Bajram Kosumi takoi zëvendësministrin bullgar të Punëve të Jashtme

Bajram Kosumi takoi zëvendësministrin bullgar të Punëve të Jashtme

Prishtinë, 9 nëntor 2005 /TN /QIK - Kryeministri Bajram Kosumi ka zhvilluar sot një takim me zëvendësministrin e Punëve të Jashtme të Bullgarisë, Lubomir Kjucukov në të cilin diskutuan për zhvillimet aktuale politike në Kosovë dhe rajon dhe për hapësirat dhe mundësitë e mëtejshme të bashkëpunimit ndërmjet Kosovës dhe Bullgarisë.
Duke u ndalur rreth relacioneve midis Kosovës dhe Bullgarisë, me theks të veçantë rreth shtimit të bashkëpunimit ekonomik, kryeministri Kosumi ka theksuar nevojën e liberalizimit të dhënies së vizave për biznesmenët kosovarë, në mënyrë që kjo çështje të mos bëhet faktor frenues në këtë sektor, thuhet në një komunikatë nga ky takim.
Kosumi dhe Kjucukov kanë ndarë të njëjtin mendim se ekzistojnë fusha për zhvillimin e marrëdhënieve të mira midis të dyja vendeve dhe me ato në rajon.

Me këtë rast, Kryeministri është shprehur i inkurajuar për interesimin e biznesmenëve bullgarë për të investuar në Kosovë, duke theksuar se Qeveria e Kosovë është thellë e interesuar për krijimin e një klime dhe infrastrukture sa më të favorshme për të gjithë investitorët e huaj.
Gjatë këtij takimi, Kosumi vlerësoi se Bullgaria mund të japë një kontribut të mëtutjeshëm për Kosovën edhe në kuadër të nismave rajonale e më gjerë.
"Është me interes të madh, tha Kosumi, që Bullgari të ndihmojë në krijimin e një klime bashkëpunimi në rajon, duke e përkrahur Kosovën në veçanti në rrafshin e bashkëpunimit rajonal, meqë krijimi i shtetit të Kosovës duhet të kuptohet si faktor stabiliteti në rajon".



Kosumi bisedoi me përfaqësuesin gjerman në Grupin e Kontaktit

Prishtinë, 9 nëntor 2005 /TN /QIK - Kryeministri i Kosovës Baram Kosumi bisedoi sot në një takim të veçantë me drejtorin politik në Ministrinë e Jashtme të Gjermanisë dhe njëherit përfaqësues në Grupin e Kontaktit, Mihael Shefer.
Në një komunikatë nga ky takim thuhet se Kosumi dhe Shefer kanë biseduar për zhvillimet aktuale politike në Kosovë, për përgatitjet e palës kosovare për negociatat rreth statusit final të Kosovës, respektivisht për mbledhjen e fundit të Grupit të Kontaktit në Uashington dhe për qasjen që do të përfaqësojë në procesin negociues Marti Ahtisari.
Kryeministri Kosumi ka vlerësuar se muajve të fundit ka pasur zhvillime të mëdha dhe pozitive, duke shtuar se pala kosovare ka vetëm një zë për çështjen e statusit final.

Në këtë drejtim, ai ka njohur z. Shefer me vendimin për formimin e Grupit Politik për hartimin e platformës për bisedime për statusin nga delegacioni kosovar, duke bërë të ditur se Delegacioni është pajtuar që komunitetet dhe interesat e tyre të përfaqësohen në grupet dhe mekanizmat e punës së delegacionit kosovar.
Duke u ndalur rreth takimit të fundit të Grupit të Kontaktit në Uashington, kryeministri Kosumi theksoi se Qeveria e Kosovës ka mirëpritur caktimin e parimeve për çështjen e statusit dhe njëkohësisht ka potencuar se uniteti edhe brenda vendeve të Grupit të Kontaktit do të lehtësojë procesin negociues.
Ai ka theksuar se pala kosovare angazhohet për të finalizuar me sukses procesin negociues deri në mesin e vitit 2006 si dhe ka vlerësuar se zgjidhja e statusit final për Kosovën nuk bënë të prolongohet, meqë çështja e definimit të statusit të Kosovës është faktor determinues i zhvillimeve të ardhshme të brendshme dhe ato rajonale.

