Një grup serbësh me të shtëna kanë provokuar dhe shqetësuar banorët joserbë të lagjes "Kodra e Minatorëve"

Një grup serbësh me të shtëna kanë provokuar dhe shqetësuar banorët joserbë të lagjes "Kodra e Minatorëve"

Mitrovicë, 9 nëntor 2005 /TN /QIK - Banorët e lagjes "Kodra e Minatorëve", kanë informuar udhëheqjen e Kuvendit të Komunës në orët e pasditës, se një grup serbësh janë tubuar në lagje dhe gjatë ditës kanë provokuar dhe shqetësuar banorët joserbë që banojnë aty, duke shtënë me armë zjarri dhe duke kënduar këngë shoveniste, për ç'arsye edhe është ndërprerë mësimi i nxënësve shqiptarë në shkollën e lagjes, kurse ambulanca ka ndërprerë punën, sikur që është ndërprerë edhe transporti i mesditës i banorëve shqiptarë prej lagjes për në pjesën jugore të qytetit dhe anasjelltas, ndërkohë që fëmijët dhe banorët janë mbyllur në shtëpitë e tyre.
Po ashtu, përfaqësuesit e lagjes kanë kërkuar nga udhëheqja komunale që të intervenojë tek organet kompetente për siguri, që të ndërmarrin masa të nevojshme për ndërprerjen e të shtënave dhe provokimeve dhe për shtimin e masave të sigurisë për qytetarët që jetojnë aty, në mënyrë që të mos ketë zhvillime që do të përkeqësonin gjendjen edhe më shumë.
Posa është informuar me gjendjen e krijuar, kryetari i Kuvendit të Komunës, Mursel Ibrahimi, ka kontaktuar me zëvendëskomandantin rajonal të policisë në Mitrovicë, nënkolonelin Ergin Mediç, të cilin e ka njoftuar me ankesat e qytetarëve dhe ka kërkuar nga ai që policia të ndërmarrë masa të menjëhershme për parandalimin e incidenteve të mundshme dhe për qetësimin e gjendjes, me qëllim që banorët e lagjes të ndjehen të sigurtë në pronat e tyre.
Pas verifikimit të informatave, zëvendëskomandanti rajonal i policisë, nënkoloneli Mediç, ka konfirmuar se në vendin e ngjarjes ka patur të shtëna armësh dhe se policia ka intervenuar për qetësimin e gjendjes, duke shtuar se aty do të dërgojë forca shtesë të policisë për t'i zbuluar aktorët e të shtënave dhe për të krijuar ambient të sigurtë për të gjithë banorët e "Kodrës së Minatorëve".