Xhon Halsman: Pala serbe nuk do të mund të pengojë pavarësinë e Kosovës

Xhon Halsman: Pala serbe nuk do të mund të pengojë pavarësinë e Kosovës

Uashington, 1 nëntor - "Pala serbe nuk do të mund të pengojë pavarësinë e Kosovës, sepse të gjithë e dinë se shqiptarët e Kosovës kurrë do të kthehen nën administratën e Serbisë", thotë eksperti amerikan Xhon Holsman.

Ndërkaq në lidhje me bisedimet për statusin e Kosovës, ai tha se ka qenë e domosdoshme që të nisin negociatat për statusin, sepse shtyrja e zgjidhjes se kësaj çështjeje do të mund të rrezikonte misionin paqësor të KFOR-t, në të cilin marrin pjesë edhe trupat amerikane, thotë eksperti amerikan Xhon Halsman (John Hulsman) nga fondacioni Heritixh (Hetitage).

"Amerikanët kanë konkluduar se shtyrja e mëtejshme mund të bëhet e rrezikshme sepse shqiptarët e Kosovës mund të thonë se Amerika është bërë pengesë kryesore në arrijtjen e pavarësisë. Amerikanët që deri më tani janë konsideruar çlirimtarë, mund të bëhen objekt i pakënaqësisë...

Duke marrë parasysh përkeqësimin e mundshëm të situatës së mëtejshme, administrata (amerikane) ka vendosur që t'i përkushtohet aktivisht zgjidhjes së statusit të Kosovës", është shprehur Halsman për "Zërin e Amerikës".
Duke komentuar qëndrimet e kundërta rreth statusit final të Kosovës, Halsman thotë se kur negociohet, është e qartë se asnjëra palë nuk mund të kërkojë plotësimin e të gjitha kërkesave të veta dhe se negociatat janë fryt i kompromisit.

"Pala serbe nuk do të mund të pengojë pavarësinë e Kosovës, sepse të gjithë e dinë se shqiptarët e Kosovës kurrë do të kthehen nën administratën e Serbisë", thotë Halsman. Por sipas tij, pala serbe mund të sigurojë mbrojtjen e serbëve, kantonizimin dhe decentralizimin e Kosovës dhe mbrojtjen e objekteve të saja fetare.

"Pala serbe mund të sigurojë që pavarësia e Kosovës të jetë e kushtëzuar me plotësimin e të gjithave që u përmendën më sipër, përkatësisht palës shqiptare i takon që të zbatojë të gjitha masat e përmendura, nëse don që të realizohet sovraniteti".
Ky ekspert thotë se amerikanët me aktivitetin e tyre mund të ndihmojnë që gjërat të lëvizin në drejtimin e duhur, por shton se me rëndësi është që Amerika të mos diktojë zgjidhjen, sepse sipas tij, diktati nuk jep rezultate të drejta.
Pasi shpjegon se si mund të ndikojë Amerika mbi Prishtinën dhe Beogradin, Halsman zbulon se bisedimet e tilla ka kohë që po zhvillohen, ndërkohë që edhe ai personalisht është i angazhuar në mënyrë shumë direkte në bisedimet me liderët e të dy palëve. "Ata nuk janë njerëz pa njohuri, u është e njohur se çfarë ujdie është e mundshme. Bisedimet tani duhet të nisin në drejtim të arritjes së qëllimeve të shtruara", shprehet Halsman.
Ai thotë se aktualisht dëgjohen kërkesa maksimaliste, mirëpo sipas tij, duhet biseduar lidhur me atë se si do të duket Kosova e ardhshme e pavarur, duke caktuar afate.
Por Halsman konsideron se problem më i madh është si të harmonizohen qëndrimet e evropianëve dhe të Amerikës. Evropianët, thotë ai, do të donin që çështjën e Kosovës ta shtyjnë edhe më tutje, ndërkaq amerikanët thonë se këtë problem duhet zjgidhur menjeherë, shprehet Holsman.


Bërns drejton SHBA në bisedimet për Kosovën

Uashington, 1 nëntor - Nënsekretari amerikan i Shtetit, Nikolas Bërns do të përfaqësojë Shtetet e Bashkuara në bisedimet për të ardhmen e statusit të Kosovës, njofton BBC.
Këtë e bëri të ditur zyra e shtypit e Departamentit amerikan të Shtetit në prag të takimit të Grupit të Kontaktit në Uashington.
Grupi i Kontaktit që përbëhet nga SHBA, Britania e Madhe, Franca, Italia, Gjermania dhe Rusia, takohet të mërkurën.
Muajin e kaluar, Bërns vizitoi Prishtinën dhe pas takimeve me zyrtarë të lartë të Kosovës dhe me shefin e misionit të OKB-së, Soren Petersen deklaroi se qëndrimi i administratës amerikane është se në Kosovë nuk duhet të vazhdojë status quo-ja dhe se njerëzit ne Kosovë duhet të përcaktojnë të ardhmen e tyre.