Zëdhënësi i Presidentit Rugova mirëpret vendimin e KS për fillimin e procesit për statusin e Kosovës

Zëdhënësi i Presidentit Rugova mirëpret vendimin e KS për fillimin e procesit për statusin e Kosovës

Prishtinë, 25 tetor 2005/TN /QIK - Zyra e Presidentit të Kosovës ka mirëpritur vendimin e Këshillit të Sigurimit për fillimin e procesit për përcaktimin e statusit politik të Kosovës. Zëdhënësi i Presidentit Rugova, Huhamet Hamiti nërpëmjet një deklarate thekson se zgjidhja për Kosovën është pavarësia e plotë, në përputhje me parimet themelore demokratike dhe se ky është vullnet i shumicës.

Zëdhënësi thotë se "nuk mund të bëhet fjalë për zgjidhje kompromisi në mes të kërkesës legjitime të kosovarëve për pavarësi dhe kërkesës jolegjitime të Beogradit për të rikthyer diçka nga pushteti i tij i dikurshëm mbi fatin e Kosovës". "Zgjidhja e mesme ndërmjet këtyre dy synimeve është e paqëndrueshme - e papranueshme moralisht dhe politikisht.
Rruga jonë e pakthim drejt pavarësisë ende nuk ka mbaruar".
Në këtë deklaratë thuhet:
"E mirëpresim miratimin që dha Këshilli i Sigurimit të hënën për fillimin e procesit për përcaktim të statusit politik të Kosovës. Me gjuhën e OKB së, këtij po i thuhet statusi i ardhshëm i Kosovës. Sido që t'i themi këtij synimi, zgjidhja për Kosovën është pavarësia e plotë për vendin, në përputhje me parimet themelore demokratike. Vullneti i shumicës është më përcaktuesi nga këto parime, ku hyjnë natyrisht edhe standardet e pranuara ndërkombëtare për vendet që duan të integrohen në sistemin ndërkombërtar.
Sinjali që dha Këshilli i Sigurimit është moment i pritur gjatë. Janë bërë më shumë se gjashtë vjet nga viti 1999, kur flitej për tri vjet të statusit kalimtar të Kosovës.
Kosova ka qenë në këto vite me status pezull: de fakto e pavarur, de jure jo. Kjo ka paraqitur pengesë për zhvillim të plotë, me kapacitetet që ka vendi ynë. Përkundër kësaj, ka arritje të rëndësishme në Kosovë, në radhë të parë në plan të rindërtimit fizik, por edhe të ndërtimit të arkitekturës institucionale në nivelin lokal dhe kombëtar.
Zgjidhja për Kosovën është pavarësia e plotë dhe integrimi i saj në strukturat euro atlantike. Një pjesë e sovranitetit tonë do të depozitohej në këto struktura nesër, siç ndodh me sovranitetin e vendeve që janë tashmë anëtare të këtyre organizmave.
Prandaj, nuk mund të bëhet fjalë për zgjidhje politike për Kosovën që do t'i 'kënaqte të gjitha palët' siç thuhet ndonjëherë në ligjërimin diplomatik. Nuk mund të bëhet fjalë për zgjidhje kompromisi në mes të kërkesës legjitime të kosovarëve për pavarësi dhe kërkesës jolegjitime të Beogradit për të rikthyer diçka nga pushteti i tij i dikurshëm mbi fatin e Kosovës. Zgjidhja e mesme ndërmjet këtyre dy synimeve është e paqëndrueshme - e papranueshme moralisht dhe politikisht.
Rruga jonë e pakthim drejt pavarësisë ende nuk ka mbaruar. Kërkohet ende shumë punë e mençur për ta kurorëzuar këtë proces, në të cilin rol të rëndësishëm do të ketë edhe për bashkësinë ndërkombëtare: për OKB në, SHBA të dhe Unionin Evropian.
Me pavarësinë e Kosovës, Prishtina e Beogradi do të mund të jenë bashkë një ditë në organizma multilateralë si kryeqytete të dy vendeve të barabarta", thuhet në fund të deklaratës së Muhamet Hamitit, zëdhënës i Presidentit të Kosovës.