“Inva Mula”, surpriza e çmimit ndërkombëtar "Marie Kraja"

“Inva Mula”, surpriza e çmimit ndërkombëtar "Marie Kraja"

27 tetor 2005 /TN Pranvera Skana

Në një konferencë për shtyp, producentja dhe ideatorja e këtij festivali, Zana Çela, ka shpjeguar në prani të gazetarëve punën parapërgatitore që është bërë në këto ditë për të sjellë në skenën e Akademisë së Arteve një edicion po aq serioz dhe të kompletuar sa në gjashtë edicionet paraardhëse.

U bënë tashmë shtatë vjet që Tirana në sezonin vjeshtor shndërrohet në një arenë të madhe të muzikës operistike ndërkombëtare. Çdo vit është një festival që sjell artistë nga të katër kontinentet për të marrë një çmim që mban një emër të mirënjohur shqiptar, “Marie Kraja”. Ja ku jemi në prag të edicionit të shtatë të këtij festivali, që tashmë është bërë një traditë e vjetër në Tiranë.

Mbrëmja e 27 tetorit do të shënojë hapjen e Edicionit VII të Festivalit Ndërkombëtar të Vokalit Operistik, që ndryshe njihet edhe me emrin festivali “Marie Kraja“. Duke qenë se tashmë figura më e njohur e muzikës operistike shqiptare, Marie Kraja, është bërë dhe simboli i këtij festivali ose engjëlli mbrojtës i konkurrentëve, siç e ka cilësuar dhe presidenti i festivalit, Edi Rama, nata e parë e këtij festivali do t’i kushtohet pikërisht asaj, Marie Krajës. Në një konferencë për shtyp, producentja dhe ideatorja e këtij festivali, Zana Çela, ka shpjeguar në prani të gazetarëve punën parapërgatitore që është bërë në këto ditë për të sjellë në skenën e Akademisë së Arteve një edicion po aq serioz dhe të kompletuar sa në gjashtë edicionet paraardhëse.

Si një festival që prezanton Shqipërinë dhe Tiranën në të gjithë botën, si një vend që ia arrin të organizojë dhe të tilla kompeticione ndërkombëtare, “Marie Kraja” edhe këtë vit do të prezantojë kulturën e vërtetë shqiptare, atë tradicionale dhe modernen. Duke u shndërruar në një sofër të madhe, ku mblidhen artistë nga të gjitha vendet, ky festival do të shërbejë edhe një herë më shumë si një urë lidhëse mes vendeve.

Veç të tjerash, Zana Çela ka theksuar në këtë konferencë për shtyp, ku krahas saj kanë qenë të ulur dhe dirigjeni anglez Martin Andre dhe drejtori artistik Robert Radoja, se kahas çmimit të madh “Marie Kraja“ me vlerë prej 5 mijë dollarësh, çmim që akordohet nga Bashkia e Tiranës (është një çmim që do të jepet për konkurrentët e moshës nga 27 deri në 35 vjeç), do të jepet këtë vit edhe një çmim i ri.

Në natën e tretë të këtij festivali, këtë herë do të shpallet edhe një çmim i ri, “Singer of the future - Inva Mula”. Ky çmim do të ketë të njëjtën vlerë, pra 5 mijë dollarë. Ai do të akordohet nga Ministria e Turizmit, Kulturës dhe Sporteve (është një çmim që do të jepet për konkurrentët e moshës nga 22 deri në 27 vjeç). Çmimi i dytë “Marie Kraja” do të akordohet nga Instituti Italian i Kulturës.

Do të jenë 18 këngëtarë që do të konkurrojnë për këto çmime, nga 73 që kanë aplikuar këtë vit. Ndërsa Robert Radoja dhe Martin Andre janë duke kryer provat e fundit me repertorin e secilit konkurrent, regjisori i këtij festivali, Pali Kuke, po vendos pikat e fundit të platformës së tij regjisoriale. Në stafin që po ngre në këmbë këtë edicion të radhës është edhe mjeshtri i baletit Agron Aliaj dhe stilisti Ardi Asllani.

Dirigjenti Martin Andre do të jetë edhe këtë vit (për herë të tretë) drejtues i Orkestrës Filarmonike të Akademisë së Arteve, me të cilën ka pwrgatitur edhe disa numra specialw për pjesën e spektaklit të këtij festivali. Krahas konkurrimit, festivali do të ketë edhe elementë spektakli.

Kështu, Ilir Kerni do të jetë njëri prej të ftuarve të nderit në natën e fundit, për të bërë spektakël me partneren e tij Edina Plicanic. Gjithashtu Agim Krajka do të sjellë magjinë e fizarmonikës së tij nga Amerika. Lorenc Radovani, violinisti që është kthyer nga Amerika për një projekt me orkestrën e RTVSH-së, do të jetë gjithashtu një i ftuar i këtij festivali.

Trupa e baletit të Teatrit Kombwtar të Operas dhe Baletit do të jetë boshti kryesor ku do të mbështetet pjesa spektakolare e këtij festivali. Producentja Zana Çela, veç rolit të prezantueses, do të ketë edhe një rol më shumë: do të këndojë “Memory“ nga “Cats“. Një prej perlave të muzikës shqiptare, “Për mu paska kenë kismet”, do të vijë sipas një orkestracioni të ri të Endri Sinës, i cili e ka ruajtur shumë variantin origjinal duke futur pak elementë të fantazisë së tij krijuese.

Edhe këtë vit do të vijnë në Tiranë personalitete të artit operistik botëror. Ata janë drejtorë operash dhe presidentë agjencish të mëdha operistike. Për shembull, do tw vijw z. Menno Feenstra, drejtor i “Royal Opera” të Suedisë; drejtoresha e “New Opera” të New Yorkut; znj. Nancy Rhodes ; drejtori i Akademisë Mbretërore të Danimarkës, Kim Von Binzer, etj.. , të cilët do të jenë dhe pjesë e jurisë së festivalit. Mbështetësit e këtij festivali janë Ministria e Turizmit dhe Kulturës, Bashkia e Tiranës (Edi Rama, i cili është dhe president i festivalit). Megjithatë, pjesa më e madhe e buxhetit mbështetet nga donatorë të huaj (ambasadat dhe institucionet e huaja dhe kompanitë e biznesit). Vodafone është mbështetwsi kryesor i këtij edicioni.

Konkurrentët: Eve Giglioti, soprano (SHBA); Simone Pizazzola, bariton (Itali); Emilio Ruggerio, tenor (Meksikë); Erika Roos, soprano (Suedi); Lars Muller, Bariton (Danimarkë); Mark Uhlemann, bas bariton (SHBA); Catherine Hunold, soprano (Francw); Sandra Milena Liz Cartagena, soprano, (Kolumbi); Naira Abrahamyan, soprano (Armeni); Levente Bakirci, bariton (Turqi); Sark Sang Hee, soprano (Koreja e Jugut); Marco Cristarella, bariton (Itali); Camila Corsi, soprano (Itali); Simona Neagu, soprano (Rumani); Sokol Hidersha, bariton (Shqipëri); Alisa Katroshi, soprano, (Shqipëri); si dhe Armando Kllogjeri, tenor, (Shqipëri).