Ministri Agim Veliu në State Deparatmentin amerikan u takua me Drejtorin e Zyrës për Çështjet e Evropës Qendrore dhe Juglindore

14 tetor 2005 /TN

Në fund të javës së dytë të pjesëmarrjes në seminarin e Bankës Botërore me temën “Zgjedhjet strategjike për reformën në arsim” që po të mbahet në Washington DC të SHBA-ve delegacioni i MASHT i udhëhequr nga Ministri Agim Veliu, ka zhvilluar aktivitetete dhe takime të rëndësishme në Departamentin e shtetit, Departamentin e arsimit dhe takoi zyrtarë të lartë të Bankës Botërore.

Dje Ministri Agim Veliu u takua me Drejtorin e Zyrës për Çështjet e Evropës Qendrore dhe Juglindore Çarls Inglish dhe zyrtarë të tjerë të lartë nga kjo zyrë.

Në takimin që u mbajt në Deparatamentin e shtetit amerikan u diskutuan proceset e rëndësishme nëpër të cilat po kalon Kosova, në veçanti zbatimi i standardeve dhe fillimi i shpejtë i bisedimeve për statusin politik të Kosovës.

“Rëndësi e madhe në këtë takim iu kushtua vazhdimit të bashkëpunimit dhe mbështetjes amerikane për sistemin e arsimit në Kosovë dhe konsolidimit të rrjedhave në Universitetin e Prishtinës”, deklaroi Veliu. Ai ka njoftuar zyrtarët e Departamentit amerikan të shtetit për punën që po bën MASHT dhe institucionet tjera në Kosovë për zbatimin e standardeve dhe për fillimin e bisedimeve për statusin e ardhshëm politik në Kosovë, ndërkaq që ka falënderuar palën amerikane për mbështetjen dhe bashkëpunimin e deritashëm për zhvillimin e sistemit të arsimit të lartë në Kosovë.

z. Çarls Inglish ka shprehur gatishmërinë për mbështetje të mëtejme të institucioneve amerikane për proceset në Kosovë. Ai vlerësoi pozitivisht përpjekjet e MASHT për depolitizimin e Universitetit të Prishtinës dhe të sistemit arsimor në përgjithësi.

Delegacioni i MASHT i kryesuar nga ministri i Arsimit, Z. Agim Veliu ka zhvilluar edhe dy takime të rëndësishme pune me zyrtarë të Bankës Botërore dhe të Departamentit (Ministrisë) së Arsimit të Shteteve të Bashkuara të Amerikës.

Në takimin e parë me Znj. Orsalia Kalanzopulos, drejtoreshë rajonale e Bankës Botërore për Evropën Juglindore, Znj. Nensi Kuk, Udhëheqëse e Njësisë për Evropën Juglindore, Znj. Morinë Meklafllin, Drejtoreshë e Sektorit të Arsimit, u diskutua bashkëpunimi e ndihma e deritanishme e Bankës Botërore për Kosovën si dhe mundësia e vazhdimit të bashkëpunimit në të ardhmen. Në fokus të bisedës ishin forcimi i përpjekjeve për zbatimin e projektit të tanishëm të Bankës Botërore për Rritjen e Pjesmarrjes në Arsim dhe kyqja e “World Bank” në procesin e zhvillimit të strategjisë së MASHT për zhvillimin e arsimit parauniversitar 2007 – 2017.

Në këtë takim Ministri Veliu dhe zyrtarët e “World Bank” theksuan nevojën për përshpejtimin e punëve për përmbarimin e projektit sipas afateve të përcaktuara në dokumentet përkatëse të nënshkruara mes dy palëve dhe për lehtësimin e procedurave me qëllim të realizimit më të lehtë të aspekteve të ndryshme të planeve dhe projekteve zhvillimore të shkollave për zbatimin e projeketeve të graneteve shkollore. Palët u dakorduan që të bëhen përgatitjet e duhura për shqyrtim sa më të suksesshëm të segmenteve të projektit gjatë visitës së nëntorit të udhëheqësve të lartë të BB në Kosovë.

Në takimin e dytë në Departamnetin (ministrinë) e Arsimit të SHBA-ve delegacioni i MASHT u takua me Zëvendësdrejtorin e Drejtorisë për Bashkëpunim ndërkombëtar, Z. Daniel Boner dhe udhëheqësin e Sektorit për Arsim të Lartë, Dr. Steven Hant.

Ministri Veliu ka falënderuar SHBA-t për ndihmat e ndryshme që kanë dhënë institucionet dhe Zyra e SHBA-ve për sistemin arsimor kosovar. Në takim u shqyrtuan mundësi të ndryshme për bashkëpunim të mëtejmë në fushën e njohjes së diplomave dhe dokumenteve të fituara në SHBA (në përputhje me Konventën e Lisbonës), shkëmbimit të informatave për studentët kryesisht kosovarë që studjojnë dhe duan të studjojnë në SHBA, si dhe për bartjen e përvojave amerikane në lëmin e kolegjeve komunitare dhe të përvojave të Kalifornisë në racionalizimin e shfrytëzimit të objekteve shkollore.

Drejtori i Deparatamentit për arsim të lartë në MASHT Xhavit Rexhaj njoftoi se një pjesë e bisedës u përqëndrua në ndihmën e SHBA-ve për implementimin e sistemit për sigurimin e cilësisë në institucionet kosovare të arsimit të lartë, si dhe në sigurimin e bashkëpunimit me institucione përkatëse amerikane të cilat bëjnë akreditimin e institucioneve të AL në SHBA. “Zyrtarët e lartë të Deparatmentit të arsimit amerikan dhe Ministri Veliu vlerësuan rëndësinë e takimeve të këtilla dhe nevojën e shkëmbimit të informatave relevante në fushën e arsimit, gjithnjë me qëllim të lehtësimit të formave të ndryshme të bashkëpunimit përmes vendosjes së rrugëve institucionale”, njoftoi Rexhaj.

Gjatë qëndrimit në Washington, prej 3-11 tetor, delegacioni i MASHT ka zhvilluar dhe prezantuar me sukses një version të Konceptit të Strategjisë për zhvillimin e mësimdhënësve në sistemin arsimor kosovar, pastaj ka prezentuar materiale dhe të dhëna të tjera për sistemin arsimor kosovar në funksion të shkëmbimit të përvojave dhe praktikave të mira në sektorin e arsimit në vende të ndryshme në botë.

Në seminar marrin pjesë ministra dhe zyrtarë të lartë të ministrive të arsimit, në funksion të përmirësimit të procedurave për të arritur në një strategji sa më efektive, që ajo të jetë në shërbim të reformave të arsimit në vendet përkatëse.