Forumi i Rinisë i LDK-së mbajti Kuvendin zgjedhor - kryetar i ri u zjodh Sejdë Tolaj

Forumi i Rinisë i LDK-së mbajti Kuvendin zgjedhor - kryetar i ri u zjodh Sejdë Tolaj

Prishtinë, 7 nëntor 2005 /TN /QIK - Forumi i Rinisë i Lidhjes Demokratike të Kosovës dje mbajti Kuvendin VI zgjedhor. Me 190 vota FR zgjodhi kryetarin e ri Sejdë Tolajn, kundrejt kundërkandidatit Armend Zemaj, i cili mori 171 vota, kurse kandidati i tretë, Florian Dushi, arriti vetëm 31 vota.
Kryetari i ri i FR të LDK-së, Sejdë Tolaj, i cili do ta udhëheqë këtë forum për dy vjet, tha se të jesh kryetar i FR të LDK-së është nder dhe përgjegjësi. "Është nder për shkak se ke fituar mbështetjen dhe besimin e pjesës më të madhe të rinisë së Kosovës. Përgjegjësi, per shkak të autoritetit që FR dhe LDK-ja ka në mesin e Kosovës dhe në opinionin ndërkombëtar", tha Tolaj.
Sipas tij, përgjegjësia shtohet edhe më shumë tash kur LDK-ja si forcë kryesore politike është duke kurorëzuar me sukses përpjekjet dhe aspiratat shekullore të popullit të Kosovës me pavarësinë e saj. "Të gjithë ne që jemi anëtarë të LDK-së që nga themelimi e edhe të tjerët që na u kanë bashkuar më vonë e kanë të njohur faktin se jemi angazhuar për një qëllim të vetëm ta bëjmë Kosovën shtet të pavarur dhe demokratik", - theksoi kryetari i ri i Forumit të Rinisë së LDK-së Sejdë Tolaj.
Kryetari i deritanishëm i FR të LDK-së, Lulzim Zenelaj tha në referatin e tij për punën dyvjeçare të këtij forumi se fryma e tolerancës, mirëkuptimit dhe konkurrencës kanë qenë elementet kryesore të Kuvendeve zgjedhore në të gjitha strukturat dhe kjo ka dëshmuar edhe njëherë bindshëm se të rinjtë e LDK-së janë forca më vitale e më kreative e LDK-së. Ndërkaq për aktivitetin 15 vjeçar të FR, Zeneli u shpreh:
"FR për më shumë se 15 vjet u bë zë i fuqishëm dhe artikulues i kërkesave e politikave të brezit të ri, u bë komponentë e fuqishme e LDK-së në rrugën e jetësimit të pavarësisë dhe demokracisë së Kosovës", theksoi Zeneli.
Ai më tej tha se më shumë se kurrë më parë FR ka arritur të rigjenerojë energjinë e kuadrit të saj, të sjell frymë dhe potencial në koherencë të plotë me nevojën që shtrojnë proceset në vend, duke qenë gjithmonë në shërbim të politikave shtetërore e nacionale të udhëhequra nga Presidenti i Kosovës, lbrahim Rugova.
Zeneli shprehu besimin se FR ka potencial të mjaftueshëm që t'i çojë proceset përpara, të vazhdojë rrugën drejt reformave dhe mobilizimit të gjithanshëm që ka nisur shumë vjet më parë. Nga të rinjtë, tha ai, kërkohet shumë punë dhe angazhim në përmbushjen e obligimeve që dalin nga mandati që kanë marrë, sepse Kosova sot ka hyrë në finalen e pavarësisë së saj, tha Lulzim Zeneli.
Duke përshëndetur Kuvendin e FR të LDK-së, nënkryetari i LDK-së, Kolë Berisha tha: "Nëse në jetën time pos atdheut dhe kombit duhet t'i përulem dikujt tjetër ajo është rinia.

Rinia ka luajtur rolin shpeshherë vendimtar gjatë historisë sonë të përgjakur kombëtare, e veçanërisht në dekadën e fundit të shekullit të kaluar". Ai më tej tha se FR ishte dhe do të jetë "krahu i djathtë, forca e pamposhtur, njëri ndër mekanizmat më të fuqishëm të LDK-së, të udhëhequr nga kryetari i saj aktual dhe historik, shpirtëror dhe fizik, lbrahim Rugova".
"Nga ne kërkohet më shumë punë dhe veprime të pjekura. Kosova pra e ka fituar lirinë dhe shumë shpejt do ta finalizojë dhe institucionalizojë edhe procesin e pavarësisë së saj", u shpreh z. Berisha. Ndërkaq kryetari i Kuvendit të Kosovës, Nexhat Daci, duke porositur rininë e Kosovës tha se "tërësia është më e madhe se shuma e pjesëve".
"Unë mendoj se baza e kësaj tërësie është rinia, është FR i LDK-së. Moto imja për këta 15 vjet në LDK, është që LDK-ja i është shtëpi e madhe, e qetë, ishte shtëpi me vizion, dhe mbetet shtëpi e porosive të mira që qetësia e kësaj shtëpie të mos shkatërrohet", Daci. Por ai pati porosi edhe për pjesën më të vjetër të LDK-së, duke thënë:

"Nuk është në shpirtin themeltar të LDK-së që të bëj diferencime, nuk është në i shpirtin e LDK-së që të krijohen grupacione për ta rrënuar LDK-në. Jam i bindur që truri i LDK-së i prire nga udhëheqësi i saj vizionar Presidenti Rugova shumë shpejt do të ndërhyjë dhe LDK-së do t'i kthehet qetësia vepruese, LDK-së do t'i kthehet mjedisi veprues, progresiv, prandaj porosia ime është për Vushtrrinë, Gjakovën, Ferizajn dhe për shumë qendra të tjera që të kthehen në programin themeltar të LDK-së".
Ministrja e Shërbimeve Publike, Melihate Tërmkolli, tha se Forumi i Rinisë i LDK-së ishte dhe do të mbetet shtyllë shumë e fuqishme e LDK-së dhe bashkë me Forumit të Gruas do të mbeten jo vetëm shtyllë, por promotor e zhvillimit të proceseve edhe brenda LDK-së dhe proceseve të përgjithshme në Kosovë.
Ndërkaq Ismet Beqiri në emër të asociacionit të komunave të Kosovës tha se "me një forum çfarë ka LDK-ja, me një rini çfarë kemi në përgjithësi jemi ata të cilët për shumë vjet do ta udhëheqim me sukses Kosovën, falë punës dhe angazhimit tuaj shumëvjeçar, sepse kemi pasur vizione të qarta". Kryetari i porsazgjedhur, Sejdë Tolaj, propozoi që mandati i kryetarit të Forumit të Rinisë të zgjatet deri në moshën 35 vjeç të mandatarit, mirëpo Kuvendi këtë "propozim" e hodhi poshtë.