Kosumi gjithashtu ka theksuar përkushtimin e Qeverisë së Kosovës për të krijuar një ambient të sigurt dhe integrues për të gjitha grupet etnike, në këtë kuadër edhe për minoritetin serb, i cili vazhdon të jetë peng i politikave të vjetra të Beogradit.
Në këtë funksion, ai siguroi diplomatin gjerman se Qeveria e Kosovës është duke u angazhuar në implementimin e standardeve për Kosovën si dhe në hartimin e një dokumenti të ri ?Rruga e Kosovës për në Evropë?, i cili parashikohet të fillojë të implementohet nga janari i vitit të ardhshëm dhe do të jetë bazë për plotësimin e standardeve për integrim evropian.
Nga ana e tij, Shefer ka inkurajuar kryeministrin Kosumi për angazhimet dhe vizionet e tij rreth zhvillimeve aktuale dhe procesit negociues.

Kosumi thekson tri çështje kyçe në të gjithë procesin për statusin e Kosovës

Prishtinë, 9 nëntor 2005 /TN /QIK - Kryeministri i Kosovës Bajram Kosumi ka theksuar tri çështje kyçe në të gjithë procesin për statusin e Kosovës:

Që populli i Kosovës të gëzojë të drejtën për të patur shtetin, për të krijuar demokracinë, për të krijuar prosperitetin ekonomik dhe për të krijuar të ardhmen e vet; që në shtetin e Kosovës të krijohet një mekanizëm i pushtetit funksiona që të evitohet çdo ndikim si dhe krijimi i mekanizmave që e vështirësojnë funksionimin e shtetit të Kosovës; që shteti i Kosovës të ndikojë pozitivisht dhe të krijojë paqen stabilitetin dhe harmoninë me të gjitha shtetet përreth. Këo komenet Kryeministri Kosumi i bëri në një intervistë për radion "Evropa e lirë".

Ndërkaq duke komentuar takimin e djeshëm të Grupit negociator për statusin, Kryeministri i Kosovës tha se në këtë takim "pjesëmarrësit janë pajtuar që në grupin politik do të jenë njerëzit e fuqishëm të partive politike, të cilët janë të aftë për t'i propozuar delegacionit të Kosovës vijat themelore politike dhe të aftë për të ruajtur parimet e programeve politike që do të rezultojnë në dokumentet për statusin final të Kosovës".

Kosumi gjithashtu tha se ky grup ka për detyrë t'i japë delegacionit të Kosovës edhe propozimet për nëngrupet për çështje të tjera. "Jemi marrë që në këto grupe të jenë të përfaqësuar edhe përfaqësuesit e komuniteteve tjera etnike. Ky është hapi i parë i rëndësishëm", tha kryeministri i Kosovës.

Grupi shumë shpejt do t'i propozojë delegacionit të Kosovës platformën për bisedime që pastaj do të miratohet në Kuvendin e Kosovës, tha Kosumi, i cili shtoi se ekziston një konsensus i fuqishëm në mes të të gjithë faktorëve politikë në lidhje me bërjen e shtetit të Kosovës.

Ndërkaq në lidhje me mospajtimet e shprehura më herët, ai tha se ato kanë qenë kryesisht për "çështje teknike", duke shprehur bindjen se ato tashmë janë tejkaluar.

Kryeministri Kosumi ngushëllon familjen e Behxhet Sallahut

Prishtinë, 9 nëntor 2005 /TN /QIK - Me rastin e vdekjes së biznesmenit të njohur shqiptar Behxhet Sallahu, kryeministri Bajram Kosumi i ka dërguar një telegram ngushëllimi familjes Sallahu.

"Behxhet Sallahu ishte një njeri dhe biznesmen i respektuar që gjithë jetën e vet punoi dhe u angazhua për të mirën e familjes dhe bashkëkombësve të tij, duke dhënë një kontribut të çmueshëm edhe për lirinë dhe arsimin shqip në Kosovë dhe të shqiptarëve në Luginën e Preshevës", thotë Kryeministri Kosumi, duke theksuar se Behxhet Sallahu do të kujtohet si njeri që ka ndihmuar edhe shumë individë e familje shqiptare në Kosovë e më gjerë.