Ministri Veliu priti një delegacion të Degës së LDK-së dhe të LASH nga Suedia

Ministri Veliu priti një delegacion të Degës së LDK-së dhe të LASH nga Suedia

Prishtinë, 27 tetor 2005 /TN

Ministri i MASHT Agim Veliu, priti sot në një takim delegacionin e degës së LDK-së nga Suedia të cilit i printe kryetari Hysen Ibrahimi. Në delegacion mori pjesë edhe sekretari i LASH-it për Suedi Osman Ahmetgjekaj, deputetët e Kuvendit të Kosovës Fadil Geci e Qibrije Hoxha, përfaqësues të Degës së LDK-së në Skënderaj dhe të Nëndegëve të LDK-së nga Suedia.

Ministri Veliu i njoftoi mysafirët për zhvillimet aktuale në arsimin e Kosovës, objektivat, prioritetet si dhe përpjekjet që po bën MASHT për zhvillimin e reformave në të gjitha nivelet e arsimit.

Ai poashtu i njoftoi pjesëmarrësit për përpjekjet që po bën MASHT dhe Qeveria e Kosovës për normalizimin e mësimit në shkollat e Kosovës, por edhe për bisedimet me SBASHK-un për arritjen e zgjidhjes së problemeve në bazë të marrëveshjes së 6 tetorit në mes të Qeverisë së Kosovës dhe BSPK-së.

Kryetari i Degës së LDK-së për Suedi Hysen i Ibrahimi e njoftoi Ministrin Veliu për aktivitetet dhe punën që po bën Dega e LDK-së në funksion të njohjes së pavarësisë së Kosovës, për organizimin dhe problemet me të cilat përballen bashkëqytetarët tanë në Suedi, etj.

Ndërsa sekretari i LASH-it z. Ahmetgjekaj informoi z. Veliu për zhvillimin e gjuhës amtare në Suedi si dhe kushtet shumë të volitshme që ofron shteti suedez për mësim. Ai tha se për zhvillimin e mësimit në gjuhën shqipe përkujdesen 138 arsimtarë që janë në marrëdhënie të përhershme pune e të cilët punojnë me 13 mijë nxënës të diasporës shqiptare në Suedi.

Ministri Veliu dhe delegacioni nga Suedia vlerësuan kërkesat e arsimtarëve të arsyeshme, por për momentin të papërballueshme për buxhetin e Kosovës. Ministri Veliu tha se greva po rrezikon vitin shkollor, prandaj bashkërisht me delegacionin nga Suedia apleuan të gjithë mësimdhënësit, nxënësit dhe prindërit e Kosovës që sa më parë të fillojnë mësimin dhe të normalizojnë jetën në Kosovë.

Delegacioni nga Suedia dhe Ministri Veliu vlerësuan se në kohën kur Kosova po hyn në fazën e finalizimit të pavarësisë, grevat janë shumë të dëmshme për proceset e përgjithshme politike në Kosovë. Ata theksuan se arsimi ishte, është dhe do të jetë shtyllë e shtetit të Kosovës që po hapëron drejt pavarësisë me në krye Presidentin Rugova.