Kosova do të pranojë "mbikqyrjen ndërkombëtare" apo këshilla pas bisedimeve për statusin, thotë Kryeministri Kosumi

Kosova do të pranojë "mbikqyrjen ndërkombëtare" apo këshilla pas bisedimeve për statusin, thotë Kryeministri Kosumi

Prishtinë, 24 tetor 2005 /TN /QIK - Kosova do të pranojë "mbikqyrjen ndërkombëtare" apo këshilla pas bisedimeve për statusin, por Perëndimi nuk mund të vendosë kushte për pavarësinë e Kosovës nga Serbia, ka deklaruar kryeministri Bajram Kosumi në një intervistë për agjencinë e lajmeve Reuters.
"Përfundimisht nuk mund të ketë kushte apo ndonjë fazë të ndërmjetme derisa shtyrje të tilla po pengojnë përparimin ekonomik", tha Kosumi. Kryeministri i Kosovës ka theksuar se një mision "mbikqyrës apo konsultativ" ndërkombëtar do të pranohet pas bisedimeve "si një garanci psikologjike dhe praktike për pakicat se të drejtat e tyre kontrollohen".

Por Kosova, thotë Kosumi, duhet të jetë një shtet i pavarur dhe sovran. "Beogradi nuk do të ketë të drejtë të vendosë për të ardhmen e Kosovës. Nëse do të ishte pyetur Beogradi, sot Kosova ndoshta nuk do të ekzistonte", ka thënë kryeminsitrti kosovar.



Kryeministri Kosumi sot pasdite udhëton për në Shqipëri

Prishtinë, 24 tetor 2005 /TN /QIK - Kryeministri i Kosovës Bajram Kosumi udhëton sot pasdite për vizitë dyditëshe në Shqipëri me ftesë të Kryeministrit Sali Berisha.

Kryeministri Kosumi në këtë vizitë shoqërohet edhe nga disa ministra të kainetit të tij qeveritar. Delegacioni nga Kosova do të takohet me kryeministrin e Shqipërisë Sali Berisha, pastaj me udhëheqës të tjerë të lartë të institucioneve shtetërore, si dhe me përfaqësues të partive politike.
Në një njoftim të Zyrës së Kryeministrit të Shqipërisë thuhet se "Kryeministri Kosumi do të zhvillojë takime me Kryeministrin shqiptar Berisha, si dhe me drejtues të partive politike në vend.

Në këto takime pritet të diskutohet për thellimin e bashkëpunimit mes Shqipërisë dhe Kosovës, si dhe për zhvillimet në rajon".