Presidenti Rugova thotë se njohja e Pavarësisë do të na shtonte gjithë të mirat

Presidenti Rugova thotë se njohja e Pavarësisë do të na shtonte gjithë të mirat

Prishtinë, 24 tetor 2005 /TN /QIK - Një nga ngjarjet e pakta të ruajtura nga tradita popullore që nga lashtësia, është shënuar mbrëmë në Prishtinë nën patronatin e Presidentit Rugova - "Darka e lamës".

Kjo festë tradicionale e quajtur si Dita e falënderimit, për Zotin, që gjatë vitit u ka falur gjithë begatinë në ushqime, por edhe në jetë, ka mbledhur mbrëmë në darkë figurat më të rëndësishmë politike dhe kulturore, që nga Presidenti i Kosovës, Ibrahim Rugova, kryeministri Bajram Kosumi, komandanti i KFOR-it gjenerali Xhuzepe Valoto, zëvendëskryeadministratori Lari Rosin, ministra, kori diplomatik, kryetarë komunash dhe mysafirë të tjerë, të ftuar për të shijuar kuzhinën tradicionale në Hotelin Grand.
Vetë Presidenti Rugova i është drejtuar mysafirëve, ideator i së cilës festë zyrtare ishte vetë ai, duke qenë se veç tjerash është një nga njohësit më të mirë të gjithë historisë dhe traditës shqiptare. Ai mysafirëve ua ka sqaruar se kjo darkë ishte shënimi i tretë zyrtar i kësaj feste në Kosovë, "Darka e lamës", të cilën për herë të parë e shënuan paradhësit tanë ilirët diku rreth pesë shekuj para eresë sonë.
"Dita e falënderimit është një festë tradicionale në Kosovë që njihet që nga kohërat antike ilire-shqiptare-shekulli V para Krishtit, pra që 2500 vjet. Ajo ka qenë e gjallë në popull dhe tash e kemi zyrtarizuar dhe do të shënohet çdo vit të enjten e parafundit të tetorit që lidhet me 23 tetorin e antikitetit", tha Presidenti Rugova, duke iu drejtuat të pranishmëve.
Presidenti rikujtoi se mbledhja në këtë darkë, ku shërbehen gjithë të mirat tradicionale, që nga brumërat si flija, mishërat e qingjit, viçit, pijet si vera, pastaj turshitë, e deri tek ëmbëlsirat, është shënim i gjithë begatisë së falur nga Zoti Brenda vitit.
"Mund të themi se sivjet kemi pasur prodhime të mira në të gjitha fushat. Njëherësh ne do të shtojmë kujdesin për bujqësinë dhe do të krijojmë më shumë mundësi për eksportin e prodhimeve të Kosovës", tha ai.

Por, edhe kjo darkë, që nënkupton nxjerrjen e të gjitha bereqeteve, do të ishte edhe më e pasur me njohjen e Kosovës shtet i pavarur dhe demokratik e i integruar në BE, në NATO dhe në miqësi permanente me SHBA, që është vullneti politik i popullit dhe i qytetarëve të Kosovës.
"Jemi sonte këtu së bashku, po ashtu, për t'iu lutur Zotit që në vitin tjetër të na falë më shumë të mira. Darka e lamës sivjet bëhet më madhështore sepse bie në vitin e shënimit të 600- vjetorit të lindjes së Gjergj Kastriotit Skënderbeut", tha Presidenti Rugova në fund të fjalës së tij, i përcjellë me duartrokitje dhe përzemërsi si gjithëherë prania e tij.