Daci dhe Kosumi thanë në takimet me ambasadorët e OSBE-së se për pavarësinë nuk do të negociohet me askënd

Daci dhe Kosumi thanë në takimet me ambasadorët e OSBE-së se për pavarësinë nuk do të negociohet me askënd

Prishtinë, 17 tetor 2005 /TN /QIK - Pavarësia e Kosovës nuk do të negociohet, u kanë thënë sot kryekuvendari Nexhat Daci dhe kryeministri Bajram Kosumi, 25 ambasadorëve të OSBE-së, të cilët edhe nesër do të jenë në Kosovë.
Ambasadorët e 25 vendeve në Këshillin e Përhershëm të OSBE-së në Vjenë, të cilët kanë mbajtur takime të veçanta me kryekuvendarin Daci dhe kryeministrin Kosumi, janë interesuar për përgatitjet për bisedimet për statusin përfundimtar të Kosovës dhe për rolin e mëpastajmë të këtij misioni në Kosovë.
"Limiti që delegacioni i institucioneve të Kosovës e ka, është se pavarësia e Kosovës nuk është e negociueshme me askë, por kjo është rruga deri në përmbushjen e saj me bashkësinë ndërkombëtare në lëmi të caktuara, në siguri në veçanti, në ushtri dhe në monitorimin e proceseve civile nga Evropa”, tha kryekuvendari Daci.
Duke u përgjigjur në pyetjet e ambasadorëve të OSBE së për gjendjen e sigurisë në Kosovë, sidomos në fazën e bisedave për statusin, Daci është shprehur se megjithëse Kosova ende nuk ka kompetenca për siguri dhe drejtësi, nuk pret trazira dhe destabilizim të vendit, madje ka shtuar se Prishtina vazhdon të jetë qytet më i sigurt se Nju Jorku, Londra, Parisi a Berlini. Megjithëkëtë ai ka këmbëngulur në krijimin sa më parë të Ministrisë së Drejtësisë, të asaj të Punëve të Brendshme dhe të Shërbimit inteligjent, si parakusht për një siguri më të mirë në vend.
Në pyetjen e ambasadorit të Serbisë dhe të Malit të zi, Garçeviq, se mos qëndrimi i fortë kosovar për panegocueshmërinë e statusit do të dëmtonte procesin e bisedimeve dhe do të ishte dekurajues për serbët e Kosovës, Daci është përgjigjur se të bisedosh për status me vendin i cili edhe pas gjashtë vjetësh të luftës nuk i kthen trupat e pajetë të shqiptarëve të vrarë nga ushtria dhe policia e tij, do të thotë të mos e zgjidhësh atë edhe po të bisedosh për gjashtëqind vjet. Ai, ndërkaq, ka rikujtuar faktin se Beogradit i është marrë me luftë sovraniteti mbi Kosovën, se ai aktualisht ndodhet në KS të OKB së dhe se do t?i jepet popullit të Kosovës, thuhet në një kumtesë nga ky takim.
Ndërkaq Kryeministri Kosumi tha se ka njoftuar delegacion e gjerë të OSBE-së, për gatishmërinë e qeverisë për fillimin e bisedimeve për zgjidhjen e statusit. Ai po ashtu thase beson se OSBE-ja do të ketë rol monitorues në zhvillimin e demokracisë, edhe pasi Kosova të njihet si shtet i pavarur.
"Ne jemi duke u përgatitur, delegacioni është në gjendjen e duhur, grupet punuese janë duke u funksionalizuar, që të fillojnë bisedat për bërjen e shtetit të Kosovës. Ndërsa, sa i përket rolit të OSBE-së në të ardhmen, ne e shohim edhe një prezencë të OSBE-së dhe një rol observues, monitorues të ndërtimit të demokracisë edhe pas statusit final të Kosovës", ka theksuar Kosumi.
Ambasadori slloven Janez Lenarçiç, kryesues i delegacionit të OSBE-së, pas takimit me anëtarët e Kryesisë së Kuvendit dhe me anëtarët e kabinetit qeveritar, tha se OSBE-ja do ta ndihmojë Kosovën edhe pas zgjidhjes së statusit. "Të gjitha bisedat ishin informative dhe konstruktive. Ne shpresojmë që OSBE-ja do të jetë në gjendje ta ndihmojë Kosovën që ta zhvillojë demokracinë dhe prosperitetin edhe në këtë pjesë të botës", tha Lenarçiç.
Delegacioni i ambasadorëve të OSBE-së u takua edhe me kryeadministratorin e Kosovës Soren Jesen Petersen, ndërsa në orët e pasdites, ai do të takohet me kryetarin e PDK-së, Hashim Thaçi, me kryetarin e ORA-s, Veton Surroi dhe me përfaqësues të komuniteteve tjera në Kosovë.