Presidenti Rugova me Grupin Negociator: grupet punuese nuk mund të jenë jashtinstitucionale

Presidenti Rugova me Grupin Negociator: grupet punuese nuk mund të jenë jashtinstitucionale

Prishtinë, 28 tetor 2005 /TN /QIK - Presidenti i Kosovës Ibrahim Rugova pas takimit të sotëm me anëtarët e Grupit Negociator tha se grupet punuese nuk mund të jenë jashtinstitucionale dhe se ato do të krijohen në mbledhjen e radhës.

Presidenti Rugova njoftoi se takimi i sotëm ishte një vazhdimësi e punës së "delegacionit shtetëror të Kosovës - delegacionit për pavarësinë", të cilin e vlerësoi konstruktiv. Ai tha se është biseduar për grupet punuese, për strukturën e të cilave kishte disa propozime.
"Në mbledhjen e ardhshme brenda disa ditësh do të bëjmë aprovimin e grupeve punuese, si dhe të çështjeve dhe të dokumenteve të tjera", tha Presidenti Rugova.
Si duket brenda grupit ka pasë tendencë për anashkalimin e parimit të Deklaratës Presidenciale të miratuar nga Kuvendi i Kosovës për strukturën e grupeve punuese.
"Kishte edhe propozime të tjera, por grupet nuk mund të jenë jashtinstitucionale, pra ato duhet të jenë institucionale. Kuvendi e ka miratuar Deklaratën time, dhe natyrisht do të ketë ekspertë të fushave të ndryshme sipas partive politike, sipas grupeve, sipas interesave, dhe siç e dini edhe ekspertë ndërkombëtarë, miq tanë që do të na ndihmojnë", theksoi Presidenti Rugova.
Ndërsa, kryeparlamentari Nexhat Daci, në mbështetje të idesë së Presidentit Rugova tha se grupet punuese duhet të jenë "bërthama institucionale, në të cilën bëjnë pjesë pozita dhe opozita, dhe ekspertë ndërkombëtarë". Ai kërkoi që propozimi i Presidentit "duhet të respektohet në plotëni dhe të tregohet seriozitet i mendimit dhe i veprimit".
Daci tha se Presidenti Rugova, në emër të Delegacionit të Kosovës do t'i drejtohet me një letër Grupit të Kontaktit, që do të takohet në Uashington, për përparimet e deritashme dhe deri në mbledhjen e ardhshme. Në takim, shtoi ai, janë shpërndarë detyrat, të cilat do të fillojnë menjëherë të operacionalizohen nga ndihmësit e anëtarëve të grupit apo edhe nga vet anëtarët. Ndryshe takimin e sotëm Daci e vlerësoi "një takim shumë të mirë pune".
Kryetari i PDK-së Hashim Thaçi, tha se ka përsëritur kërkesën e tij për miratimin e një rezolute për rikonfirmimin e vullnetit të popullit të Kosovës për shtet sovran e të pavarur, nga Kuvendi i Kosovës. Ai tha se do të ishte në interes që aktiviteti përfundimtar për statusin poltik, t'i bartet Kuvendit të Kosovës, dhe të gjitha vendimet e Grupit të konfirmohen nga Kuvendi.

Ai po ashtu ka kërkuar nxjerrjen e një rregulloreje të punës për Grupin Negociator, dhe sipas tij ky grup do të duhej të kalonte në ekip konsultativ, ndërsa Kuvendi i Kosovës "të jetë ekip vendimarrëse", apo për statusin politik të deklarohen vetë qytetarët.
Ky ekip si më i fuqishmi politik kosovar, t'i drejtohet autoriteteve të UNMIK-ut, KFOR-it, dhe përfaqësive ndërkombëtare si dhe vetë Grupit të Kontaktit dhe Këshillit të Sigurimit, për amnistimin dhe lirimin, sipas tij të të "burgosurve politikë", për të cilët tha se janë çlirimtarë, për shkak se ata "janë të pafajshëm".
Ndërsa, kryetari i Ora-s Veton Surroi, shprehu dëshirën që Grupi të kishte një shpejtësi më të madhe pune, ndërsa si nevojë tha se ka evidentuar krijimin e një grupi për përgatitjen e një platforme për bisedime, e cila më pas do të duhej të miratohej në Kuvend. Ai e ka parë të nevojshme që të konsultohen me komunitete, që sipas tij nevojitet edhe krijimi i një "këshilli konsultativ".
Presidenti Rugova ka paralajmëruar mundësinë që delegacioni të mbajë takime pa gazetarë, duke pasur nevojën e besueshmërisë për shkak të dokumenteve shtetërore etj.