Asht turp për Ferizajn, që një rrugë a shesh të ketë emrin e E.H., këtij monstri tiranik mishngranës të shekullit bashkëkohor...!

Asht turp për Ferizajn, që një rrugë a shesh të ketë emrin e E.H., këtij monstri tiranik mishngranës të shekullit bashkëkohor...!

21 tetor 2005 /TN Nga Sami Repishti
Personalisht, jam arrestue, torturue, dhe dënue me 15 vjet burg të randë në moshën 21 vjeçare, që nga viti 1946, nga aparati shtypës i kriminelit komunist E.H. Njera nga akuzat ka qenë kërkesa ime për Bashkimin e Kosovës me Shqipninë. Për 60 vjet me rradhë, e papushim, kam punue për suksesin përfundimtar të popullit kosovar, e pavarësinë e plotë të Kosovës shqiptare.
I nderuari zoti Rexhepi,
Këto ditët e fundit, kam lexue në gazetën ILLYRIA të Nju Jork-ut (nr. 1482, dt. 23-26 shtator 2005, f. 14), nji artikull, që mbante titullin: "Kosovë, 500 firma për Enver Hoxhën", dhe "Korrieri" Tiranë. Sipas këtij artikulli, rreth "… 500 nënshkrime të protokolluara dhe të dorëzuara në Komisionin për Emërtimin e Rrugëve dhe Shesheve, nëpërmjet të cilave, kërkohet emërtimi i një rruge a sheshi me emrin e ish - udhëheqësit komunist në qytetin Ferizaj."
Ky propozim, shkruhet në artikull, përkrahet nga zyrtarët e lartë të komunës Ferizaj, Remzi Hasani, Rexhep Sadiku e Hamdi Reka (kryetar i Shoqatës për Bashkimin Gjithëkombëtar), i cili, shprehet kështu: " …Ferizaj, është një qytet revolucionar. Është turp që një rrugë a një shesh mos të ketë emrin e Enver Hoxhës, këtij kolosi të historisë sonë…etj."
Nji informatë e tillë, ka tronditur thellësisht lexuesit e bashkësisë shqiptaro - amerikane. Shumica e tyne, janë viktimë e pafajshme ose familjarë të viktimave të terrorit 45 vjeçar komunist në Shqipni, nji sistem i frymëzuem e i imponuem kryesisht nga satrapi aziatik, E.H.
Kur mendohet se kërkuesit, janë individë me nji shkallë arsimore pak e shumë të naltë, nji kërkesë e këtillë kalon kufijtë e së zakonshmes. Ajo paraqitet si nji shtrembërim i qëllimshëm i realitetit komunist enverist në Shqipni dhe nji monstruozitet moral, njikohsisht.
Të zësh me gojë emnin e dikatorit më të keq, që ka njohur atdheu ynë shqiptar në historinë e tij tremijëvjeçare Ballaban Pasha, Esat Toptani, Haxhi Qamili dhe Sinan Hasani juaj, janë të vegjël para tij, të tregosh respekt për këtë figurë, që trathtoi çdo gjë, që asht ma e shejtë për çdo shqiptar, që nga humbja e pavarësisë shqiptare në 1945 - 1948, deri tek trathtia e madhe, që ai i bani Kosovës martire gjatë gjithë jetës së tij, t'a quash atë "kolos i historisë sonë", tregon se "historianët" e revizionizmit komunist shqiptar të Kosovës, janë aq symbyllur dhe fanatikë, sa që nuk shohin gjakun e pafajshëm të më shumë se 6.000 vëllazënve dhe motrave të pushkatuem ose të vrarë në torturë nga monstri komunist në Shqipni; do të thotë të mos dëgjosh gjamet, ulërimat, vajtimet e ma shumë se 50.000 të burgosunve politikë e të familjeve të tyne (shumë nga ata të denuem pse kërkuen bashkimin e Kosovës me Shqipninë); do të thotë të mos