Ministri Agim Veliu vizitoi Gjimnazin “Sami Frashëri” dhe “Xhevdet Doda”

Ministri Agim Veliu vizitoi Gjimnazin “Sami Frashëri” dhe “Xhevdet Doda”

24 tetor 2005 /TN

Ministri i Arsimit, Shkencës e Teknologjisë Agim Veliu, sot vizitoi Gjimnazin “Sami Frashëri” dhe Gjimnazin “Xhevdet Doda”.

Në Gjimnazin “Sami Frashëri” Ministri Agim Veliu u takua me drejtoreshën e kësaj shkolle znj. Kumrie Sahiti dhe disa mësimdhënës me të cilët biseduan për rrjedhat në shkollë me theks të veçantë për situatën që ka shkaktuar greva e mësimdhënësve si dhe mundësitë për tejkalimin e gjendjes.

Drejtoresha Kumrie Sahiti e informoi Ministrin Veliu se në Gjimnazin “Sami Frashëri” kishte prezentë 6 mësimdhënës që ishin paraqitur në shkollë e të cilët janë të gatshëm të vazhdojnë mësimin, por jo edhe mësimdhënësit tjerë që përkundër deklarimit për respektimin e rregullave të grevës të përcaktuara nga SBASHK nuk ishin prezentë në vendet e tyre të punës.

Sipas drejtoreshës Sahiti mbi 80% të mësimdhënësve janë të gatshëm ta rifillojnë mësimin në mënyrë që të mos humbin nxënësit.

Ministri Veliu informoi udhëheqjen e shkollës dhe pjesëmarrësit për fillimin e punës së Komisioneve të përbashkëta që duhet të gjejnë zgjidhje sipas marrëveshjes së 6 tetorit, për përpjekjet që po bën MASHT dhe Qeveria e Kosovës për normalizimin e procesit arsimor, kërkesat e prindërve dhe të nxënësve për rifillimin e mësimit si dhe rrezikimin e vititi shkollor që paraqet vazhdimi i grevës.

Zonja Sahiti tha se do të apelon kolegët për kryerjen e detyrave dhe obligimeve ndërkaq u bëri apel të gjithë nxënësve që nesë të vijojnë mësimin sipas orarit.

Ministri Veliu vizitoi edhe Gjimnazin “Xhevdet Doda” ku u prit nga përgjegjësi i shkollës, profesori Musa Ahmeti. Ahmeti e njoftoi Ministrin se në shkollë kishte prezentë vetëm 5 mësimdhënës, ndërkaq që të tjerët nuk ishin paraqitur afre në vendin e punës.

Ministri Veliu shprehu mirëkuptim për kërkesat e mësimdhënësve, por informoi pjesëmarrësit në takim se vazhdimi i grevës, përkundër marrëveshjes së Qeverisë me BSPK-në, rrezikon vitin shkollor dhe ka sjellë humbje të pakompensueshme për nxënësit. Edhe në Gjimnazin “Xhevdet Doda”, mësimdhënësit u shprehën se janë të gatshëm për rifillimin e punës dhe se greva ka humbur kuptimin e saj.

Gjatë kësaj vizite, Ministri Veliu takoi edhe drejtorin e Shkollës së Mesme të Mjekësisë “Ali Sokoli” z. Hilmi Retkoceri të cilin e përgëzoi për normalizimin e procesit arsimor në interes të nxënësve dhe mbarëvajtjes së mësimit.

Gjatë ditës së sotme, zv. Ministri i arsimit Fevzi Berisha dhe këshilltari i Ministrit Veliu për arsim parauniversitar Defrim Gashi vizituan komunën e Therandës. Në shoqërim të kryetarit Sali Asllanaj, delegacioni i lartë i MASHT vizituan shkollën fillore “7 Marsi” dhe Gjimnazin “Jeta e re”, ku u takuan me mësimdhënës dhe udhëheqësit e këtyre vatrave arsimore.

Nga këto dy takime doli nevoja e rifillimit të menjëhershëm të mësimit në mënyrë që të mos rrezikohet viti shkollor, por që në radhë të parë të mos humbasin nxënësit. Delegacioni i MASHT dhe udhëheqja komunale e Therandës mbajtën takim me drejtorët e shkollave fillore e të mesme të kësaj komune.