Më mirë është për Serbinë që sa më parë të kuptojë se e ka humbur Kosovën, shprehet eksperti kanadez për Ballkanin

Më mirë është për Serbinë që sa më parë të kuptojë se e ka humbur Kosovën, shprehet eksperti kanadez për Ballkanin

Pragë, 2O tetor 2005 /TN QIK - "Jo vetëm shqiptarët, por edhe serbët e Kosovës, dhe madje edhe zyrtarët në Beograd dhe qytetarët e Serbisë e shohin se nuk është reale që Kosova të mbetet në një union të brishtë me Serbinë dhe Malin e Zi dhe veçanërisht jo pjesë e Serbisë". Kështu është shprehur eksperti kanadez për Ballkanin Lenard Koen.
Raporti i Kai Eides, thotë ai, sugjeron që Kosova ka bërë përparim të mjaftueshëm për të filluar bisedimet që do të çojnë drejt fazës, në të cilën "bashkësia ndërkombëtare më pak do të kontrrollojë këtë teritor deri në shpalljen e pavarësisë", tha Koen për radion "Evropa e lirë".
Sipas tij, në këtë fazë roli i Kombeve të Bashkuara do të jetë më pak i hetueshëm, por do të forcohet ai i BE-së.
"Pra gjendja e tashme kalimtare do të zëvendësohet me një gjendje tjetër kalimtare që do të mund të quhet pavarësi e cunguar, e kufizuar ose e kushtëzuar", shprehet Koen, për të shtuar se "shqiptarët e Kosovës gjithsesi nuk do të jenë shumë të entuziazmuar me këtë fazë të re kalimtare të pavarësisë së kushtëzuar".
"Bashkësia ndërkombëtare do të kërkojë që para shpalljes së pavarësisë së plotë të Kosovës të bëjë angazhime shtesë në përmbushjen e standardeve.

Mbase në 5 vitet e ardhshme forcat ndërkombëtare edhe më tej do të mbeten të pranishme në Kosovë, ashtu si edhe bashkësia ndërkombëtare në tërësi, por kosovarët do të marrin rol gjithnjë e më të madh në institucionet vendore. Por nuk do të ketë asnjë dilemë për mbetje nën Serbinë, madje as në formën më të brishtë", thotë ky ekspert kanadez.
Ai parashikon që në të ardhmen rolin e Kombeve të Bashkuara ta përmbushë Bashkimi Evropian, ndërkaq bashkësia ndërkombëtare do të jetë e pranishme "gjithnjë derisa nuk përmbushen standardet dhe rrjedhimisht të krijohen kushtet për njohjen e pavarësisë së plotë të Kosovës".
Në një pyetje hipotetike nëse mund të arrihet ndonjë ujdi që Kosova të njihet ndërkombëtarisht shtet sovran, ndërkaq Serbia të pranohet në BE, Koen është i mendimit se shumëkush në bashkësinë ndërkombëtare mendojnë për opsionin e njohjes së njëkohësishme ndërkombëtare të Kosovës dhe pranimit të Serbisë në Bashkimin Evropian, ndërkohë që këtë skenar e ka parasysh edhe elita politike në Beograd, thotë ai.
Koen shprehet se për Serbinë është më mirë që sa më parë të kuptojë se e ka humbur Kosovën, ngase sipas tij, "vonesa kushton".