Në takimin e Romës u vërejtjen dallime të mëdha ndërmjet Prishtinës dhe Beogradit lidhur me statusin e Kosovës

Në takimin e Romës u vërejtjen dallime të mëdha ndërmjet Prishtinës dhe Beogradit lidhur me statusin e Kosovës

Romë, 31 tetor 2005 /TN /QIK - Në konferencën ndërkombëtare të organizuar nga Asambleja Parlamentare në Romë mbizotëruan diskutimet për statusin, megjithë që konferenca ishte organizuar për diskutimin e procesit të decentralizimit në Kosovë. Edhe kësaj radhe u vërejtjen dallime të mëdha dhe diametralisht të kundërta ndërmjet Prishtinës e Beogradit, lidhur me statusin e Kosovës.
Zyrtarët nga Beogradi që përfaqësonin Qeverinë e Serbisë, por edhe përfaqësues serbë të Kosovës u shprehën kategorikisht kundër pavarësisë së Kosovës si opcion. Deputeti i Kuvendit të Kosovës Oliver Ivanoviq tha në konferencë se në rast të pavarësisë së Kosovës jo vetëm që nuk do të ketë kthim të serbëve, por edhe ata që kanë mbetur do të largohen nga Kosova.

Shefja e Zyrës së Qeverisë së Serbisë për Kosovën Sandra Rashkoviq - Iviq ka thënë se shqiptarëve mund t'u ofrohet gjithëçka më shumë se autonomi e më pak se pavarësi, por Kosova nuk bënë të ketë ulëse në OKB e as ministri të jashtme e të mbrojtjes. Madje këshilltari i kryeministri serb Aleksandër Simiq ka thënë se asnjë lloj pavarësie për Kosovën, as e kushtëzuar e as e pakushtëzuar nuk eshtë e pranueshme, sepse sipas tij kjo do të thoshte shkelje të së drejtës ndërkombëtare.
Pjesëmarrësit kosovarë nga ana tjetër në takimin e Romës thonin se janë të gatshëm që të afrojnë garanci për serbët e Kosovës, përfshirë edhe pjesëmarrjen dispropocionale të tyre në institucionet kosovare. Ata kanë theksuar se nuk kanë frikë madje as nga krijimi i komunave me shumicë serbe në Kosovë, porse nuk do të lejojnë që nëpërmjet decentralizimit të krijohet mundësia që Beogradi të kontrollojë edhe në të ardhmen pjesë të territorit të Kosovës.
Shqiptarët dhe serbët në këtë konferencë nuk u pajtuan madje rreth asaj se sa serbë ka patur në Kosovë, sa ka dhe sa duhet të kthehen. Relaksuese në këtë konferencë ishte vetëm fjalia e komandantit të misionit të NATO-s në Kosovë, gjeneralit italian, Xhuzepe Valoto, i cili tha se Kosova është e gatshme që në mënyrë paqësore të përballet me këtë proces të vështirë politik dhe se NATO-ja garanton rrethana të sigurta për vazhdimin e procesit.
Shumë deputetë të Asamblesë parlamentare nga vende të ndryshme të NATO-s thanë se Kosova tashmë është bërë një testim i madh për bashkësinë ndërkombëtare, për BE-në dhe NATO-n, por edhe për raportet transatlantike.