Presidenti Rugova priti përfaqësuesin e Solanës në Prishtinë, Fernando Xhentilini

Presidenti Rugova priti përfaqësuesin e Solanës në Prishtinë, Fernando Xhentilini

Prishtinë, 26 tetor 2005 /TN /QIK - Presidenti i Kosovës, Dr. Ibrahim Rugova priti sot në një takim z.Fernando Xhentilini (Gentilini), përfaqësues personal për Kosovën i z.Havier Solana, Përfaqësues i Lartë i UE-së për Politikë të Jashtme dhe të Sigurisë.
Presidenti Rugova dhe z. Xhentilini biseduan për gjendjen e përgjithshme në Kosovë dhe për angazhimet që kanë institucionet e vendit dhe bashkësia ndërkombëtare pas vendimit të Këshillit të Sigurimit të OKB-së për të miratuar nisjen e procesit për përcaktim të statusit politik të Kosovës. Presidenti Rugova dhe z. Xhentilini e quajtën vendimin e Këshillit të Sigurimit të 24 tetorit moment shumë të rëndësishëm për Kosovën.
Presidenti Rugova ritheksoi se zgjidhja më e mirë për Kosovën është njohja e drejtpërdrejtë e pavarësisë së vendit. Ai u shpreh se institucionet tona janë të gatshme për "rrugën ndërkombëtare", për biseda eventuale, për realizimin e zgjidhjes optimale për Kosovën, të pavarësisë.
Përfaqësuesi personal i Solanës, z. Xhentilini, çmoi punën që ka bërë Presidenti Rugova duke formuar Delegacionin përfaqësues të Kosovës për procesin e pritshëm të përcaktimit të statusit të Kosovës. Edhe Unioni Evropian po bën përgatitjet e veta për këtë punë, nënvizoi z. Xhentilini.