| KULTURË | HISTORI

Me qëllim

Ku është ndërgjegjja e atyre që kërkojnë ndërgjegjësim të institucioneve komunale?

26 tetor 2005 /TN

Nëse aktiviteti i Edi Ramës në vënien e rregullit në harmoni me planin urbanistik është vlerësuar me vend dhe ai u krijua simbol i vënies rregull në planin urban të qytetit, pse Ismet Beqiri i Prishtinës, Gani Sylaj i Drenasit, Ramë Manaj i Klinës e shumë kryetar tjerë të komunave të Kosovës nuk çmohen për vënie të këtij rregulli.

Shkruan: Arsim Osmani

Pushteti lokal në Kosovë i vuri bazat me implementimin e rezultateve të zgjedhjeve lokale të vitit 2000. Ky pushtet u sendërtua dhe u avansua edhe me zgjedhjet e dyta lokale të vitit 2002. Sot, në këto pesë vite të funksionimit të pushtetit lokal mund të konkludojmë se derisa ka mbetur të bëhet ende shumë, të arriturat janë fasionuese dhe vërtet të prekshme.

Mirëpo Kosovën e pasluftës e përfshiu në masën më të madhe sindromi i deformimeve me pronën. Si me uzurpimin e hapësirave publike ashtu edhe me ndërtimet e egra dhe mbindërtimet, po ashtu ilegale. Gjatë këtyre viteve nuk ka mbetur pothuaj asnjë shtëpi mediale në Kosovë që nuk e ka fajësuar deri në shkallë të papranueshme pushtetin lokal për këto probleme me pronën. Shpesh pa argumente dhe të paqëndrueshme, sepse nuk janë analizuar të gjitha mundësitë dhe aftësitë e pushtetit lokal në këtë drejtim.

Madje rrallë ka shpëtuar që në këtë fajësim për mosvënie të rregullit të planin urban është marrë shembull për të mirë kryebashkiaku i Tiranës z.Edi Rama. Mirëpo askush nuk është lodhur (ndoshta pa qëllim) për të bërë dallimin e specifikave të dy kryeqyteteve dhe pushteteve të tyre lokale e mos të flasim për analizën dhe arsyen e vërtet se sa për qind e buxhetit të shtetit shqiptar i ishte dedikuar Bashkisë së Tiranës për këto çështje.

Jemi dëshmitar që muajve të fundit ka marrë përmasa të intensitetit të shtuar aktiviteti i Kuvendeve Komunale në largimin e kiosqeve dhe objekteve montazh nga hapësirat publike dhe jashtë planeve komunale dhe rrënimi i objekteve të ndërtuara në mënyrë ilegale.

Kështu në këtë drejtim prijnë Komuna e Prishtinës, ajo e Drenasit, Komuna e Klinës etj. Dhe pas këtij aktiviteti, mediat e Kosovës menjëherë filluan turin e tyre me theks në krijimin e rasteve sociale apo “arsye” tjera se nuk është dashur të ndodh kështu.

Është e vërtet se me largimin e kiosqeve nga hapësirat publike është rritur lista e familjeve që mund të klasifikohen në listën sociale, për shkak se aty. kanë siguruar ekzistencën shumë familje. Mirëpo nëse duam implementim të planeve të reja urbanistike atëherë të dyja bashkë nuk shkojnë. Edhe kryebashkiaku i Tiranës ka lënë shumë familje në asistencë sociale, mirëpo ajo nuk shihej tek ai nga mediat e Kosovës por vetëm tek aktivitetet e Kuvendeve Komunale nëpër Kosovë.

Pra nëse aktiviteti i Edi Ramës në këtë drejtim është vlerësuar me vend dhe ai u krijua simboli i vënies rregull në planin urban të qytetit, pse Ismet Beqiri i Prishtinës, Gani Sylaj i Drenasit, Ramë Manaj i Klinës e shumë kryetar tjerë të komunave të Kosovës nuk çmohen për këto aktivitete. Apo jemi të prirë vetëm për të kritikuar. Ndoshta edhe ky është standard që duhet të plotësojnë mediat e Kosovës dhe të baraspeshohen kritikat për mos punë dhe paraqitjes reale të aktiviteteve komunale në vënie të rregullit.

Në masën më të madhe, shpesh edhe pa takat të plotë, Komunat e Kosovës i kanë plotësuar Standardet për Kosovën për të krijuar një shoqëri moderne në përputhje me ligjin dhe për t’i hapur rrugë statusit të Kosovës. Mos ta harrohet Komuna e Gjilanit e cila ka marrë mirënjohje evropiane për menaxhim të mirë.

Autori është Menaxher për Komunikim në Asociacionin e Komunave të Kosovës (AKK) dhe qëndrimet janë personale.