Petersen pret që vitin e ardhshëm të vendoset statusi i Kosovës

Petersen pret që vitin e ardhshëm të vendoset statusi i Kosovës

Londër, 24 tetor 2005 /TN /QIK - Shefi i UNMIK-ut Soren Jesen Petersen pret që vitin e ardhshëm të vendoset statusi i Kosovës, por nuk mund të thotë se cili do të jetë ai status.
"Unë asnjëherë nuk kam komentuar lidhur me rezultatin përfundimtar dhe nuk do të komentoj edhe në të ardhmen, por pres që brenda 12 muajsh të jetë vendosur statusi i Kosovës", u shpreh Petersen në një intervistë për BBC-në në prag të mbledhjes së KS të OKB-së.
Petersen ka shprehur besimin se bisedimet për statusin do të bëhen mbi një platformë, për të cilën është rënë dakord në parim "që nuk do të ketë një ndarje të Kosovës, apo kthim në situatën e vitit 1999, që nuk do të ketë një bashkim të Kosovës me shtetet fqinje".
Në bazë të këtyre parimeve, emisari për statusin do të ndërtojë kornizën e bisedimeve, thotë kreu i UNMIK-ut.
Në lidhje me termin e përfolur kohëve të fundit "pavarësi e kushtëzuar", Petersen thotë se nuk e kupton këtë term.
"Unë nuk e kuptoj se çfarë do të thotë kjo, por ajo që di është se në Evropë sot ka shumë pak vende që kanë atë që unë do ta quaja pavarësi të plotë. Disa janë të varura nga institucionet evropiane të BE së. Edhe këtu në rajon (Ballkan) shtetet u janë të nënshtruar shumë kushteve nga institucionet financiare ndërkombëtare".
Duke komentuar një pyetje se pse bisedimet të fillojnë pa përmbushjen e standardeve, Petersen shprehet se standardet nuk janë përmbushur plotësisht, por në anën tjetër, sipas tij "askush nuk e ka vënë në dyshim faktin se është shënuar përparim, por çështja është se sa përparim".

Është pranuar se janë shënuar përparime në fushën e forcimit të ligjit dhe se përparime ka patur edhe në vendosjen e bazave të kornizës legjislative si edhe përparime në ekonomi, tha Petersen për të shtuar se "standardet të cilat iu kërkuan Kosovës që t'i përmbushë edhe një vend si Danimarka do t'i kishte të vështirë t'i përmbushte".


Sot në Nju Jork mbahet mbledhja e Këshilli të Sigurimit kushtuar Kosovës

Nju Jork, 24 tetor 2005 /TN /QIK - Sot në Nju Jork do të mblidhet Këshilli i Sigurimit të KB, i cili, në bazë të raportit të ambasadorit Kai Eide, pritet të japë dritën jeshile për fillimin e negociatave për statusin e Kosovës. Më herët Sekretari i Përgjithshëm i KB, Kofi Anan i ka rekomanduar KS marrjen e vendimit për fillimin e negociatave për statusin.
Anan pritet së shpejti të emërojë të dërguarin e KB për negociata si dhe datën e fillimit të tyre. Në këtë mbledhje të KS raportin e tij për gjendjen në Kosovë do ta paraqesë shefi i UNMIK-ut Soren Jesen Petersen. Nga pala serbe në këtë mbeldhje do të flasë kryeministri i Serbisë Vojisllav Koshtunica.

Mbledhja është parashikuar të fillojë në orën 16,00 sipas kohës së Evropës Qendrore dhe Televizioni i Kosovës do ta transmetojë drejtpërdrejt.