Shtefan Lene emërohet përfaqësues i BE-së në bisedimet për Kosovën

Shtefan Lene emërohet përfaqësues i BE-së në bisedimet për Kosovën


Bruksel, 8 nëntor 2005 /TN /QIK - Bashkimi Evropian e ka emëruar z.Shtefan Lene si të dërguar të vet, i cili do të punojë së bashku me të dërguarin e OKB-së në bisedimet ndërmjet autoriteteve të Prishtinës dhe Beogradit për statusin përfundimtar të Kosovës.

Shtefan Lene, këshilltar i Havier Solanës, është i njohur në selinë e BE-së në Bruksel si njëri nga specialistët që ka ndjekur me vite zhvillimet në Ballkan. Lene do t'i raportojë rregullisht Brukselit për ecurinë e bisedimeve.
Havier Solana ka thënë se i dërguari i BE-së do të mbështesë punën e të dërguarit të posaçëm Marti Atisari.

Solana ka theksuar se gjetja e një zgjidhjeje për Kosovën është shumë e rëndësishme për rajonin e Ballkanit dhe vetë BE-në. Ai paralajmëroi se nëse do të ketë dështim në këtë proces, atëherë do të jetë dështim i rëndë edhe për Bashkimin Evropian.


Ministrat e jashtëm të BE-së kanë porositur se integriteti territorial i Kosovës duhet të respektohet në tërësi

Bruksel, 8 nëntor 2005 /TN /QIK - Marti Ahtisari i dërguari i posaçëm i KS të OKB-së, që do të udhëheqë bisedimet për statusin e ardhshëm të Kosovës, i ka njohur dje ministrat e jashtëm të BE-së në Bruksel me modalitetet dhe pikëpamjet e tij rreth mënyrës së zhvillimit të negociatave për të ardhmen e Kosovës, si dhe mbi rolin dhe ndihmën që duhet të lozë BE në këtë proces.

Athisari ka bërë të ditur se së shpejti do të vizitojë Prishtinën dhe Beogradin, si dhe siç është shprehur ai tri vendet fqinje.
Ministri i Jashtëm britanik Xhek Strou, vendi i të cilit kryeson me Bashkimin Evropian, ka deklaruar se Marti Ahtisari ka hezituar që të manipulojë me afatin kohor të tërë procesit, ose ka insistuar që procesi duhet të nisë sa më shpejt që është e mundur.
Këshilli i Ministrave të BE-së i bëri thirrje Prishtinës e Beogradit që të angazhohen me mirëbesim dhe në mënyrë konstruktive në procesin e përcaktimit të statusit të ardhshëm. Të gjitha bashkësitë etnike në Kosovë, duke përfshirë edhe komunitetin serb, duhet të luajnë rolin e tyre në këtë proces, theksohet në konkluzionet e ministrave të jashtëm të BE-së.
Bashkimi Evropian nënvizon se statusi i ardhshëm i Kosovë duhet të jetë plotësisht në përputhje me vlerat dhe normat evropiane, si dhe me kartën e OKB-së në të cilat bëjnë pjesë në mënyrë të patundshme liria e lëvizjes, barazia para ligjit e të gjithë qytetarëve të saj pavarësisht nga përbërja etnike, kthimi në shtëpitë e tyre të të gjithë të shpërngulurëve, si dhe respektimi i diferencave kulturore.
Ministrat e jashtëm të BE-së kanë porositur se integriteti territorial i Kosovës duhet të respektohet në tërësi. Ata kanë porositur se cilado zgjidhje e statusit që mund të rezultojë në ndarjen e Kosovës, apo bashkimin me ndonjë shtet fqinj do të jetë e papranueshme. Ministrat e jashtëm të BE-së kanë nënvizuar se Kosova nuk mund të kthehet më në situatën e para vitit 1999.
Statusi i ardhshëm i Kosovës duhet të nxisë po ashtu afrimin e Beogradit dhe Prishtinës në BE, është theksuar në takimin e ministrave të jashtëm të BE-së në Bruksel.
Sipas ministrave të jashtëm të BE-së statusi i Kosovës duhet të arrihet në atë mënyrë që të jetë i fortë ekonomikisht dhe politikisht dhe të sigurohet se nuk paraqet rrezik ushtarak për fqinjët e Kosovës.