QSHRT, tri çmime për gazetarinë hulumtuese në shëndetin mendor

Tiranë: QSHRT, tri çmime për gazetarinë hulumtuese në shëndetin mendor

12 nëntor 2005 /TN
Pranvera Skana*

Qendra Shqiptare për Rehabilitimin e Traumës dhe Torturës (QSHRT) organizon për here të parë konkursin kombëtar për gazetarinë investigative ku do të jepen tri çmime në një ceremoni të veçantë në muajin dhjetor të këtij viti.

Konkurimi merr shkas nga një veprimtari e paradokohshme e QSHDNJ-së, e cila organizoi dhënien e tre çmimeve në fushën e të drejtave të njeriut. Në këtë veprimtari gazetari Marin Mema i kanalit televiziv Top-Chanel, gazetarja Bruna Prifti i së përditshmes “Shekulli” dhe gazetarja Zirina Llambro e së përditshmes “Panorama” kanë qenë fitues të çmimeve të para.

Konkurimi i QSHRT-së përfshin periudhën janar-nëntor

2005 dhe fokusohet në problematikë që lidhen me shëndetin mendor. Gazetarët e rubrikave të aktualitetit, të kronikës apo të atyre sociale në organe të përditshme ose të përkohshme, ndryshe nga çdo vit tjetër, kanë dhënë një ndihmesë të ndjeshme në problemet e shëndetit mendor. Gjendja e rëndë në spitalet psikiatrike, dhunimi i grave dhe fëmijëve, moszbatimi i ligjit të shëndetit mendor dhe mosintegrimi në shoqërinë e sotme të ish të përndjekurve politikë, kanë zënë faqe të tëra në shtypin shqiptar dhe në disa revista të përkohshme.

Këto tema dhe probleme të tjera që lidhen me shëndetin mendor do të jenë si bazë në përzgjedhjen e shkrimeve më të mira përgjatë një viti.

Në këtë konkurim marrin pjesë të gjithë gazetarët e medias së shkruar, (kryredaktorë, redaktorë, reporterë, analistë) si dhe të gjithë korrespodentët.

Shkrimi (raport investigative, reportazh, kronikë e gjatë) duhet të jetë botuar në një të përditshme gjatë periudhës janar –nëntor 2005.

Një kopje e shkrimit me titull, me emrin e autorit, me kohën e botimit dhe gazetën përkatëse dërgohet me postë elektronike në adresë të QSHRT-së.

Si edhe në konkurimin e QSHDNJ-së edhe në këtë konkurim, gazetarët e përzgjedhjes së shkrimeve fituese janë të përjashtuar nga pjesëmarrja në konkurim.

Dy konkurimet mendohet që të zhvillohen edhe gjatë vitit 2006.

--------------------------------------------------------------------------------------------------------- Pranvera Skana, *Anëtare e rrjetit të gazetarëve hulumtuesë (investigativë)

Adresa
QSHRT - Rr. “Kont Urani”
No. 10, Tirana, Albania
www.arct.org
E-mail: info@arct.org