| KULTURË | HISTORI

Petersen nesër shtron darkë për Grupin Negociator

Prishtinë, 9 nëntor 2005 /TN /QIK - Zëdhënësja e KFOR-it Valeri Kler Bermon (Valerie-Claire Bermond), ka sqaruar edhe njëherë se plagosja e djeshme e ushtarit çek, ka ndodhur në kohën kur një njësit i KFOR-it ka ndërhyrë në ndalimin e një konflikti të armatosur ndërmjet dy grupeve shqiptare, që prenin dru në brezin kufitar Kosovë - Serbi në fshatin Uglar.

Ajo tha se nga të dyja grupet policia ka arrestuar 7 veta, njëri prej të cilëve është plagosur dhe gjendet i shtrirë në spital. Mësohet se i plagosuri është Rrahim Mehmeti (1966) nga fshati Sllatinë i Podujevës.
Zëdhënësi i UNMIK-ut Neraxh Sing, tha se kryeadministratori Soren Jesen Petersen për nesër në darkë ka ftuar anëtarët e Grupit Negociator, në rezidencën e tij private në lagjen Taslixha të Prishtinës.
Po ashtu Sing, në këtë takim të rregullt me gazetarë, bëri të ditur se nesër në Grand do të takohen rreth 100 anëtarë të Grupit Konsultativ të Inspektimit të Sektorit të Sigurisë së Brendshme (ISSR).

Qëllimi i këtij takimi është që të krijohet një sektor i brendshëm efikas i sigurisë, i përballueshëm dhe i përgjegjshëm për të gjithë njerëzit e Kosovës. Sektori do të strukturohej me një komision drejtues, një grup këshillimorë dhe me sekretariatin.
Në takim do të marrin pjesë përfaqësues të UNMIK-ut, të institucioneve të Kosovës dhe të KFOR-it, si dhe përfaqësues të komuniteteve etnike dhe fetare, të shoqërisë civile, të mediave e biznesit. Sipas zëdhënësit Singh ky është një proces 8 fazash që do të ofrojë një analizë gjithëpërfshirëse të nevojave afatshkurtra dhe afatgjata për zhvillimin institucional të sektorit të brendshëm të sigurisë në Kosovë.



Në rezidencën e Petersenit nesër mbahet një takim i Grupit Negociator të Kosovës

Prishtinë, 9 nëntor 2005 /TN /QIK - Grupi i delegacionit të Kosovës për bisedimet për statusin, i cili do të punojënë hartimin e platformës për bisedimet, pritet të fillojë punën në një afat sa më të shkurtër për hartimin e platformës politike për Kosovën shtet të pavarur dhe sovran.

Sipas shtypit, në Grupin Politik janë caktuar përfaqësues të partive kryesore në vend. Nga LDK ja është caktuar Kolë Berisha, nga PDK ja, Jakup Krasniqi, nga AAK ja Ardian Gjini, nga partia ORA, Ylber Hysa.

Në këtë grup do të marrin pjesë edhe Skender Hyseni, i cili do ta përfaqësojë presidencën, dhe koordinatori Blerim Shala.