuar fëmijë në Greqi, është çështje që duhet t’i interesojë edhe autoriteteve greke. Jam i sigurt se autoritetet greke do ta kuptojnë këtë. Ne duam të ndajmë me ta informacionin e mbledhur në Shqipëri dhe idetë dhe të shohim drejt një përgjegjësie të ndarë mes dy vendeve.