MASHT fton SBASHK un që të bëhen pjesë e zgjidhjes së situatës së krijuar

MASHT fton SBASHK un që të bëhen pjesë e zgjidhjes së situatës së krijuar

Prishtinë, 2O tetor 2005 /TN QIK - Në vazhdën e përpjekjeve të saja për përmirësimin e gjendjes materiale të mësimdhënësve të Kosovës, në situatën e krijuar pas fillimit të grevës së mësimdhënësve, dhe pas konsultimeve të shumta me palët e involvuara, Ministria e Arsimit, Shkencës dhe Teknologjisë (MASHT) dhe Qeveria e Kosovës kanë vendosur të formohen këto komisione:

Komisionin për bartjen e të drejtës së menagjimit të të hyrave vetjake në UP; Komisionin për shqyrtimin e ligjit për financimin e sektorit publik dhe të përgjegjësive me qëllim të shikimit të mundësive për avancimin e menaxhimit të mjeteve buxhetore nga ana Universitetit të Prishtinës dhe Komisionin për nivelizimin e pagave dhe gradave në Universitetin e Prishtinës.
Ministria e Arsimit dhe ajo e Ekonomisë dhe Financave do të shqyrtojnë me prioritet kërkesat e punëtorëve arsimorë.
Pos kësaj, me qëllim të shqyrtimit dhe vendosjes urgjente dhe të përbashkët të çështjeve në sistemin e të ardhurave është vendosur që të themelohet Komisioni i Përbashkët për zbatimin e marrëveshjes Qeveri BSPK të datës 6.10.2000.
Prandaj, Ministria e Arsmit fton SBASHK-un që të bëhen pjesë e zgjidhjes së situatës së krijuar duke punuar në Komisionin e përbashkët të përbërë nga MASHT, MEF dhe SBASHK u, gjithnjë duke i shfrytëzuar deri në maksimum mundësitë materiale të buxhetit të Kosovës.
MASHT kërkon që Komisioni të fillojë punën më datë 20.10.2005 në ora 10.00 dhe të përfundojë punën në afat sa më të shkurtër me mandat gjetjen e zgjidhjes me veprim retroaktiv, në kuadër të mundësive tona e në kushte të transparencës së plotë të informatave.
Njëherit u bëhet thirrje nxënësve, studentëve, mësimdhënësve, prindërve, mediave dhe komunitetit që të kuptojnë seriozitetin e gjendjes dhe të sillen në përputhje me nevojat që shtron situata.
Në fund, MASHT kërkon ndërprerjen e menjëhershme të grevës dhe rifillimin e punës për shkak të dëmeve të pariparueshme që po i shkaktohen sistemit arsimor dhe situatës së përgjithshme në vend.
MASHT dhe Qeveria kanë bërë gjithçka brenda mundësive të veta për të evituar dëmet e pariparueshme për pjesën më të rëndësishme të sektorit publik në Kosovë. Kërkojmë nga të gjitha palët përgjegjshmëri dhe seriozitet për të mirën e sistemit arsimor, thuhet në një kumtesë të MASHT-it.