Asamblistët e Gjakovës kanë bërë gabim të madh me Aqif Shehun

OPINIONE

Asamblistët e Gjakovës kanë bërë gabim të madh me Aqif Shehun

30 tetor 2005 /TN

Ata që vepruan kaq keq ndaj Aqif Shehut, duhet ta vënë gishtin në kokë e të mendojnë mirë se çfarë gabimi kanë bërë. Dhe, pasi ta bëjnë këtë, ta përmirësojnë atë. Ata që e shkarkuan Aqif Shehun, kurrsesi nuk duhet t'ia lejojnë vetes këtë mëkat që e kanë bërë. Se njerëzit, si Aqif Shehu, janë pesha të rënda kombëtare. Ndaj tyre, të gjithë duhet të kemi kujdes se si sillemi. Se, në fund të fundit, nuk i koritim ata. Por, vetëm veten...

Nazmi Lukaj

Ditë më parë, asambleja komunale e Gjakovës vendosi ta shkarkojë Aqif Shehun nga posti i kreut komunal, edhe pse përfaqësuesit ndërkombëtarë të pranishëm atë ditë në sallë ishin kundër procedimit të shkarkimit të tij. Vetë mënyra e shkarkimit dëshmon se ndaj Aqifit ishte përgatitur një kurth qysh më parë. Ata që e përgatitën këtë kurth, nuk menduan fare se a i dëmtohet imazhi LDK-së a jo. Vepruan sikur Aqif Shehu të ishte një leckë, e jo një njeri që tërë jetën ia kushtoi çështjes kombëtare.

Ata e hoqën një njeri, që me aktivitetin e tij, i ka dhënë vulë të pashlyeshme historisë së re të Gjakovës. Se Aqif Shehu ishte kudo. Para luftës, organizoi tubime shkencore, regjistroi të gjitha maltretimet që i bëri Serbia në Gjakovë e ia dërgoi Këshillit për Mbrojtjen e të Drejatave të Njeriut dhe mori pjesë në të gjitha organizimet politike kombëtare në këtë qytet rrëzë Çabratit.

Aqif Shehu, në ato rrethana të vështira, kur plasi lufta, depërtoi në të gjitha zonat e Kosovës, për t'u ndihmuar familjeve që humbën bijtë e vet. Aqif Shehu, me duart e tij, varrosi shumë dëshmorë e martirë anëmbanë Kosovës. Kurrnjëherë nuk u ndal në punën e tij kombëtare. Pas luftës, me guximin e tij bëri që LDK-ja të mbetej partia më e madhe në qytet, edhe pse ishte i kërcënuar nga bandat mafioze, të cilat, për ta ndalur punën e tij, ia plagosën djalin dhe ia shqetësuan të shoqen.

Në rrethanat e pasluftës, deri sa shumë nga ata që e kanë shkarkuar Aqifin, fshiheshin pas krahëve të tij, ky punoi me tërë qenien që LDK-ja të jetë ajo që është sot. Derisa shumë sish sot që e kanë shkarkuar Aqifin nuk dukeshin kund para luftës, Aqifi, përmes flakës së saj, depërtoi kudo në Kosovë, për t'i dhënë krah popullit. Dhe, tash, dikujt i teket ta shkarkojë nga posti i kryetarit të komunës, një vit pa i skaduar afati, duke i sjellë dhimbje në shpirt, dhimbje kjo që pasqyrohej në shpirtin e tij, tek fliste për puçin që i ishte organizuar.

Këtë puç nuk e meritoi Aqif Shehu, njeriu që bëri shumë për Gjakovën, për popullatën e saj, për të cilën flet me pietet. "Nderimi që ma bën ajo, më ka mbetur ngushëllimi i vetëm pas atij puçi të padrejtë që m'u bë", ishin fjalët me të cilat përpiqej ta ndrydhte dufin, që i ishte mbledhur në shpirt, një ditë pasi e kishin shkarkuar, kur me kolegun Gani Tërshnjaku shkuam që ta intervistonin. "Kam vetëm një banesë, që e paguaj me kiste nga paga ime mujore.

Tjetër pasuri pas shpirtit nuk kam",disa herë i ripërsëriti këto fjalë në zyrën e tij, që e kishte stolisur me flamurin shqiptar dhe amerikan, me foton e presidentit Rugova, të ish-kryetarit amerikan, Bill Klinton, ish-sekretares Medlin Ollbrajt, të Ahmet Zogut e të figurave të tjera kombëtare. E, në tavolinën ku po bisedonim, kishte vënë qeleshen e bardhë shqiptare, për të treguar krenarinë e tij për kombin e vet, para delegacioneve të huaja. "

Më vjen keq nga shoqja ime, që sot lëngon nga kanceri. Nuk kam mundur t'i ndihmoj nga angazhimet e mia të përditshme. Shtatë ditë pushim i kam shfrytëzuar gjatë gjithë kohës, si kryetar i komunës", shprehet me lëvizje duarsh, që i dridheshin nga nervoza. " Dikush deshi të ma humbë krejt mundim tim. Krejt kontributin kombëtar timin, për t'i kënaqur apetitet e ndonjë klani", shfrynte dhimbjen, që iu kishte bërë si gëlqamë në fyt.

Të njëjtën dhimbje e ndjeja edhe unë. Se njerëzit, si Aqif Shehu, që ka bërë aq shumë për kombin e vet, nuk e meritojnë t'u organizohen kurthe. Nuk e meritojnë të linçohen në këtë mënyrë. Ata që e kanë planifikuar linçimin e tij, kanë gabuar shumë rëndë. Tepër rëndë. Dhe e kanë koritur veten para Gjakovës, që i do bijtë e vet, që i kanë dalë zot me krejt qenien e tyre, siç bëri edhe Aqif Shehu.

Ata që e menduan këtë linç të tijin, kanë gabuar shumë rëndë. Se njerëzit atdhetarë, si Aqif Shehu, për kurrfarë klani, nuk duhet t'u sillet dhimbje. Nuk duhet të vihen në pozita zhgënjimi. Se ia lënë vetes një hije të keqe. Prandaj, ata që vepruan kaq keq ndaj Aqif Shehut, duhet t'ia vënë gishtin kokës e të mendojnë mirë se çfarë gabimi kanë bërë. Dhe, pasi ta bëjnë këtë, ta përmirësojnë atë.

Ata që e shkarkuan Aqif Shehun, kurrsesi nuk duhet t'ia lejojnë vetes këtë mëkat që e kanë bërë. Se njerëzit, si Aqif Shehu, janë pesha të rënda kombëtare. Ndaj tyre, të gjithë duhet të kemi kujdes se si sillemi. Se, në fund të fundit, nuk i koritim ata. Por, vetëm veten...