Kryeministri Berisha: Shqipëria mbron tezën e pavarësisë për Kosovën

Kryeministri Berisha: Shqipëria mbron tezën e pavarësisë për Kosovën

Tiranë, 19 tetor 2005 /TN /QIK - Kryeministri Sali Berisha pas jë takimi që zhvilloi me Kryeadministratorin e Kosovës Soren Jesen Petersen, deklaroi se "Shqipëria mbron tezën e pavarësisë për Kosovën" dhe "zgjidhja e kësaj çështje i takon popullit, politikës kosovare dhe komunitetit ndërkombëtar".
Siç njoftojnë mediat e Tiranës ky është një qëndrim me nuanca të ndryshme nga ai që ministri i jashtëm Besnik Mustafaj shprehu në Asamblenë e përgjithshme të OKB-së në Nju Jork, kur shqiptoi termin "pavarësi e kushtëzuar".
Berisha deklaroi gjithashtu se dy problemet kryesore në kuadër të zgjidhjes së statusit të Kosovës janë dialogu Prishtinë-Beograd dhe një dimension i ri i lirisë së serbëve dhe minoriteteve të tjera në Kosovë.
Soren Jesen Petersen ndërkaq deklaroi sot në Tiranë se "Kosova duhet të lëvizë drejt një statusi që prodhon stabilitet në rajon". Petersen tha gjatë konferencës së përbashkët për shtyp me Kryeministrin Berisha, se "po ndërmjetësohet që në grupin e negociatorëve Prishtinë-Beograd, të përfshihet edhe një delegacion i serbëve të Kosovës".






Moisiu në një takim me Petersenin: Kosova do të jetë e pavarur si të gjitha pjesët e ish-Jugosllavisë

Tiranë, 19 tetor 2005 /TN /QIK - Presidenti i Shqipërisë Alfred Moisiu, priti në një takim Kryeadministratorin e Kosovës Soren Jesen Petersen. Presidenti Moisiu shprehu kënaqësinë për vizitën e z. Petersen dhe vlerësoi kontributin e tij në krye të misionit të OKB-së në Kosovë dhe rolin e tij shumë të rëndësishëm në Kosovë e jashtë saj, thuhet në një komunikatë nga ky takim.
Presidenti Moisiu vuri në dukje se politika në Kosovë ka bërë progres dhe çmoi rolin e z. Petersen.
"Kosova nuk mund të kthehet atje ku ka qenë dhe as nuk mund të ndahet apo të bashkohet një vendi tjetër dhe kjo do të thotë të jetë e pavarur ashtu si të gjitha ish-pjesët e tjera të ish-Jugosllavisë, të cilat janë sot shtete të pavarura", theksoi Presidenti Moisiu.
Nga ana e tij Kryeadministratori i Kosovës vuri në dukje se është meritë e punës në kompleks e Grupit të Kontaktit, rajonit dhe e Shqipërisë, që aktualisht procesi negociues për zgjidhjen e statusit të Kosovës është në prag, i cili, siç u shpreh, megjithëse i vështirë e kompleks, pritet të përfundojë në vitin 2006. Të hënën, tha Petersen, pritet që Këshilli i Sigurimit të KB të miratojë rekomandimet e Sekretarit të Përgjithshëm Kofi Anan për fillimin e këtyre bisedimeve.
Petersen tha se aktualisht kërkohet që të përmbushet standardi për ndërtimin e një shoqërie të vërtetë demokratike multietnike në Kosovë dhe se zgjidhjet e problemeve mund të arrihen vetëm me dialog, me përfshirjen reale të pakicave në institucionet qëndrore e lokale. Z. Petersen shprehu besimin se Shqipëria si deri tani do të vazhdojë të luajë rol konstruktiv në rajon.
Presidenti Moisiu vlerësoi profesionalizmin e përgjegjësinë e z. Aide, pasqyruar në raportin e tij paraqitur Sekretarit të Përgjithshëm të KB së.
Presidenti shprehu mbështetjen e shtetit shqiptar ndaj z. Petersen në kryerjen e misionit të tij në Kosovë.