Një Kosovë e pavarur do të jetë shembull i demokracisë qytetare, tha Kosumi në bisedë me ambasadorin e Rusisë

Një Kosovë e pavarur do të jetë shembull i demokracisë qytetare, tha Kosumi në bisedë me ambasadorin e Rusisë

Prishtinë, 26 tetor 2005 /TN /QIK - Kryeministri i Kosovës Bajram Kosumi priti në një takim ambasadorin e Rusisë në Beograd, Vladimir Ivanovski, ku mori pjesë edhe shefi i Zyrës ruse në Prishtinë, Sergej Bazdnikin.
Kryeministri Kosumi e njohu diplomatin rus gjithashtu edhe për gatishmërinë e Qeverisë së Kosovës për të bashkëpunuar me të gjithë faktorët që kanë ndikim në zhvillimet në Kosovë dhe në këtë kuadër vlerësoi të rëndësishëm rolin e Federatës ruse në proceset politike në Kosovë.
Vendimin e 24 tetorit të KS së të OKB së për hapjen e bisedimeve për zgjidhjen e statusit përfundimtar të Kosovës, Kosumi e vlerësoi të rëndësishëm dhe historik për popullin e Kosovës, i cili do të hapë rrugën e perspektivës për Kosovën drejt një të ardhme paqësore.

"Një Kosovë e pavarur do të jetë shembull i demokracisë qytetare, i bashkëjetesës dhe respektimit të vlerave njerëzore. Ajo do të ndihmojë në krijimin e një qëndrueshmërie në rajon dhe në zhvillimin e përgjithshëm në Kosovë", u shpreh Kryeministri Kosumi.
Ndërkaq, ambasadori Vladimir Ivanovski theksoi nevojën e intensifikimit të raporteve midis institucioneve të Kosovës dhe Ambasadës ruse, duke shtuar se federata ruse është pjesë e bashkësisë ndërkombëtare dhe se ajo dëshiron një bashkëpunim konstruktiv dhe dialog të suksesshëm në çështjen e definimit të statusit të Kosovës.
Kosumi dhe Ivanovski biseduan edhe për çështjen e integrimit të pakicave dhe kthimit të refugjatëve në Kosovë.
Duke u ndalur rreth çështjes së përmbushjes së standardeve, Kosumi tha Qeveria e Kosovës është e përkushtuar për përmbushjen e standardeve edhe pas fillimit të negociatave për statusin, me qëllim të konsolidimit të një demokracie evropiane në Kosovë, ngase siç tha "standardet i shohim si të domosdoshme për zhvillimin e shoqërisë kosovare sipas standardeve evropiane", tha ai.