Kërkesë për rifillimin e mësimit në të gjitha shkollat e Kosovës

Prishtinë, 24 tetor 2005 / TN

Nga: Komiteti i Prindërve të Arsimit të Kosovës (KPAK)
Për: Ministrin e MASHT z. Agim Veliu
Opinionit dhe mediave
SBASHK-ut


z. Ministër,

Të shqetësuar tej mase me rrjedhat në arsimin e Kosovës dhe për shkak të humbjeve të mëdha të nxënësve dhe fëmijëve tanë, por edhe për shkak se greva ka humbur kuptimin social dhe ajo mund të quhet gjithçka por jo më grevë,

Ascociacioni i prindërve të Kosovës ndanë shqetësimin dhe brengën e thellë për gjendjen e rëndë të arsimtarëve të të gjitha niveleve të arsimit.

Ne jemi të bindur që kërkesat e mësimdhënësve janë të arsyeshme, sikur që Qeveria dhe MASHT i ka vlerësuar që nga fillimi.

Mirëpo, pas marrëveshjes së 6 tetorit 2005 në mes të Qeverisë, BSPK-së dhe Këshillit grevist si dhe pas fillimit të punës së komisioneve të përbashkëta, greva e vazhduar nga SBASHK, konsiderojmë se është thellësisht e pakuptueshme, e papranueshme dhe nuk mund të tolerohet më nga ne prindërit.

Kjo sidomos pas bërjes publike të ofertës së mundshme të Qeverisë së Kosovës e cila i ka dhënë prioritet nivelimit të pagave në sektorin e arsimit, ndërkaq që kanë mbetur për t’u trajtuar edhe sektorët tjerë gjatë viteve të ardhshme.

SBASHK-u duhet të jetë i vetëdijshëm se me grevën, më së shumti humbin fëmijët, nxënësit dhe studentët. Por edhe sistemi i arsimit dhe Kosova gjithashtu, sepse institucionet e zgjedhura me votën e lirë janë në prag të fillimit të bisedimeve për pavarësinë e vendit.

Ne e kuptojmë kontributin e madh të arsimtarëve gjatë 15 viteve të fundit, por i përkujtojmë ata se ne prindërit kemi ndarë nga kafshata e gojës për sigurimin e atyre pagave simbolike që kanë qenë dedikuar vetëm për mësimdhënësit.

Prandaj, duke marrë parasysh faktin se fëmijët tanë tash e 4 javë kanë humbur shumë orë mësimi, duke qenë të bindur se oferta e Qeverisë së Kosovës është e sinqertë dhe ajo e mundshmja për shkak të buxhetit të pamjaftueshëm dhe restrikisoneve nga organizmat financiarë ndërkombëtarë, me qëllim të normalizimit të procesit arsimor në të gjitha shkollat e Kosovës,

KPAK, në emër të të gjithë prindërve të Kosovës, kërkon nga Ju z. Minsitër, marrjen e të gjitha masave ligjore që mësimi të rifillojë në të gjitha shkollat e Kosovës. Poashtu kërkojmë përgjegjësi nga drejtorët e shkollave dhe mësimdhënësit.

Prindërit e Kosovës kërkojnë mirëkuptim nga SBSHK-u dhe i ftojnë që sot ta deklarojnë ndërprerjen e grevës, kurse nga MASHT angazhim të shtuar për realizimin e marrëveshjes së 6 tetorit.

Dr. Mentor Rruka, Kryetar i KPAK