Shefer: Satusi i Kosovës duhet të jetë i pranueshëm para së gjithash për kosovarët

Shefer: Satusi i Kosovës duhet të jetë i pranueshëm para së gjithash për kosovarët

Prishtinë, 9 nëntor 2005 /TN /QIK - Mihael Shefer, drejtor Politik në Ministrinë e Punëve të Jashtme të Gjermanisë dhe përfaqësues i këtij vendi në Grupin e Kontaktit, tha se Ahtisari duhet të gjejë një zgjidhje për statusin e Kosovës që para së gjithash të jetë e pranueshme për qytetarët e Kosovës.

Ai në prononcimin e tij pas takimit me kryeministrin e Kosovës Bajram Kosumi, tha se është me rëndësi që procesi i bisedimeve të fillojë, "pasi do të çojë kah zgjidhja për statusin që është shumë me rëndësi për stabilitetin në rajon".
Sipas tij, Grupi i Kontaktit nuk e favorizon asnjërin nga zgjidhjet specifike.
"Ne e kemi bërë të qartë mbështetjen tonë të plotë për të dërguarin e posaçëm, i cili do të dëgjojë qëndrimet e të dyja palëve dhe në dritën e këtyre qëndrimeve do të fillojë të diskutojë lidhur me çështjet shumë të komplikuara që duhet të shqyrtohen para se vetë bisedimet për statusin e ardhshëm të mund të vijnë në rendin e ditës", tha ai.

Shefer tha se vendi i tij i ka dhënë besimin Ahtisarit, që si i dërguar i posaçëm ta gjejë zgjidhjen që do të çojë drejt një statusi të pranueshëm për të dyja palët dhe, si tha, posaçërisht i pranueshëm për njerëzit që jetojnë në Kosovë. Ndërsa, ka shtuar se ai nuk dëshiron të prejudikojë ndonjë zgjidhje specifike, por se ajo duhet të jetë rezultat i bisedimeve.
"Ne duam të shohim, nëse është e mundur, një zgjidhje që do të je produkt i negociatave dhe kjo do të thotë se të dyja palët do të duhet të bëjnë kompromis dhe kjo është e qartë se të dyja palët duhet të bëjnë kompromise të rëndësishme”, tha Shefer, duke theksuar se Gjermania nuk ka qëndrim të fiksuar për asnjë zgjidhje përfundimtare, por që rezultati “duhet t’i kontribuojë stabilitetit rajonal", u shpreh Shefer. Diplomati gjerman takoi edhe me Veton Surroin, kryetar i Ora-s, me të cilin diskutoi për fazën e përgatitjeve për bisedimet për statusin e Kosovës. Surroi, sipas një njoftimi të kësaj partie, paraqiti qëndrimin e tij se zgjidhja e statusit të Kosovës duhet të jetë zgjidhje funksionale, e shtetit të ardhshëm të Kosovës, në të cilin do të garantohen të drejtat e të gjitha komuniteteve.

"Bashkëbiseduesit u pajtuan për nevojën e ecjes më të shpejtë në procesin e përgatitjeve për bisedime ndërsa u theksua që shumëçka në këtë proces do të varet edhe nga kreativiteti dhe ekspeditiviteti i faktorit politik kosovar", thuhet në këtë njoftim.
Ndërkaq, lideri i serbëve të Kosovës Oliver Ivanoviq pas takimit me z.Shefer, tha se ka propozuar që serbët e Kosovës të jenë si delegacion i tretë në bisedime.

Sipas tij delegacioni do të merrej me të drejtat themelore të serbëve, para së gjithash me çështjen e decentralizimit, si dhe me elementet e mbrojtjes së serbëve, përmes ndryshimeve në kornizën kushtetuese. Por, ai tha se nëse Beogradi do të jetë këmbëngulës në insistimin që "të mos jenë delegacion i tretë, ne nuk do të kundështojmë dhe do ta lëmë që Beogradi vetë ta zgjidhë".
Ndërkaq z.Shefer, tha se GK-ja me parimet udhëheqëse e ka bërë të qartë se e "para gjë është mbrojtja e të drejtave njerëzore dhe mbrojtja pakicave dhe që secila zgjidhje duhet t'i kontribuojë stabilitetit rajonal".