Ahtisaari flet për detyrën e ngarkuar nga OKB

Ahtisaari flet për detyrën e ngarkuar nga OKB

11 nëntor 2004 /TN

E premte, 11 nëntor 2005 /BBC - Ish presidenti finlandez, Marti Ahtisaari, si i dërguari kryesor OKB-së për të mbikqyrur bisedimet mbi statusin e Kosovës tha për BBC-në se mendon se njerëzit presin që statusi të zgjidhet gjatë vitit të ardhshëm, por ai vetë thotë se sa më shpejt aq më mirë.

Faik Luta intervistoi zotin Ahtisaari dhe fillimisht e pyeti se pse u vonua miratimi zyrtar nga Këshilli i Sigurimit dhe se a ishin të vërteta njoftimet se ai kishte kërkuar sqarime të pushteteve të tij në mënyrë që t'i shmangej ndërhyrjeve nga cilido anëtar i Grupit të Kontaktit?

Ahtisaari- Nuk besoj se është kështu. Nuk ka pse Presidenti i Këshilli i Sigurimit të aneksojë parimet udhëzuese të Grupit të Kontaktit që lidhen me Sekretarin e Përgjithshëm. Mendoj se dokumenti është i rëndësishëm për Sekretarin e Përgjithshëm të OKB-së dhe për mua vetë. Grupi i Kontaktit është një grupim i vendeve të rëndësishme, disa prej të cilëve janë anëtarë të përhershëm të Këshillit të Sigurimit.

Ata kanë punuar në dokumentin e tyre të parimeve udhëzuese. Unë vetë isha në takimin e zhvilluar në Uashington javën e kaluar kur ata ende ishin në përfundim e sipër të dokumentit. Kompetencat e mia përfshihen në shtojcën e dokumentit, i cili përfaqëson qëndrimet e një grupi të vendeve të rëndësishme dhe Rusia është njëri prej këtyre vendeve. Përsa i përket referencave ndaj meje dhe rolit tim, për këto vendos Sekretari i Përgjithshëm.

BBC - Zoti Ahtisari si do t'i drejtoni negociatat? A do të ketë diplomaci shëtitëse mes Prishtinës dhe Beogradit? Cila do të jetë metoda?

Ahtisaari- Në këtë moment, jam i gatshëm të them vetëm se kam planifikuar një vizitë për në Prishtinë dhe Beograd para fundit të këtij viti. Gjithashtu, gjatë kësaj jave do të vizitoj edhe kryeqendrat fqinje, si Podgoricën, Tiranën, Shkupin e të tjera. Do të dëgjoj qëndrimet e Prishtinës dhe Beogradit si dhe të fqinjëve dhe do të nisemi nga ajo pikë.

BBC - Zoti Ahtisari, ju ia dolët të arrini një marrëveshje për të përfunduar luftën në Kosovë në vitin 1999. A prisni që detyra e tanishme të jetë më e vështirë apo më e lehtë?

Ahtisaari- Ajo detyrë nuk ishte dhe aq e lehtë. Por ajo u krye me profesionalizëm dhe shpejtësi, sepse të gjithë donin arritjen sa më parë të një marrëveshjeje. Përsa i takon bisedimeve të ardhshme, tani për tani e kam të vështirë të them diçka. Ndoshta, ju duhet të ma bëni këtë pyetje pas fazës së parë të bisedimeve.

BBC - Pra, a mendoni se këtë rradhë mund ta keni më të vështirë ngaqë nuk keni mbështjeten apo kërcënimin ushtarak?

Ahtisaari- Varet se si vlerësohet mbështjetja. Kësaj radhe ndoshta kam më shumë mbështetje dhe qëndrim të përbashkët se më parë, sepse Këshilli i Sigurimit e ka miratuar dhe mirëpritur emërimin tim. Së dyti, Bashkimi i Europian na mbështet plotësisht - kështu që mendoj se kemi një mbështetje të fortë. Kjo është një detyrë e vështirë, por kjo çështje ka zgjuar përkrahje dhe interes të madh ndërkombëtar dhe kjo nuk duhet nënvlerësuar.

BBC - Zoti Ahtisari, ju jeni negociator me shumë përvojë që keni arritur të zgjidhni mjaft konflikte. Si i bëni palët bashkëbiseduese të arrijnë kompromise?

Ahtisaari- Mendoj se kjo varet nga rrethanat të cilat gjithmonë janë të ndryshme, kështu që nuk mund të bëhen përgjithësime. Megjithatë, për negociatorin ndoshta një parim është i qartë. Ai duhet të jetë i hapur me të gjithë dhe i drejtpërdrejtë. Kjo sepse nuk ia vlen që çështjet të paraqiten të mjegullta. Është e rëndësishme që të gjithë ta dinë qëndrimin tim dhe unë tyrin, me qëllim që të mos ketë të papritura.

BBC - Zoti Ahtisari, shqiptarët ka shumë gjasa që të mos pranojnë më pak se pavarësinë, ndërkohë që serbët mund të pranojnë gjithçka tjetër përveç pavarësisë së Kosovës. Nga e filloni ju, kur pozitat e tyre janë kaq të papajtueshme?

Ahtisaari- Sikurse ju thashë, unë e filloj punën duke i dëgjuar. Unë do t'i dëgjoj se çfarë kanë për të më thënë e pastaj punën e vazhdojmë që aty.

BBC - Dhe cili krah prisni të jetë më i vështirë për ju?

Ahtisaari- Nuk kam ndërmend të përzgjedh ndonjërin krah që përfshihet në këtë çështje sepse, fillimisht, më duhet t'i dëgjoj të dy krahët.

BBC - Zoti Ahtisari sa kohë prisni të zgjasin këto bisedime?

Ahtisaari- Nuk e kam fare idenë se sa do të zgjasin bisedimet. Disa thonë se ata mund të zgjasin nga vetëm 3-4 muaj e deri pambarimisht. Mbrojtësit e mendimit të fundit thonë se nuk duhet të ketë kurrfarë afati për bisedimet. Por sigurisht, unë mendoj se shpresat janë që zgjidhja të gjendet gjatë vitit të ardhshëm. Unë vetë do të dëshiroja sa më shpejt, aq më mirë. Ne do të ecim para me vendosmëri por nuk do të ngutemi.

BBC - Ju i keni ndjekur zhvillimet në Kosovë gjatë vitit të kaluar. Sa përparim mendoni se është bërë?

Ahtisaari- Jo, nuk mendoj se i kam ndjekur zhvillimet aq nga afër. Më shumë kam lexuar se çfarë është raportuar nga përfaqësuesi i posaçëm dhe raportin e kohëve të fundit të ambasadorit Kai Eide. Mendoj se këto dokumente i keni lexuar edhe ju vetë.

BBC - Pra, çfarë përparimi mendoni se është bërë, duke gjykuar nga këto raporte?

Ahtisaari- Ka plot punë për të bërë. Le të themi që ka plot punë për të bërë. Dua të them se kur flasim për status, duhet të flasim për status me standarde.

BBC - Çfarë sfide është kjo për ju?

Ahtisaari- Kjo ka më shumë rëndësi për palët, është më shumë sfidë për ata se sa për mua. Unë e marr çdo detyrë me shumë seriozitet, por shpresoj se do të arrijmë një zgjidhje të arsyeshme.