Presidenti Rugova falënderon FMN-në për këshillat dhe rekomandimet në ekonomi

Presidenti Rugova falënderon FMN-në për këshillat dhe rekomandimet në ekonomi

Prishtinë, 21 tetor 2005 /TN /QIK – Presidenti i Kosovës Ibrahim Rugova priti sot në rezidencën e tij në Velani, një delegacion të Fondit Monetar Ndërkombëtar (FMN), të kryesuar nga zoti Mark Oboen (Marc Auboin).

Presidenti Rugova tha se me shefin e misionit të FMN-së z.Oboen ka biseduar për nevojën e stabilitetit dhe për politikën makro ekonomike të Kosovës, për të cilat këshilla dhe rekomandime tha se e falënderon. Presidenti tha se deri tash institucionet janë kujdesur që të kenë "një politikë të mirë fiskale, të ofrojmë më shumë vende të punës, sidomos për të rinjtë e Kosovës dhe trendet janë pozitive". Presidenti është shprehur që Kosova të jetë sa më shpejt anëtare e Fondit Monetar Ndërkombëtar (FMN-së). "Kjo gjithsesi vjen me pavarësinë e Kosovës, që do të na hapte më shumë mundësi për zhvillimin tonë të ardhshëm, për popullin e Kosovës".
Presidenti Rugova tha se gjatë javës së ardhshme do të takohet me delegacionin përfaqësues për bisedime, ndërsa në takimin e mëparshëm janë rregulluar shumë çështje. Presidenti u rikujtoi gazetarëve se grupet punuese po punojnë, ndërsa sa i përket dilemës së shtruar në një pyetje nëse ka kontradikta në Grupin Negociator, ai iu përgjegj qartë, se nuk mund të ketë qëndrime të ndryshme rreth pavarësisë.
"Aty nuk mund të hyjnë njerëzit në kontradikta. Një qëllim e kemi, pavarësinë e Kosovës, grupet punuese, ekspertët dhe politikanët", nënvizoi Presidenti Rugova.
Kreu i delegacionit të FMN-së, Mark Oboen, tha se me Presidentin Rugova kanë diskutuar për zhvillimet gjatë tri-katër vjetëve të fundit. "Këto zhvillime ne i kemi parë si pozitive, në veçanti për zhvillimin e një ambienti të mirë dhe favorizues sidomos për sektorin privat, i cili çon në një punësim më të madh", tha ai. Ai tha se qëllimi i vizitës së delegacionit ishte që të këshillojë ministrin e Financave dhe Thesarin e Kosovës për nevojat e buxhetit të vitit 2006, dhe për vëmendjen në një politikë e cila do të çonte drejt zhvillimit, punësimit etj.
Në këtë takim mori edhe ministri i Ekonomisë dhe Financave Haki Shatri.

Presidenti Rugova dekoroi me Medaljen e Artë të Pavarësisë, Akademinë e Shkencave dhe Arteve të Kosovës

Prishtinë, 21 tetor 2005 /TN /QIK - Presidenti i Kosovës dr.Ibrahim Rugova, sot me dekret të veçantë dekoroi me Medaljen e Artë të Pavarësisë Akademinë e Shkencave dhe Arteve të Kosovës, në 30-vjetorin e themelimit të saj, për meritat e saj për lirinë dhe pavarësisën e Kosovës. Dorëzimi i Medaljes do të bëhet së shpejti në në një ceremoni të veçantë.