Daci thotë se Kosova individualisht dhe institucionalisht është e përgatitur për pavarës

Daci thotë se Kosova individualisht dhe institucionalisht është e përgatitur për pavarësi

Prishtinë, 27 tetor 2005 /TN /QIK - Kryeadministratori Soren Jesen Petersen pas takimit me kryekuvendarin Nexhat Daci, tha sot se që të dy janë pajtuar që Grupi Negociator duhet të jetë gati për fillimin e bisedimeve dhe t'i ketë përmbyllur përgatitjet, ndërkohë që pas disa ditësh do të fillojnë bisedimet.

Petersen, tha se pret që Kuvendi të mblidhet së shpejti dhe ta miratojë rezolutën e cila do të jetë udhërrëfyese e delegacionit të Kosovës në bisedimet për statusin. Ai ritheksoi se Kosova duhet të jetë një vend multietnik dhe demokratik dhe se për këtë ka gatishmëri nga institucionet.
Ndërkaq, Daci takimin me Petersenin e ka përshkruar si "emocionues", pas asaj që u arrit për Kosovën me vendimin e Këshillit të Sigurimit, ku e përfaqësoi kryeadministratori. Ndërsa, sukesin e ka përshkruar figurativisht, si arritje të anijes në limanin e duhur (në Këshillin e Sigurimir) pas lundrimeve në ujërat e turbullta, sidomos në dy vitet e fundit, për arritjen e qëllimit për të cilin është punuar me dekada, arritjen e pavarësisë, përkatësisht të zgjidhjes së statusit.
Kryekuvendari Daci, tha se Kosova individualisht dhe institucionalisht është e përgatitur për pavarësinë, dhe se roli i Kuvendit dhe i tij do të jetë "shumë vendimtarë në krjimin e unitetit veprues të delegacionit të Kosovës, në kuptimin edhe të dallimeve".

Ai tha se nëse më parë institucionet e Kosovës kanë kundërshtuar veprimet e UNMIK-ut, tash duhet të marrin përgjegjësitë e tij dhe të krijojnë "një unitet veprues", që Kosova në një kohë shumë të shkurtër, pa zgjatje të bisedimeve, ta arrijë finalen e madhe të saj, pavarësinë, që është përcaktim i popullit dhe i institucioneve. Daci u shpreh se begatia historike duhet të mbrohet me ligje dhe të jetë e garantuar, duke u angazhuar për një shtet funksional, stabil, multietnik dhe demokratik.
"Po ashtu siç nuk kemi luhatje duke i argumentuar edhe forcës më të madhe botërore NATO-s, për statusin tonë", tha Daci, që sipas tij përherë po mundohet ta ndajë "optimizimin" e vet me qytetarët. Për argumentimin e procesit tha se janë të angazhuara edhe institucionet shkencore, ndërsa për nevoja të zyrës së tij, do të grumbullojë dokumente historike të pronave, të vlerave, bile me shpresë për përgatitjen e një dokumentacioni të pronave historike prej Nishit, e deri në pjesët më jugore të Ballkanit.

"Por, duke qenë të qartë se ne nuk po kthehemi mbrapa në histori, dhe se pavarësia e Kosovës jo vetëm se nuk është optimumi, por minimumi i kërkesave reale të argumentuara profesionalisht, të popullit shqiptar në Ballkan dhe të qytetarëve", tha ai. Ndërsa, duke iu përgjigjur gazetarëve se mos ka dallime të mëdha në Grupin Negociator, ai tha:

"Nuk guxojmë të lejojmë që interesat e një partie apo të një individi të ngrihen mbi ato të Kosovës". Daci tha se shumëçka do të sqarohet në takimin e nesërm të Delegacionit të Kosovës, dhe se rezoluta e inicuar nga PDK të mos jetë pjesë e lojës politike të individëve, dhe se Kuvendi është i përgatitur për këtë.

Ai tha se këtë ia ka bërë të qartë edhe Hashim Thaçit, kryetarit të PDK-së, se pajtohet me pjesën dërmuese të propozimeve të tij, por jo që edhe Jakup Krasniqi të paraqitet me version tjetër. "Prandaj partitë duhet t'i lënë, mospajtime e veta të brendshme, është koha për të vepruar për Kosovën dhe jo për individ dhe parti", tha Daci, duke shtuar se në takimin e nesërm të Grupit Negociator do të thyhen "bashkarisht të gjitha dilemat".
"Unë besoj shumë në përcaktimet e Presidentit Rugova, dhe të z.Thaçit dhe të pjesës tjetër, në përgjegjësinë që është, dhe jam i bindur si gjithmonë se bashkarisht Kosova do ta fitojë betejën politike. Kosova nuk e ka atë luks, dhe të shkojë si bajraktar fisesh para Ahtisarit, por si institucione dhe si popull i përgjegjshëm, që ka rezultate të mira në histori", tha kryekuvendari Daci.