Këshilli i Sigurimit u hap dritën jeshile bisedimeve për statusin e Kosovës

Këshilli i Sigurimit u hap dritën jeshile bisedimeve për statusin e Kosovës

25 tetor 2005 /TN

Zëri i Amerikës (24.10.2005) Ilir Ikonomi

Këshilli i Sigurimit i OKB-së i hapi dritën jeshile bisedimeve për statusin e ardhshëm politik të Kosovës. Në një deklaratë zyrtare që bëri sot, pas një takimi për këtë çështje në New York, Këshilli i Sigurimit prej 15 vendesh tha se e mbështet thirrjen e Sekretarit të Përgjithshëm të OKB-së Kofi Annan, për fillimin e procesit politik që do të përcaktonte statusin e ardhshëm të Kosovës.

Këshilli i Sigurimit i Kombeve të Bashkuara deklaroi se ka ardhur koha të kalohet në fazën tjetër të procesit politik për Kosovën. Në deklaratë bëhej thirrje që në Kosovë të arrihet më shumë përparim dhe që udhëheqësit e saj të shtojnë përpjekjet për zbatimin e standardeve në të gjitha nivelet.

Prapa terminologjisë rutinë të deklaratës, shënohet në fakt një hap historik në procesin e gjatë që rëndom quhet zgjidhja e çështjes së Kosovës dhe që do të kërkojë negociata të vështira, apo kompromise nga të dyja palët.

Sekretari i Përgjithshëm Annan pritet të emërojë tani një të dërguar të posaçëm i cili do të drejtojë procesin e negociatave. Pavarësisht nga fakti që negociatat do të ndërmjetësohen nga OKB-ja, Shtetet e Bashkuara dhe Grupi i Kontaktit prej gjashtë vendesh kanë deklaruar se do të mbeten të angazhuar në këtë proces. Shtetet e Bashkuara pritet të emërojnë përfaqësuesin e tyre në negociata.

Në takimin e Këshillit të Sigurimit, Ambasadori Kai Eide, i dërguari i posaçëm i zotit Annan, si edhe Soren Jessen-Petersen, kreu i UNMIK-ut, përsëritën qëndrimin e tyre se qartësimi i statusit të Kosovës do të ndihmonte në përparimin dhe zhvillimin e saj ekonomik.

Në komentet që i dha Zërit të Amerikës pas mbledhjes, kryeministri i Serbisë, Vojisllav Kostunica, i cili ishte gjithashtu i pranishëm në takim, bëri thirrje që në procesin e negociatave për statusin, të respektohet integriteti i Serbisë dhe Malit të Zi si shtet sovran.

Ai tha se bisedimet duhet të jenë të drejtpërdrejta, midis Prishtinës dhe Beogradit dhe theksoi se mes palëve është e mundur të gjendet një kompromis. Çdo zgjidhje tjetër tha ai, do të ishte një zgjidhje e imponuar. Zoti Kostunica tha se kompromisi nuk do të ishte i mundur nëse insistohet në një zgjidhje të vetme.

Gjatë kohës që Këshilli i Sigurimit zhvillonte punimet, rreth 100 shqiptaro-amerikanë demonstruan përballë ndërtesës së OKB-së, duke kërkuar vetëvendosje dhe pavarësi për Kosovën.

“Koshtunica kthehu në shtëpi”, lexohej në njërën nga parullat.

“Jo OKB-ja në Kosovë, por Kosova në OKB”, thuhej në një parullë tjetër.

Folësit në tubim thanë se pavarësia është alternativa e vetme dhe shprehën shpresën se ky synim do të ketë mbështetjen e Kombeve të Bashkuara.

Ajo që ra në sy në mbledhjen e Këshillit të Sigurimit, ishte rëndëdia protokollare që iu dha asaj. Të pranishëm në mbledhje ishin të 15 ambasadorët e vendeve anëtare, si edhe Sekretari i Përgjithshëm i Kombeve të Bashkuara Kofi Annan.