Mësimdhënës të çmuar, prindër dhe nxënës të dashur

Deklaratë e Ministrisë së Arsimit të Kosovës

24 tetor 2005 /TN

MASHT vlerëson se greva po rrezikon vitin shkollor, megjithëse në mbi 50% të shkollave në Kosovë mësimi ka rifilluar dhe po stabilizohet. Prandaj MASHT kërkon nga të gjithë mësimdhënësit, që nga nesër më 25 tetor 2005, të fillohet me kryerjen e obligimeve dhe përgjegjësive, kurse nga nxënësit e të gjitha niveleve, të kthehen në bangat e shkollës, në mënyrë që të mos humben më asnjë orë mësimi!

MASHT çmon të gjithë mësimdhënësit dhe udhëheqësit e shkollave, të cilët duke vlerësuar situatën aktuale nëpër të cilën po kalon Kosova, rifilluan mësimin, treguan përgjegjësi të lartë përballë detyrave e obligimeve si dhe kulturë demokratike e institucionale, në interes të nxënësve, shkollës dhe normalizimit të jetës.

MASHT vlerëson që pas arritjes së Marrëveshjes në mes të Qeverisë, BSPK-së dhe Këshillit Grevist për ndërprerjen e grevës, nuk pati asnjë arsye për vazhdimin e saj dhe kërkon edhe një herë nga SBASHK-u që të respektojë hirearkinë sindikale dhe të tregojë kulturë politike e demokratike, sidomos në prag të përgatitjeve të institucioneve të Kosovës për realizimin e vullnetit politik, për të cilin punuan e sakrifikuan aq shumë mësimdhënësit tanë.

Në kuadër të përpjekjeve për gjetjen e zgjidhjes, MASHT ka zhvilluar disa herë biseda me udhëheqjen e SBASHK dhe të BSPK-së, të cilëve u është prezantuar oferta e Qeverisë së Kosovës, në suaza të mundësive financiare e ligjore për plotësimin e kërkesave të mësimdhënësve.

MASHT vlerëson se greva po rrezikon vitin shkollor, megjithëse në mbi 50% të shkollave në Kosovë mësimi ka rifilluar dhe po stabilizohet. Vazhdimi i grevës në kohën kur komisionet e përbashkëta të MASHT - SBASHK - MEF kanë filluar punën për gjetjen e zgjidhjes sipas marrëveshjes së 6 tetorit, tashmë ka humbur çdo kuptim dhe për këtë deklarohen edhe mësimdhënësit e prindërit, të cilët kërkojnë menjëherë rifllimin e procesit arsimor.

Prandaj MASHT kërkon nga të gjithë mësimdhënësit, që nga nesër më 25 tetor 2005, të fillohet me kryerjen e obligimeve dhe përgjegjësive, kurse nga nxënësit e të gjitha niveleve, të kthehen në bangat e shkollës, në mënyrë që të mos humben më asnjë orë mësimi!

MASHT fton të gjithë arsimtarët, nxënësit dhe prindërit, që bashkërisht të kontribuojnë në rifillimin e mësimit në të gjitha shkollat e Kosovës.

MASHT shpreh vendosmërinë për normalizimin e mësimit dhe mbetet më i përkushtuari dhe më i interesuari për ngritjen e mirëqenies së arsimtarëve dhe në mënyrë të vazhdueshme do të zhvillojë aktivitete për përmirësimin e gjendjes materiale të tyre.