Mark Krasniqi tha se në këtë moment historik duhet harruar të gjitha mospajtimet dhe kundërshtitë

Mark Krasniqi tha se në këtë moment historik duhet harruar të gjitha mospajtimet dhe kundërshtitë

Prishtinë, 4 nëntor 2005 /TN /QIK - Partia Shqiptare Demokristiane e Kosovës, sot me rastin e shënimit të 15 vjetorit të themelimit të saj, ka premtuar se do të vazhdojë punën dhe përpjekjet e saj për bërjen e shtetit të Kosovës.
Kryesia e PSHDK-së, ia ndau çmimin "Gjergj Kastrioti –Skënderbeu, Presidentit të Kosovës, Ibrahim Rugova, Kryeministrit të Shqipërisë, Sali Berisha dhe akademik Mark Krasniqit, në shenjë respekti dhe mirënjohje për punën dhe angazhimin e veçantë për çështjen e Kosovës.
Kryetari i Partisë Shqiptare Demokristiane të Kosovës, akad.Mark Krasniqi, tha se në këtë moment historik që po e kalon Kosova, duhet harruar të gjitha mospajtimet dhe kundërshtitë, dhe gjithsesi edhe lakmitë për pushtet, në favor të unitet të përgjithshëm të shqiptarëve në Kosovë.
"Duhet të jemi unikë në qëndrimet dhe veprimet tona. T'i lëmë anash mospajtimet partiake, grindjet e kundërshtimet, interesat individuale, lakmitë për pushtet dhe të bashkohemi rreth interesit madhor të popullit, për të krijuar Kosovën shtet të pavarur e sovran.

Do të kemi rast pastaj të bëjmë gara paqësore e demokratike për pushtet, sepse sot ende nuk e kemi shtetin, as pushtetin e plotë", porositi akad.Krasniqi, në fjalën e tij dhe shtoi:
"Tash, në këtë kohë, lufta për pushtet, kur nuk kemi shtet, është iracionale dhe shumë e dëmshme për fatin e Kosovës. Gjithashtu grevat, demonstratat dhe çdo veprime tjera publike legale, ose ilegale, e destabilizojnë situatën tonë politike, ekonomike, arsimore, kulturore etj. Të gjitha këto çojnë ujë në mullirin e armikut të pavarësisë së Kosovës", tha ai.
Ai bëri thirrje për respekt më të madhë për institucionet e Kosovës, me qëllim që faktori ndërkombëtar, të bindet që Kosova ka një popull të disiplinuar, të qytetëruar, demokrat dhe të gatshëm për të krijuar shtetin e tij. Ai tha se shtetin tonë duhet ta krijojmë pa biseduar për këtë çështje me Serbinë.

Mark Krasniqi, në kontekst të zhvillimeve të brendshme tha se zgjidhja e çështjes së Kosovës nuk duhet të zvarritet shumë me formime të grupeve e komisioneve e forma të tjera burokratike.

Sa i përket tolerancës, akad.Krasniqi, rikujtoi se shqiptarët i kanë ruajtur dhe mbrojtur edhe kishat ortodokse në Kosovë gjatë 500 vjetve të sundimit të Turqisë në Ballkan, "të cilat janë ndërtuar në kohën e sundimit të Bizantit në këto vise, kur këtu ende nuk ka pasur fare popullsi serbe".
Ai tha se faktori ndërkombëtar duhet ta ketë parasysh kontributin e madh të popullit shqiptar për kulturën perëndimore, veçanërisht kur kryetrimi shqiptar, Gjergj Kastrioti – Skënderbeu, në shekullin 15, me luftën e tij heroike, "gjatë 25 vjetëve e ndali në truallin shqiptar agresorin aziatik", tha Krasniqi, duke e rikujtuar faktorin ndërkombëtar të vendosjes edhe për veprën madhore humanitare të nobelistës së parë shqiptare, Nënë Terezes.
"Gjatë këtyre 15 vjetve PSHDK ka ndjekë rrugën e gjatë e të vështirë drejt pavarësisë së Kosovës krahpërkrah me Lidhjen Demokratike të Dr.Ibrahim Rugovës".
"Kosova shtet i lirë sovran e demokratik, pa kantone e pa enklava, me kufij të pacenueshëm, është e drejtë e pakontestueshme e popullit shumicë të saj, të cilit askush nuk mund t'ia marrë të drejtën legjitime të vetëvendosjes", bëri thirrje akad.Krasniqi, kryetar i kësaj partie që nga themelimi.
Kryekuvendari Nexhat Daci në përshëndetje të këtij tubimi, tha se PSHDK-ja, ishte ndër të parat që barti barren shumë të vështirë të kohës së okupimit dhe të çlirimit.
Kryeministri Bajram Kosumi tha se ne jemi, "padyshim brezi më krenar që kemi mundësi ta realizojmë ëndërrën tone shekullore për shtet të pavarur e sovran të Kosovës".
Nënkryetari i LDK-së, Kolë Berisha, akad.Krasniqit dhe PSHDK-së i ka përcjellur urimet e përzemërta të LDK-së dhe të Presidentit të Kosovës dr.Ibrahim Rugova. "Keni falënderimin e sinqertë të LDK-së që për këto 15 vjet, jo vetëm nuk u shmangët, por ishit krahu i djathtë i lëvizjes gjithëpopullore, ishit, në vijën e parë të frontit, dhe për asnjë moment nuk u luhatët", tha z.Berisha.
Në emër të diasporës shqiptare PSHDK-në e uroi Gani Azemi, i cili tha se diaspora shqiptare ka përkrahur gjithmonë dhe do të përkrahë edhe në të ardhmen parezervë institucionet e Kosovës të zgjedhura nga vota e popullit.
Edhe Bujar Bukoshi, e ka përshëndetur këtë përvjetor, por është detyruar ta ndërpresë fjalën pas reagimit të pjesëmarrësve.