kesh asnji ndjenjë njerëzore për familjet e internuera prej vitit 1945 dhe deri në vitin 1990, katërdhetë e pesë vjet pa nderpremje; do të thotë të mos kesh asnji shqetësim për qindra mijëra punëtorë, që u banë robër modernë të punishteve shtypëse shtenore; të injorosh qindra mijëra fshatarë, bujkrobë të klikës sunduese, që i shfrytëzoi deri në palc në kooperativat bujqësore, që nuk ushqyen as edhe familjet e tyne; don me thanë të mos mëshirosh mijëra intelektualë të aftë dhe të ndershëm shqiptarë, që u zhdukën pa gjurmë, u mbytën në burgjet e errëta komuniste shqiptare, ose u internuen në fshatrat ma të humbuna të Shqipnisë, që të ndërpritej krijimtaria e tyne, dhe që shpiegon shkretëtirën letrare të Shqipnisë për ma shumë se 45 vjet… I nderuemi zoti Rexhepi,
Përsonalisht, jam arrestue, torturue, dhe dënue me 15 vjet burg të randë në moshën 21 vjeçare, që nga viti 1946, nga aparati shtypës i kriminelit komunist E.H. Njera nga akuzat, ka qenë kërkesa ime për Bashkimin e Kosovës me Shqipninë. Për 60 vjet me rradhë, e papushim, kam punue për suksesin përfundimtar të popullit kosovar, e pavarsinë e plotë të Kosovës shqiptare.
Sot, kam kënaqësinë e madhe të shoh se Kosova asht e lirë, shtet që po lind nën protektoratin e OKB-s, me pushtetet e veta legjislative, ekzekutive dhe pjesërisht gjyqsore, e në përgaditje për fazën ë fundit: përcaktimin e statusit final të Kosovës.
E gjithë bota shqiptare, asht e mobilizueme, për nji qëllim kaq të naltë, në të dy anët e kufinit artificial shqiptar. Synimi i çdo shqiptari sot, asht të ndërtohet nji Kosovë e lirë, e pavarun, demokratike, e bashkueme dhe europiane…
Besoj, se edhe ju jeni dakord me këtë përcaktim.
Por "demokraci", nuk do të thotë aprovimi, dhe akoma ma keq, naltsimi, himnizimi i diktaturës së proletariatit, shpikja ma e shemtueme e shekullit njizet. Me ngritë "komunizmin" e sidomos "enverizmin", si forma ma e përçudnueme e komunizmit në Europë, don me thanë, njeriu duhet të jetë ose krejt ekstra-territorial, banor i nji bote tjetër jashtë botës sonë të përbashkët, ose nji qëllimkeq, që përpiqet të sjellë mbrapa katastrofen vdekjeprurëse të Shqipnisë ish-rregjimin enverist.
Vetëm kështu e kuptoj unë përpjekjen me "rihabilitue" ose ma keq "me nderue" E.H. këtë pjellë tiranike të historisë sonë bashkëkohore. Prandej, asht turp për Ferizajn, që nji rrugë a shesh të ketë emrin e E.H., këtij mostri mishngranës të shekullit tonë bashkëkohor…!
Si vëlla shqiptar, e quej për detyrë morale dhe qytetare të dorës së parë me çfaqë mendimin tim, në lidhje me "kerkesën" e masipërme.
Uroj me gjithë zemër që të vini dorën në zemër, e të gjykoni me zemër të hapun dhe mendje të lirë të kaluemen tragjike të 3.5 milion vëllazënve e motrave tueja shqiptarë në ish- Shqipninë komuniste, para se të merret vendimi i fundit.
Unë kam besim në arsyen dhe ndërgjegjën tuej.
Me nderime më të mira,
Sami Repishti Ph.D.
City University of New York
Ish i burgosun politik (1946 - 1956)
dhe aktivist për të Drejtat e Njeriut.