Petersen takon sot anëtarët e Grupit të Kontaktit

Petersen takon sot anëtarët e Grupit të Kontaktit

Prishtinë, 2 nëntor 2005 /TN /QIK - PSSP-ja Soren Jessen Petersen, sonte do të darkojë në Uashington me anëtarët e Grupit të Kontaktit, ndërsa do të ketë takime të veçanta me disa nga anëtarët e Grupit, bëri të ditur sot Neraj Sing, zëdhënës i UNMIK-ut.

Ai poashtu njoftoi se Kryeadministratori Petersen dje është takuar me z.Nikolas Bërns, nënsekretar i Shtetit, me Daniel Flit etj, si dhe një takim të veçantë ka pasur me Daniel Server, drejtor i Institutit të Paqes me seli në Uashington, me të cilin ka diskutuar për prioritet në bisedimet për statusin e Kosovës.
Singh, tha se nuk ka pse të komentohen komunikatat apo a:mailat që po bëhen në emër të grupeve të armatosura, por ai tha se pavarësisht nga këto, "mos pritni që çështja e statusit do të zgjidhet në rrugë, e as në mënyrë unilaterale".
"Pra, për statusin nuk do të vendoset as në Prishtinë, as në Beograd, por në procesin e bashkëpunimit dhe dialogut me bashkësinë ndërkombëtare", u shpreh Sing, i cili pranoi se edhe në adresë të UNMIK-ut janë pranuar komunikata të atilla.
Sing po ashtu ka rikonfirmuar se UNMIK-u nuk ka rol substancial në bisedimet për çështjen e Kosovës, ndërsa do të përkrahë arritjen e konsensusit nga lidershipi i Kosovës, pa ndërhyrë në dinamikën e brendshme të Grupit Negociator. Por, ai ritheksoi ato që ka thënë Petersen, se nuk ka shumë kohë aktualisht kur duhet bërë shumë punë.
Sa i përket të dënuarit të një nëpunësi të lartë të UNHCR-së, Rashid Kan, për abuzim seksul, Sing tha se ende është duke vazhduar procesi gjyqësor, dhe se nuk dihet ku do ta vuajë dënimin.

Për këtë, tha ai ekzistojnë dy mundësi, njëra që ta vuajë në Kosovë, pra në vendi ku ka kryer krimin dhe tjetra në vendin e tij.
Në aeroportin e Prishtinës është hapur për herë të parë një Free Shop, u bë e ditur poashtu sot, në takimin e rregulltë me gazetarë të KFOR-it, UNMIK-ut, OSBE-së dhe BE-së.