Presidenti i Kosovës dënon gjuhën esktreme të urrejtjes të Presidentit iranian ndaj Izraelit

Presidenti i Kosovës dënon gjuhën esktreme të urrejtjes të Presidentit iranian ndaj Izraelit

Prishtinë, 1 nëntor 2005 /TN /QIK - Presidenti i Kosovës Ibrahim Rugova dënon fuqishëm gjuhën esktreme të urrejtjes ndaj Izraelit që përdori Presidenti iranian, Mahmud Ahmadinexhad, javën që shkoi, kur kërkoi "fshirjen nga harta" të Izraelit.
"Gjuha që ka përdorur Presidenti iranian është thellësisht antinjerëzore dhe në kundërshtim të plotë me rregullat ndërkombëtare.
Bota demokratike kaherë ka hequr dorë nga logjika e fshirjes nga faqja e dheut e kombeve të caktuara.
Jemi të ndjeshëm posaçërisht ne, shqiptarët e Kosovës, sepse gjatë shekullit të kaluar ne vetë kemi qenë në shënjestër të kërkesave dhe veprimeve për të na fshirë nga faqja e dheut", - thuhet në këtë deklaratë të Presdentit të Kosovës, të lëshuar nga i zëdhënësi i tij Muhamet Hamiti.

Qeveria e Kosovës dënon deklaratën e Presidentit iranian kundër shtetit të Izraelit

Prishtinë, 1 nëntor 2005 /TN /QIK - Deklarata e Presidentit iranian Mahmud Ahmadinexhad që Izraeli duhet të eliminohet nga harta janë në kundërshtim me paqen, mirëqenien dhe prosperitetin e popujve. Deklaratat e tilla luftënxitëse janë papranueshme për Qeverinë dhe popullin e Kosovës.

Në kohën kur e tërë bashkësia ndërkombëtare është angazhuar për një politikë të bashkëpunimit e jo të urrejtjes, deklarimet provokuese për zhdukjen e shteteve dëmtojnë në thelb mirëbesimin midis popujve dhe procesin e paqes.
Qeveria e Kosovës i bashkohet qëndrimeve të Kombeve të Bashkuara në dënimin e vendosur të deklaratës së presidentit të Iranit Ahmadinejad për shkatërrimin e Izraelit.