Akashi optimist se shqiptarët do ta realizojnë ëndrrën për pavarësi

Akashi optimist se shqiptarët do ta realizojnë ëndrrën për pavarësi

Prishtinë, 26 tetor 2005 /TN /QIK - Përfaqësuesis i Qeverisë japoneze Jasushi Akashi tha sot në Prishtinë se është optimist që populli i Koosvës do ta realizojë ëndrrën e tij - pavarësinë e Kosovës.
Ai u shpreh kështu pas takimit që pati me Kryeministrin e Kosovës Bajram Kosumi. Ndërkaq, Kryeministri Kosumi tha se e drejta për shtet sovran do të realizohet në bashkëpunim me bashkësinë ndërkombëtare.

Kosova, shtoi ai, po krijon një imazh të ri dhe të mirë në rajon dhe në këtë kontekst përmendi frymën e bashkëpunimit të institucioneve të Kosovës me vendet në rajon.
"Në rajon jemi duke krijuar një imazh të ri, të mirë, pas një periudhe të gjatë të luftërave, të konflikteve, për shkak të politikave të gabueshme të udhëhequra nga Beogradi, tash jemi duke krijuar konceptin dhe imazhin e një bashkëpunimi të vendeve të rajonit, bashkëpunimi të qeverive të rajonit, raporte miqësore mes popujve", tha Kosumi.
Kryeministri tha se e ka njoftuar Akashin me përgatitjet e mëdha që po bëhen për procesin e negociatave që është hapur, si dhe për besimin e madhë që ka populli i Kosovës në këtë proces, si dhe për temat që do të bisedohen me Bogradin, e që sipas Kosumit janë ineteresa reale dhe të serbëve të Kosovës, përkatësisht për zgjidhjet reale që duhet të ofrohen. Sa i përket çështjes së pavarësisë për të cilën tha se kjo është një ëndërr që shpreson se populli i Kosovës do ta realizojë.
"Kjo nuk është një çështje që nuk mund të flas, por ajo që mund të them është se qeveria dhe njerëzit e Kosovës do të jenë në gjendje që të realizojnë aspiratat e tyre", tha Akashi, ish-përfaqësuesi i OKB-së gjatë kohës së konfliktit të armatosur në Kroaci dhe Bosnje, por njëherit porositit në përmbushjen e standaredeve të kërkuara nga bashkësia ndërkombëtare.
"Çështja e pavarësisë është pjesë e një perspektive afatgjate dhe Kosova duhet t'i zgjidhë shumë çështje për të arritur standardet e larta të përcaktuara nga Kombet e Bashkuara dhe nga Bashkimi Evropian", tha Akashi. Ai premtoi se Japonia, edhe gjatë periudhës së ardhshme do të vazhdojë ta mbështesë Kosovën, sipas përcaktimeve që ka populli i saj.