Presidenti Rugova: Ndërtimi i autostradës Prishtinë-Durrës tregon se ne jemi të aftë të bëjmë dhe mbajmë shtet

Presidenti Rugova: Ndërtimi i autostradës Prishtinë-Durrës tregon se ne jemi të aftë të bëjmë dhe mbajmë shtet

Prishtinë, 27 tetor 2005 /TN /QIK - Presidenti i Kosovës, Ibrahim Rugova, tha sot se ndërtimi i autostradës Prishtinë-Durrës tregon se "ne jemi të aftë të bëjmë dhe mbajmë shtet, dhe se e meritojmë pavarësinë".
Presidenti Rugova këtë koment e bëri pasi përgëzoi ekspertët që kanë përfunduar hartimin e projektit zbatues të autostradës Merdare-Vërmicë, e cila është pjesë e vijës Prishtinë-Durrës.

Presidentit projektin ia kanë prezantuar firma gjermane Bpi-CONSULT, fituese e tenderit për projektin e autostradës Vërmicë-Merdare, udhëheqësit e së cilës shoqëroheshin nga ministri i Transportit dhe Postë-Telekomunikacionit, Qemajl Ahmeti.

Presidenti Rugova, hartimin e projektit, e vlerësoi si hap të madh për ndërtimin e autostradës Prishtinë-Durrës.
"Tani do të përfundojnë edhe disa punë tjera dhe më pas do të fillojë ndërtimi i kësaj pjese të autostradës Prishtinë-Durrës. Pra është një ngjarje me rëndësi për ne dhe gjithësesi tregon se ne jemi të aftë të mbajmë shtet, të bëjmë shtet dhe meritojmë pavarësinë sa më shpejtë", theksoi Presidenti Rugova.
Presidenti tha se dëshira e tij e madhe është që kjo autostradë të nisë të ndërtohet në vitin e ardhshëm.
Ndërsa, Ministri i Transportit Qemajl Ahmeti, tha se projekti kryesor i autostradës ka përfunduar. "Kënaqësia më e madhe është pjesa e parë e realizimit të idesë së kahmotshme të Presidentit Rugova për ndërtimin e kësaj autostrade", tha ai.
"Ne e falënderojmë Presidentin Rugova për idenë të cilën shumëkush më herët nuk e kemi kuptuar, por tash e shohim se mund ta realizojmë", tha ai.
Gjatësia e tërë autostradës që do ta përshkojë Kosovën, është pak më shumë se 115 kilometra dhe është një projekt sipas standardeve evropiane, e bërë nga kompania gjermane Bpi-CONSULT, që ka kushtuar 3.651.250 euro.
Ndërkaq, përfaqësuesi i Bpi-CONSULT tha se projekti ka filluar vitin e kaluar dhe tani është përfunduar, ndërsa përmendi disa detaje rreth realizimit të projektit se ai do të ketë disa ura, dhe të paktën 3 tunele, të cilat do të jenë në zonën e maleve të Caralevës.

Projektuesit i sollën presidentit Rugova një pjesë të projektit të kësaj autostrade. Ai tha se tani janë duke pritur edhe miratimin e disa ligjeve që kanë një ndërlidhje me këtë çështje dhe të fillojnë punën.